ހައިވޭ އިން ހުޅުމާލެއަށް އަރާ ސަރަހައްދުގައި ހުންނަ ވިލާ ޕެޓްރޯލް ޝެޑް ކައިރިން ދެ ސައިކަލެއް ޖެހި ނުރައްކާތެރި އެކްސިޑެންޓެއް ހިނގައިފި އެވެ.
ފުލުހުން މައުލޫމާތު ދޭ ގޮތުގައި މި އެކްސިޑެންޓުގައި އަނިޔާވީ އަންހެނަކަށާއި ފިރިހެނަކަށެވެ. އަނިޔާވި ދެ މީހުންނަށް ވެސް މިހާރު ދަނީ ހުޅުމާލެ ހޮސްޕިޓަލުގައި ފަރުވާ ދެމުންނެވެ.
މިއީ މިއަދު ހިނގި ތިން ވަނަ އެކްސިޑެންޓެވެ. މިއަދު ހެނދުނު ވެސް ކާރަކާއި ސައިކަލެއް ޖެހި ހިނގި އެކްސިޑެންޓުގައި ޒުވާނަކަށް އަނިޔާވެ ދަނީ ހުޅުމާލެ ހޮސްޕިޓަލުގައި ފަރުވާދެމުންނެވެ. އަދި ރޭސް ކާރަކާއި ސައިކަލެއް ޖެހި ހިނގި އެކްސިޑެންޓުގައި 23 އަހަރުގެ ޒުވާނެއް ވަނީ މަރުވެފަ އެވެ.
މަގުމަތީގެ އެކްސިޑެންޓުތައް މި ދުވަސްވަރު ގިނަވެފައިވާއިރު، ސަރުކާރުން ވަނީ އެކްސިޑެންޓުތައް ހުއްޓުވަން ހާއްސަ ފިޔަވަޅުތަކެއް އަޅަން ނިންމާފަ އެވެ. މި ފިޔަވަޅުތައް އަޅަން ނިންމީ ހުކުރު ދުވަހު ހިނގި އެކްސިޑެންޓެއްގައި 23 އަހަރުގެ ޒުވާނަކު ނިޔާވުމާ ގުޅިގެންނެވެ.
