ސިއްހީ ފަރުވާ އަށް ރައީސް ޑރ. މުހައްމަދު މުއިއްޒު މިރޭ ސިންގަޕޫރަށް ފުރާވަޑައިގެންފި އެވެ.
ރައީސް މުއިއްޒު ސިންގަޕޫރަށް ވަޑައިގެންނެވީ އާރަށުގައި ފުޓުބޯޅަ ކުޅުއްވަނިކޮށް ލިބުނު އަނިޔާއަކާ ގުޅިގެންނާއި މީގެ ދެ އަހަރެއްހާ ދުވަސްކުރިން ކުރި ސާޖަރީއަކާ ގުޅިގެން ކަމަށް އެ މަނިކުފާނު ވިދާޅުވި އެވެ.
"މި ދެންނެވި އިންޖަރީ ވެގެން މާލޭގައި ޑޮކްޓަރުންނަށް ދައްކާފައި ސެކަންޑް އޮޕީނިއަންއަކާ އަދި ކުރީގައި މީގެ ދެތިން އަހަރު ކުރިން ކުރި ސާޖަރީއެއްގެ ރެގިއުލާ ޗެކަޕް ވެސް އޮތުމާ އެކީގައި މިރޭ އެބަ ދަން ސިންގަޕޫރަށް،" ޕީއެންސީން ބޭއްވި ހަރުގެ ޖަލްސާގައި އެމަނިކުފާނު ވިދާޅުވި އެވެ.
މާލޭ ސިޓީގެ މޭޔަރަކަށް މުއިއްޒު ހުންނެވިއިރު ސިންގަޕޫރުން ކުރީ ކޮން ކަހަލަ ސާޖަރީއެއް ކަމެއް މިހާތަނަށް ހާމަކޮށްފަ އެއް ނުވެ އެވެ.
ހަސަންކުރުސީގެ ނަމުގައި ހިންގާ "އެކްސް" އެކައުންޓުން ބުނެފައިވާ ގޮތުގައި ރައީސް މުއިއްޒަށް ރޭ ވަރަށް ބޮޑަށް މައިގްރޭންގެ ތަދު އައިސްގެ މިރޭ ސިންގަޕޫރަށް ވަޑައިގަތުމަށް ވަނީ ނިންމައިފަ އެވެ.
ރައީސް މުއިއްޒު ސިންގަޕޫރަށް ކުރައްވާ ދަތުރުފުޅަށްފަހު އެނބުރި ރާއްޖެ ވަޑައިގަންނަވާނީ ދެ ދުވަސް ފަހުން ކަމަށް އެމަނިކުފާނު ވިދާޅުވި އެވެ.
ރައީސް މުއިއްޒު ސިންގަޕޫރަށް ވެރިކަމާ ހަވާލުވެވަޑައިގެންނެވި ފަހުން ނުރަސްމީ ދަތުރުފުޅުތަކުގައި ވަޑައިގަންނަވަ އެވެ. މީގެކުރިން ކުރެއްވި ދަތުރުފުޅުތަކާ ގުޅޭ ތަފްސީލެއް ހާމަކުރައްވާފައެއް ނުވެ އެވެ.
