ސަރުކާރުގެ ބައެއް ކުންފުނިތައް އެއްކޮށްލަން ވަޒީރުންގެ މަޖިލީހުން މިއަދު ނިންމައި އެކަމާ ގުޅޭ ބައެއް މައުލޫމާތު ހިއްސާކޮށްފި އެވެ.
ރައީސް އޮފީހުގައި ބޭއްވި ނޫސްވެރިންގެ ބައްދަލުވުމެއްގައި އިކޮނޮމިކް މިނިސްޓަރު މުހައްމަދު ސައީދު ވިދާޅުވީ ރާއްޖޭގެ އިގްތިސާދީ ކަންތައްތައް ރިފޯމު ކުރުމަށް ވަޒީރުންގެ މަޖިލީހުގައި މަޝްވަރާކޮށް ބައެއް ކުންފުނިތައް އެއްކޮށްލަން ނިންމާފައިވާ ކަމަށެވެ.
ސައީދު ވިދާޅުވީ މޯލްޑިވްސް އެއާޕޯޓްސް ކޮމްޕެނީއާއި ރީޖަނަލް އެއާޕޯޓްސް ކޮމްޕެނީ އެއްކޮށްލަން ނިންމައި، ކޯޕަރޭޓް ގަވަނަންސްގެ އުސޫލުން ދެ ކުންފުނިން ނިންމަން ޖެހޭ ނިންމުންތައް ނިންމައި، ޖެނުއަރީ، 31، 2025 ގައި މާޖުކޮށް ނިންމާނެ ކަމަށެވެ.
"ދެ ކުންފުނީގެ މާޖާގެ ސަބަބުން ވަރަށް ބޮޑެތި ކުރިއެރުންތަކެއް ވެސް އަންނާނެކަން އަޅުގަނޑު ފާހަގަކޮށްލަން. އެގޮތުން ހަނިމާދޫ ވެސް ހިމެނޭ ގޮތަށް އަށް އެއާޕޯޓެއް މަސައްކަތުގެ ތެރޭގައި މާޖް ކުރެވިގެންދާނެކަން އަޅުގަނޑު ފާހަގަކޮށްލަން،" ސައީދު ވިދާޅުވި އެވެ.
ހައުސިން ޑިވެލޮޕްމަންޓް ކޯޕަރޭޝަންގެ ސަބްސިޑަރީއެއް ގޮތަށް ފަހި ދިރިއުޅުން ކޯޕަރޭޝަން ހަމަޖެއްސުމަށް ނިންމާފައިވާކަން ސައީދު ހާމަކުރެއްވި އެވެ.
އޭގެއިތުރުން ސައީދު ވިދާޅުވީ މޯލްޑިވްސް ފަންޑް މެނޭޖްމަންޓް ކޯޕަރޭޝަން، ބިޒްނަސް ސެންޓާ ކޯޕަރޭޝަންއާ އެއްކޮށްލަން ގެންދިޔަ މަޝްވަރާގެ އަލީގައި ކުރިއަށް ދިޔުމަށް ގޮތްތަކެއް ކަނޑައެޅިފައިވާ ކަމަށެވެ.
އެގޮތުން މޯލްޑިވްސް ފަންޑް މެނޭޖްމަންޓް ކޯޕަރޭޝަންގެ ސަބްސިޑަރީއެއް ގޮތަށް އޯޝަން ކަނެކްޓު މިހާރު ވެސް އޮތް ގޮތަށް ކުރިއަށް ގެންދަން ނިންމާފައިވާ ކަމަށް ވެސް ސައީދު ވިދާޅުވި އެވެ.
އެގްރޯ ނެޓް މޯލްޑިވްސް، މޯލްޑިވްސް އިންޑަސްޓްރިއަލް ފްރީ ޒޯންގެ ބައެއްގެ ގޮތުގައި ބަދަލު ކުރަން ނިންމިކަން ފާހަގަކުރައްވާ ސައީދު ވިދާޅުވީ އޭގެ ސަބަބުން ވަރަށް ބޮޑެތި ފަސޭހަތަކެއް ވެގެންދާނެ ކަމަށެވެ.
އޭގެއިތުރުން ސައީދު ވިދާޅުވީ ޓޫރިޒަމްގެ މަސައްކަތްތައް ކުރުމަށް ހާއްސަކޮށްފައިވާ އެމްޓީޑީސީ، އެމްއައިޓީޑީސީފަދަ ކުންުފުނިތައް އެއްކޮށްލުމާ ގުޅޭ މަޝްވަރާތައް ކުރިއަށް އޮތް ދުވަސްތަކުގައި ކޮށްގެން އެންމެ އެކަށީގެންވާ ގޮތެއް ނިންމާނެ ކަމަށެވެ.
