ވެރިކަންކުރާ ޕީއެންސީގެ އެތެރޭގެ އިންތިހާބު އަންނަ އޮކްޓޯބަރު 19، ގައި ބާއްވައި، އެކި މަގާމުތަކަށް 2،095 މެންބަރުން އައްޔަނުކުރަން ނިންމައިފި އެވެ.
ޕީއެންސީން ބޭއްވި ނޫސްވެރިންގެ ބައްދަލުވުމެއްގައި އެ ޕާޓީގެ ޕީޖީ ލީޑަރު އިނގުރައިދޫ ދާއިރާގެ މެންބަރު އިބްރާހިމް ފަލާހު ވިދާޅުވީ ދާއިރާތަކަށް ދާއިރާގެ ރައީސުން، ދާއިރާގެ ނައިބު ރައީސުން، ޒުވާނުންގެ ހަރަކާތުގެ ރައީސުން، އަންހެނުންގެ ހަރަކާތުގެ ރައީސުން އަދި ސްޓިއަރިން ކޮމިޓީގެ މެންބަރުން އިންތިހާބުކުރާނެ ކަމަށެވެ.
"އިންތިހާބުގައި ރާއްޖޭގެ އެކި ކަންކޮޅުތަކުން ޖުމްލަ 2،095 މެންބަރު އެކިއެކި މަގާމުތަކަށް އައްޔަނުކުރާނެ. މިއީ ވަރަށް ބޮޑު އަދަދެއް. މިހާރު ވެސް އަޅުގަނޑުމެންނަކީ ބޮޑު ޕާޓީއެއް. 30،000 މެންބަރުން އެކުލެވޭ. ހުށަހަޅާ ފޯމުތަކަށް ބަލާއިރު 50،000 މެންބަރުން ހަމަވާ ވަރަށް ފޯމު އެބަހުރި،" ފަލާހް ވިދާޅުވި އެވެ.
އިންތިހާބަށް ކުރިމަތިލުމުގެ ފުރުސަތު ލިބެނީ ސެޕްޓެމްބަރު، 30 ހަވީރު 06:00 ޖެހުމާ ހަމައަށެވެ. އެ މުއްދަތާ ހަމައަށް ޕާޓީގެ މެންބަރެއްގެ ގޮތުގައި ތިބި ކޮންމެ މެންބަރަކަށް ވެސް އިންތިހާބުގައި ވޯޓުލުމުގެ ހައްގު ލިބެ އެވެ.
އިންތިހާބުގައި ދާއިރާގެ ރައީސުންގެ ގޮތުގައި އިންތިހާބުކުރާނީ ޕީއެންސީގެ މަޖިލިސް މެންބަރުން ނުހިމެނޭ ދާއިރާތަކަށްކަން ފާހަގަކޮށް އެ ޕާޓީން ބުނީ އެ ދާއިރާތަކަށް އިންތިހާބުކުރާނީ ނައިބުރައީސުން ކަމަށެވެ.
އެގޮތުން ދާއިރާގެ ރައީސުންނަށް ކުރިމަތިލާ މެންބަރުން ދަފްތަރުގައި ނުހިމެނޭ 50 މެންބަރުންގެ ފޯމު ހުށަހަޅަން ޖެހޭއިރު ދާއިރާގެ ނައިބު ރައީސުންނަށް ކުރިމަތިލާ މެންބަރުން 25 ފޯމް ހުށަހަޅަން ޖެހެ އެވެ.
ޕާޓީގެ ދަފްތަރު އޮކްޓޯބަރު 4، ގައި އިއުލާން ކުރުމަށް ވަނީ ހަމަޖެހިފަ އެވެ. އަދި ޝަކުވާއަށް ބެލުމަށްފަހު ފައިނަލް ދަފްތަރު އެކުލަވާލުމަށް ހަމަޖެހިފައިވަނީ އޮކްޓޯބަރު 8، ކަމަށްވާއިރު އިންތިހާބުގެ ނަތީޖާ އިއުލާން ކުރުމަށް ހަމަޖެހިފައި ވަނީ އޮކްޓޯބަރު 24، ގަ އެވެ.
