މުސްލިމުންގެ ފުރަތަމަ ގިބްލަ އަލް މަސްޖިދުލް އަގްސާ މިސްކިތުގެ ތެރޭގައި ޔަހޫދީންގެ ފައްޅިއެއް އަޅަން އިޒްރޭލުގެ މިނިސްޓަރަކު ގޮވާލުމުން ދިވެހިރާއްޖެއިން އެކަން ކުށްވެރިކޮށްފި އެވެ.
ފޮރިން މިނިސްޓްރީން އަންގާރަ ދުވަހު ނެރުނު ބަޔާނެއްގައި ބުނީ އެފަދަ ކަންކަމަށް ގޮވާލުމުން ގާޒާގައި ހިނގަމުން ގަތުލުއާންމު ހުއްޓާލަން ވެސް އުނދަގޫވާނެ ކަމަށާއި އެފަދަ ކަމަކުން މަގުފަހިވާނީ އިތުރު ހަމަނުޖެހުމަށް ކަމަށެވެ.
"ގުދުސް އަދި އެ ރަށުގައިވާ ހުރުމަތްތެރި ތަންތަނުގެ ގާނޫނީ ހައިސިއްޔަތު ހިމާޔަތްކޮށް ފަލަަސްތީނު ރައްޔިތުންގެ ހައްގުތައް ހިމާޔަތް ކުރަން އަވަސް ފިޔަވަޅުތަކެއް އެޅުމަށް ބައިނަލްއަގުވާމީ މުޖްތަމައުއަށް ދިވެހި ސަރުކާރުން ގޮވާލަން،" އެ ބަޔާނުގައި ބުނެފައިވެ އެވެ.
އަގްސާ މިސްކިތުގައި ފައްޅިއެއް އަޅަން ގޮވާލީ ނެޝަނަލް ސެކިއުރިޓީ މިނިސްޓަރު އިޓްމާރު ބިން-ގްވިރް އިޒްރޭލުގެ އާމީ ރޭޑިއޯއަށް ދިން އިންޓަވިއުއެއްގަ އެވެ. އޭނާއަކީ ހަރުކަށި ކަނާއަތު ފިޔައިގެ ޕާޓީއަކަށް ނިސްބަތްވާ މީހެކެވެ.
"އަރަބިންނަށް ވެސް އެމީހުން ބޭނުން ތަނަކު ނަމާދު ކުރެވޭ. އެހެންވީމަ ޔަހޫދީންނަށް ވެސް އެމީހުން ބޭނުން ތަނަކު ނަމާދު ކުރެވެންޖެހޭނެ،" އިންޓަވިއުގައި އޭނާ ބުންޏެވެ.
އަގްސާ މިސްކިތުގައި ޔަހޫދީން ނަމާދު ކުރުމަކީ އިޒްރޭލުގެ ސަރުކާރުން ވެސް މަނާކޮށްފައި އޮންނަ ކަމެކެވެ. ނަމަވެސް ވަކި ވަގުތުތަކެއްގައި އަގްސާ މިސްކިތަށް ޔަހޫދީން އަދި އެހެން ދީންތަކުގެ މީހުން ވަނުން އޮންނަނީ ހުއްދަކޮށްފަ އެވެ.
ފަލަސްތީނުގައި އިހުޒަމާނުއްސުރެ އުޅެމުން އަންނަ އޯތޮޑޮކްސް ޔަހޫދީން ގަބޫލު ކުރާ ގޮތުގައި އަގްސާ މިސްކިތަށް ޔަހޫދީން ވަނުން ވެސް ހުއްދައެއް ނޫނެވެ. އޯތޮޑޮކްސް ޔަހޫދީން ވަނީ މީގެ ކުރިން ވެސް އެކި މައްސަލަތަކުގައި ބެން-ގްވިރް އަށް ފާޑުކިޔައިފަ އެވެ.
