ޖިންސީ ނިޔަތެއް އޮވެގެން، ކުޑަކުއްޖެއްގެ ގައިގައި ގަސްދުގައި އަތްލި މީހަކު 10 އަހަރަށް ޖަލަށް ލާން ކްރިމިނަލް ކޯޓުން ހުކުމްކޮށްފި އެވެ.
ޖިންސީ ނިޔަތެއް އޮވެގެން ގަސްދުގައި ކުޑަކުއްޖެއްގެ ގައިގައި އަތްލިކަމުގެ ކުށް ސާބިތުވެގެން 10 އަހަރަށް ޖަލަށްލާން ކްރިމިނަލް ކޯޓުން މިދިޔަ އަންގާރަ ދުވަހު ހުކުމްކުރީ ހދ. ނޮޅިވަރަމް، ޝެހެނާޒް، މުހައްމަދު އަލީ އެވެ.
އޭނާ ޖަލަށްލާން ހުކުމްކުރީ ކުޑަކުދިންނަށް ޖިންސީ ގޯނާކުރާ މީހުންނާ މެދު ހާއްސަ އުސޫލުތަކަކަށް އަމަލުކުރުމުގެ ގާނޫނުގައިވާ ގޮތުގެ މަތިން، އެގާނޫނުގެ ތިން ވަނަ މާއްދާގައި ބުނާ ކުށް ސާބިތުވެގެންނެވެ.
މުހައްމަދު އަލީ 10 އަހަރަށް ޖަލަށްލާން ހުކުމްކުރިކަން ކްރިމިނަލް ކޯޓުގެ ވެބްސައިޓްގައި ހާމަކުރި ނަމަވެސް އެ މައްސަލަ ނިމުނު ގޮތުގެ ރިޕޯޓް އާންމެއް ނުކުރެ އެވެ. އެއީ ކުޑަކުއްޖެއްގެ މަސްލަހަތު ހިމެނޭ މައްސަލައަކަށް ވާތީ އެވެ.
