މާލޭ މީހުންނަށް ގޯތި ދިނުމަށް ހުޅުމާލޭގެ މާސްޓާ ޕްލޭނަށް ބަދަލު ގެނެސް މިދިޔަ އަހަރު ހިއްކަން ފެށި ހުޅުމާލެ ތިންވަނަ ފިޔަވަހީގެ ބިން ހިއްކުމުގެ މަސައްކަތް އަނެއްކާ ވެސް ހުއްޓާލައިފި އެވެ.
ޖުމްލަ 63 ހެކްޓަރު ހިއްކުމަށް ފެށި މި މަޝްރޫއުގެ މަސައްކަތް މީގެ ކުރިން ވެސް އެކި ފަހަރުމަތިން ވަނީ މަޑުޖެހިފަ އެވެ. އެންމެ ފަހުން މަސައްކަތް އަލުން ފެށި ކަމަށް ހައުސިން ޑިވެލޮޕްމަންޓު ކޯޕަރޭޝަން (އެޗްޑީސީ) އިން ބުނީ ޖޫން 24، ގަ އެވެ.
އޭރު އެ ކުންފުނިން ހިއްސާކުރި ފޮޓޯ އަދި ވީޑިއޯ ތަކާއި އިއްޔެ ނަގާފައިވާ ސެޓްލައިޓު ފޮޓޯތަކަށް ބަލާއިރު، ވެއެތުވެދިޔަ ދެ މަހެއްހާ ދުވަހުގެ ތެރޭގައި ހިއްކާފައިވަނީ ވަރަށް ކުޑަ ތަންކޮޅެކެވެ. އެ ބިން ހިއްކީ ޖޫން މަހުގެ ފަހު ހަފުތާގެ ތެރޭގަ އެވެ. ޖޫން 29، ގެ ފަހުން އިތުރަށް ބިން ހިއްކާފައެއް ނުވެ އެވެ.
އެޗްޑީސީން އޭރު ބުނީ ތިންވަނަ ފިޔަވަހިން ހިއްކާ ޖުމްލަ 63 ހެކްޓަރުގެ ތެރެއިން ބާކީ އޮތް 40 ހެކްޓަރުގެ ބިން ހިއްކާ ނިންމާލާނެ ކަމަށެވެ. މަސައްކަތް މަޑުޖެހުނު ސަބަބެއް ފަހުން ހާމައެއް ނުކުރެ އެވެ.
ހުޅުމާލެ ފޭސް ތިނެއްގެ ގޮތުގައި ހިއްކަން ނިންމާފައިވާ ސަރަހައްދު -- ފޮޓޯ: އެޗްޑީސީ
ކެޕިޓަލް މެރިން އެންޑް ސިވިލް ކޮންސްޓްރަކްޝަން ކޮމްޕެނީ (ސީއެމްސީ) އާ ހަވާލުކޮށްގެން ހިންގާ މި މަޝްރޫއުގެ ބިން ހިއްކުމުގެ މަސައްކަތް ވެސް ކުރަނީ ނެދަލޭންޑްސްގެ ބޮސްކާލިސް ކުންފުނިންނެވެ. މި މަސައްކަތުގައި އެ ކުންފުނިން ބޭނުންކުރަނީ "ވިލެމް ވެން އޯރެންޖް" ޑްރެޖަރެވެ. މަޝްރޫއު ހަލުވި ކުރުމަށް ކަމަށް ބުނެ އެޕްރީލް 18، ގައި "ޕްރިންސް ޑި ނެދަލެންޑްސް" ޑްރެޖަރުވެސް ގެނެ އެވެ.
ނަމަވެސް، މިވަގުތު މި ދެ ޑްރެޖަރު ވެސް ރާއްޖެއަކު ނެތެވެ. ކަނޑުދަތުރު ކުރާ އުޅަނދުތައް ޓްރެކް ކުރާ ވަސީލަތްތަކުން ދައްކާ ގޮތުން މިވަގުތު "ވިލެމް ވެން އޯރެންޖް" އޮތީ ދެކުނު ކޮރެއާގަ އެވެ. "ޕްރިންސް ޑި ނެދަލެންޑްސް" އޮތީ ފިލިޕީންސް ގަ އެވެ.
ތިންވަނަ ފިޔަވަހިން މިހާތަނަށް ހިއްކިފައިވާ ސަރަހައްދު ފެންނަ ސެޓްލައިޓު ފޮޓޯއެއް؛ މި ފޮޓޯ ނަގާފައިވަނީ އިއްޔެ --- ފޮޓޯ: ސެންޓިނެލް2
ހުޅުމާލެ ތިންވަނަ ފިޔަވަހި ހިއްކަން ފެށީ ސެޕްޓެމްބަރު 22، 2023 ގަ އެވެ. އޭގެ ފަހުން އައި ހުއްޓުމަކަށްފަހު މި ސަރުކާރުން މި އަހަރުގެ ޖެނުއަރީ މަހު މަސައްކަތް ފެށި އެވެ. އެފަހަރު ސަރުކާރުގެ އެކި ސިޔާސީ މުވައްޒަފުން މަސައްކަތް ކުރާ ސަރަހައްދަށް ގޮސް މަސައްކަތުގެ އަދާހަމަ އެކި ވީޑިއޯތަކުގެ ޒަރިއްޔާއިންވެސް ދިނެވެ. ނަމަވެސް އޭގެ ފަހުން ވެސް މަސައްކަތް މަޑުޖެހުނެވެ.
މަޝްރޫއުގެ މަސައްކަތް ހަލުވި ކުރަން ދެވަނަ ޑްރެޖަރެއް ގެނައީ އޭގެ ފަހުން މަސައްކަތް ފެށި ދުވަހެވެ. އެފަހަރު މަސައްކަތް މަޑުޖެހުނީ ގާ ހުދުވަމުން ދާތީ ޖޫން 10، އާ ހަމައަށް ބިން ހިއްކުމާއި ފަރުތަކަށް ސްޓްރެސް ބޮޑުވާ ފަދަ އެންމެހައި މަސައްކަތްތައް ހުއްޓާލަން އެންވަރަމެންޓް ޕްރޮޓެކްޝަން އޭޖެންސީ (އީޕީއޭ) އިން އެންގުމުންނެވެ. މަސައްކަތް ދެން ފެށީ ޖޫން 24، ގަ އެވެ.
ގާތްގަނޑަކަށް 268 މިލިއަން ޑޮލަރު (3.9 ބިލިއަން ރުފިޔާ) ގައި އަގު ކުރެވިފައިވާ މި މަޝްރޫއުގެ ދަށުން ހުޅުމާލެ ތިންވަނަ ފިޔަވަހީގެ އިތުރުން ޔޮޓް މެރީނާ ތަރައްގީ ކުރަން ހާއްސަކޮށްފައިވާ ދިޔަނެރު ފަޅާއި ތިލަފުށި ހިއްކުން ހިމެނެ އެވެ.
ތިލަފުށިން ހިއްކާ ބަޔަކީ މި މަޝްރޫއަށް އަގު އަދާކުރުމުގެ ގޮތުން ސީއެމްސީއަށް 99 އަހަރަށް ޑިވެލޮޕްމަންޓް ރައިޓްސް ދީފައިވާ ބިމެކެވެ. މަޝްރޫއުގެ ބާކީ އަގު އަދާކުރަނީ ހުޅުމާލޭން ސީއެމްސީއަށް 99 އަހަރަށް ދީފައިވާ 10 ހެކްޓަރުގެ ބިމުންނާއި އެޑްވާންސްގެ ގޮތުގައި އެ ކުންފުންޏަށް ދޫކުރި 20 މިލިއަން ޑޮލަރުންނެވެ.
