ރައީސް ޑރ. މުހައްމަދު މުއިއްޒު އާއި އަނބިކަނބަލުން ސާޖިދާ މުހައްމަދު ސިންގަރޫޕަރަށް ކުރެއްވި ދަތުރަށް ފަހު، ރޭ ރާއްޖެ ވަޑައިގެންފި އެވެ.
ރައީސް މުއިއްޒު އާއި ފަސްޓް ލޭޑީ ސާޖިދާ އާދީއްތަ ދުވަހުގެ ރޭ ސިންގަޕޫރަށް ވަޑައިގަތީ ބޭންކު އޮފް މޯލްޑިވްސް އާއި އެމްޑީޕީ ގުޅިގެން މި ވެރިކަން ވައްޓާލަން ރޭވި ކަމަށް ސަރުކާރުން ބުނާ "މާލީ ބަގާވާތް" ނާކާމިޔާބު ކޮށްލާފައިވާކަން ހާމަ ކުރެއްވުމަށް ފަހު އެވެ.
ސިންގަޕޫރަށް ވަޑައިގަތީ އާރަށުގައި ފުޓުބޯޅަ ކުޅުއްވަނިކޮށް ލިބުނު އަނިޔާއަކާ ގުޅިގެންނާއި މީގެ ދެ އަހަރެއްހާ ދުވަސްކުރިން ކުރި ސާޖަރީއަކާ ގުޅިގެން ކަމަށް ރައީސް މުއިއްޒު ވިދާޅުވެފައިވެ އެވެ.
އާރަށުގައި ފުޓްބޯޅަ ކުޅުއްވަނިކޮށް އަނިޔާވެގެން އައިޖީއެމްއެޗް ހޮސްޕިޓަލުން ވެސް ފަރުވާ ހޯއްދެވި ކަމަށް އެ މަނިކުފާނު ވިދާޅުވި އެވެ.
ލިބިވަޑައިގެންނެވި އަނިޔާގެ ތަފްސީލެއް އަދި މާލޭ ސިޓީގެ މޭޔަރަކަށް މުއިއްޒު ހުންނެވިއިރު ސިންގަޕޫރުން ކުރީ ކޮން ކަހަލަ ސާޖަރީއެއް ކަމެއް ރައީސް އޮފީހުން ހާމައެއް ނުކުރެ އެވެ.
މާލީ ބަގާވާތަކުން ވެރިކަން ބަދަލުކުރަން އުޅުނު ކަމަށް ސަރުކާރާއި ފުލުހުން ބުނީ ބޭންކު އޮފް މޯލްޑިވްސްގެ ކާޑު ލިމިޓު ބަދަލުކުރަން އެ ބޭންކުގެ ބޯޑުން އޯގަސްޓު 21 ގައި ނިންމި ނިންމުމާ ގުޅިގެންނެވެ. އެ ނިންމުން ބޭންކުން އިއުލާނު ކުރީ އޯގަސްޓު 25 ގަ އެވެ.
ބީއެމްއެލްގެ އެ ނިންމުމަކީ ކުއްލިއަކަށް ނިންމި ނިންމުމެއް ނޫނެވެ. އެއީ އެ ބޭންކަށް މާ ކުރިން ވެސް ނިންމަން ޖެހިފައި އޮތް މަޖުބޫރީ ކަމެކެވެ. ނެތް ޑޮލަރެއް ބޭންކަށް ވެސް ނުދެވޭނެ އެވެ. އޮގަސްޓު 21, ގައި ޑިރެކްޓަރުން ނިންމި ނިންމުމަކީ ބޭންކިން ގާނޫނުގެ 15 ވަނަ މާއްދާއާ އެއްގޮތަށް ނިންމާފައިވާ ނިންމުމެކެވެ.
ބީއެމްއެލްގެ ނިންމުމާ ގުޅިގެން ރައްޔިތުންގެ ރަތަށް ދިޔުމުން، ސަރުކާރުގެ ނުފޫޒުން އެ ނިންމުން ބަދަލު ކުރުމަށް ފަހު، ބީއެމްއެލްއިން ކުރީ ބަގާވާތެއް ކަމަށް ސަރުކާރުން ހެދި އެވެ. އެ ބަގާވާތް ގެންނަން އެމްޑީޕީ އާއި ސޯޝަލް މީޑިއާގެ ބޮޓް އެކައުންޓުތައް ގުޅިގެން މަސައްކަތް ކުރި ކަމަށް ވެސް ފުލުހުން ބުނާއިރު، މިއަދާ ހަމައަށް ވެސް އެ ތުހުމަތުގައި އެއްވެސް މީހަކާ ސުވާލު ކުރިކަމެއް، ތަނެއް ބަލައިފާސްކުރި ކަމެއް. އަދި މީހަކު ހައްޔަރު ކުރި ކަމެއް ފުލުހުން ހާމައެއް ނުކުރެ އެވެ.
