ދައުލަތުގެ ނިޝާނުގެ އިންތަކައި މިންތައް އެނގޭނެހެން، ދިވެހި ދިދައަށް ވެސް ގާނޫނިީ ހިމާޔަތް ލިބޭ ގޮތަށް ގާނޫނެއް ފާސް ކުރުމުގެ މަސައްކަތް ކުރަމުންދާ ކަމަށް ދިވެހި ބަހާއި ސަގާފަތާއި ތަރިކައާ ބެހޭ މިނިސްޓަރު، އާދަމް ނަސީރު ވިދާޅުވެއްޖެ އެވެ.
ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ނޫސްވެރިއަކު ކުރި ސުވާލަކަށް ޖަވާބު ދެއްވަމުން މިނިސްޓަރު ނަސީރު ވިދާޅުވީ ގައުމީ ދިދައަށާއި ދައުލަތުގެ ނިޝާނަށް ވެސް ގާނޫނީ ހިމާޔަތް ބޭނުންވާ ކަމަށެވެ. އަދި އެކަން ކުރުމަށްޓަކައި ކުރަންޖެހޭ މަސައްކަތްތައް މިހާރު ތާވަލު ކުރެވިގެން ކުރަމުންދާ ކަމަށް ނަސީރު ވިދާޅުވި އެވެ.
"އަޅުގަނޑުމެންނަށް މިހާރު ފެންނަން ހުރި ގޮތަށް ބަލާއިރު، ދައުލަތުގެ ނިޝާނުގެ ވެސް އިންތަކާއި މިންތައް ކަނޑައެޅި އެއަށް ކަނޑައެޅޭ ވަކި ހަމަތަކެއް އެގޮތަށް ލިޔެވި ގާނޫނެއްގެ ސިފައިގައި ގެނެވިފައި އޮތް ކަމަކަށް ނުބެލެވޭ، އެހެންވީމާ ސަރުކާރުގެ ވިސްނުން އެކަމުގައި އެބައޮތް އަދި އެކަން މިހާރު ތާވަލު ކުރެވިފައި ވެސް އެބައޮތް ދިވެހި ދައުލަތުގެ މިކަހަލަ ގައުމީ ރަމްޒުތައް ހިމާޔަތް ކުރުމަށްޓަކައި ބިލެއް ޑްރާފްޓު ކުރުން،" ނަސީރު ވިދާޅުވި އެވެ.
އޭނާ ވިދާޅުވީ ގައުމީ ދިދަ އާއި ދައުލަތުގެ ނިޝާން ނޫނަސް، ދިވެހީންގެ އިއްޒަތާ ގުޅިފައި ހުރި އެފަދަ ހުރިހާ ކަމަކަށް ވެސް އެ ގާނޫނުގެ ތެރެއިން ހިމާޔަތް ލިބިގެންދާނެ ކަމަށެވެ.
