ފަހުގެ ތާރީހެއްގައި ރާއްޖޭގައި ރޭވި އިންތިޒާމުވެގެން ހިންގި އެންމެ ބޮޑު ހިޔާނާތުގެ މައްސަލަ ކަމަށްވާ އެމްއެމްޕީއާރުސީގެ ކޮރަޕްޝަންގައި އެ ފައިސާއަށް ހިޔާނާތްތެރިވި މީހުންގެ ލިސްޓުގައި ތިބީ ވިޔަފާރި ކުރުމަށް ޑޮލަރު މާރު ކުރި މީހުން ކަމަށް ރައީސް ޑރ. މުހައްމަދު މުއިއްޒު ރޭ ވިދާޅުވެއްޖެ އެވެ.
ޕީއެންސީން ބޭއްވި ހަރުގެ ޖަލްސާގައި ރައީސް މުއިއްޒު ވިދާޅުވީ އެމްއެމްޕީއާރްސީގެ ލިސްޓުގައި ތިބި ގިނަ މީހުންނަކީ ހިޔާނާތުގައި ބައިވެރިނުވެ، ޑޮލަރު މާރު ކުރި މީހުން ކަމަށެވެ.
"އޭގަ ތިބި ގިނަ މީހުންނަކީ އެކަމުގައި ބައިވެރި މީހުންނެއް ނޫން. ވިޔަފާރި ކުރުމުގައި އޭގައި ޑޮލަރު މާރުކުރަންވީމަ ޑޮލަރު ދޭ ބައެއް ގޮތުން ޑޮލަރު މާރުކޮށްފައި އޭގައި ގިނަ މީހުން އޮތީ،" ރައީސް މުއިއްޒު ވިދާޅުވި އެވެ.
ރައީސް މުއިއްޒު ވިދާޅުވީ އެމްއެމްޕީއާރްސީގެ ފައިސާއިން 14 މިލިއަން ރުފިޔާ އެމަނިކުފާނަށް ލިބުނު ކަމަށް ބުނެ ދައުރު ކުރަމުންދަނީ ދޮގު ލިސްޓެއް ކަމަށެވެ.
އެމްޑީޕީގެ ވެރިކަމުގައި އެކި ފަހަރުމަތިން ބަދަލުކޮށްގެން ލިސްޓުތައް ނެރުނުއިރު ވެސް އެމަނިކުފާނުގެ ނަން ޑޮލަރު މާރުކުރި މީހުންގެ ތެރޭގައި ހިމެނިގެން ވެސް އެ ލިސްޓުގައި ހިމެނިފައި ނުވާ ކަމަށް ރައީސް މުއިއްޒު ވިދާޅުވި އެވެ.
އެމަނިކުފާނުގެ ނަން އޮތް ލިސްޓު ފެންމަތިވުމާއެކު އެކަން ބަލައިދިނުމަށް ފުލުހުންނަށް އެންގިކަން ފާހަގަކުރައްވާ ރައީސް މުއިއްޒު ވިދާޅުވީ ފުލުހުން އެކަން ބަލައި "އެނަލައިޒްކޮށް" އެއީ ފޭކް ލިސްޓެއް ކަމަށް ބުނެ ރިޕޯޓެއް އަރުވާފައިވާ ކަމަށެވެ.
މީގެއިތުރުން ރައީސް ވިދާޅުވީ ހިތްވަރު ދޭން ބޭނުންވަނީ ދޮގު ހަދުމުގެ ބަދަލުގައި ޒިންމާދާރުވުމަށް ކަމަށެވެ.
