ރުފިޔާ ކާޑުތަކުން ޑޮލަރުގެ މުއާމަލާތް ނުކުރެވޭ ގޮތަށް މިއަދު ބޭންކް އޮފް މޯލްޑިވްސްއިން ބަދަލު ގެނައީ ރައީސް ޑރ. މުހައްމަދު މުއިއްޒު ސީދާ އަންގަވާފައި އޮތް ގޮތާ ހިލާފަށް ކަމަށް އިކޮނޮމިކް މިނިސްޓަރު، މުހައްމަދު ސައީދު ވިދާޅުވެއްޖެ އެވެ.
ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުގައި ނޫސްވެރިއަކު ކުރި ސުވާލަކަށް ފިނޭންސް މިނިސްޓަރު، ޑރ. މުހައްމަދު ޝަފީގު ޖަވާބު ދެއްވަމުން ދަނިކޮށް މިނިސްޓަރު ސައީދުގެ ފޯނަށް ލިބިވަޑައިގެންނެވި މެސެޖަކަށްފަހު މައިކު ކައިރިއަށް ވަޑައިގެން ސައީދު ވިދާޅުވީ ބީއެމްއެލްއިން މިއަދު އަމަލު ކުރި ގޮތަށް އަމަލު ނުކުރަން ރައީސް އެންގެވި ވާހަކަ ދަންނަވަން ކުރިން "ހަނދާން ނެތުނީ" ކަމަށެވެ.
"ބީއެމްއެލްއިން މިއަދު އަމަލު އެ ކުރީ ސީދާ ރައީސް އެކަން އެގޮތަށް ނުކުރަން އަންގާފައި އޮއްވައި،"
އޭނާ ވިދާޅުވީ ބީއެމްއެލްއިން މިއަދު ނިންމި ގޮތަށް އަމަލު ނުކުރަން ރައީސް އެންގެވީ އެތައް ބައިވަރު ކިޔަވާ ކުދިންނާޢި އިމްޕޯޓު ވިޔަފާރި ކުރާ އެތައް ބައެއްގެ ހައްގުގައި ކަމަށެވެ.
އެ މައުލޫގައި ވާހަކަދައްކަވަމުން ފޮރިން މިނިސްޓަރު، މޫސާ ޒަމީރު ވިދާޅުވީ ބީއެމްއެލުން ޑޮލަރުގެ މުއާމަލާތްތައް ލިމިޓު ކުރަން ނިންމުމުގެ ކުރިން ސަރުކާރާ އެކު މަޝްވަރާތަކެއް ކުރި ކަމަށެވެ. ނަމަވެސް މިއަދު ބޭންކުން ނިންމި ނިންމުމަކީ ސަރުކާރުގެ ލަފަޔާ ހިލާފަށް ނިންމި ނިންމުމެއް ކަމަށް ޒަމީރު ވެސް ވިދާޅުވި އެވެ.
"ކުރީގައި ވެސް ވާހަކަދެކެވިފައި އޮތީ ތިޔަ ވިދާޅުވާހެން އިނގޭތޯ، އެކަމަކު ބޭންކުން އޭރުގައި މަޝްވަރާ ކުރެވުނު ގޮތަކަށް ނޫން ނޫނިއްޔާ އަޅުގަނޑުމެން ލަފާ އެރުވި ގޮތަކަށް ނޫން ބޭންކުން އެކަން ކުރައްވާފައި އެއޮތީ،" ޒަމީރު ވިދާޅުވި އެވެ.
އޭނާ ވިދާޅުވީ ބީއެމްއެލްގެ އެންމެ ބޮޑު ހިއްސާދާރަކީ ސަރުކާރު ކަމަށް ވާތީ އެ ބޭންކަށް ކުރިމަތިވާ ދަތިތަކަށް ހައްލެއް ހޯދައި ދިނުމަކީ ސަރުކާރުން ވަރަށް އިސްކަމެއް ދޭ ކަމެއް ކަމަށެވެ. އަދި، މިއަދުގެ ނިންމުމާ ގުޅިގެން ވެސް ބީއެމްއެލްގެ ހުރި ދަތިތަކަކީ ކޮބައިތޯ ބަލައި ހައްލެއް ހޯދައި ދިނުމުގެ މަޝްވަރާތައް ކުރެވުނު ކަމަށް ޒަމީރު ވިދާޅުވި އެވެ.
މިއަދުގެ ނޫސްވެރިންގެ ބައްދަލުވުމުގައި ވާހަކަދައްކަވަމުން ބަންޑާރަ ނައިބު، އަހުމަދު އުޝާމް ވިދާޅުވީ ބީއެމްއެލްއިން މިއަދުގެ ނިންމުން ނިންމުމުގެ ކުރިން ސަރުކާރުގެ އިކޮނޮމިކް ކައުންސިލާ ވެސް ބައްދަލު ކުރި ކަމަށެވެ. ނަމަވެސް އެ ބައްދަލުވުމުގައި ވެސް މިއަދު ބީއެމްއެލުން ނިންމި ގޮތަށް ނިންމަން ލަފަޔެއް ނުދޭ ކަމަށް އުޝާމް ވިދާޅުވި އެވެ.
އޭނާ ވިދާޅުވީ ބީއެމްއެލުން މިއަދު ނިންމި ނިންމުން ބަދަލު ކުރަން ނިންމީ އެ ބޭންކަށް ކުރިމަތިވެފައިވާ ދަތިތަކަށް ހައްލެއް ގުޅިގެން ހައްލު ހޯދައި ދިނުމަށް ސަރުކާރާއި އެމްއެމްއޭއިން މަސައްކަތް ކުރާނެ ކަމުގެ ޔަގީންކަން ދިނުމުން ކަމަށެވެ.
ޑޮލަރު މުއާމަލާތްތަކުގެ ލިމިޓަށް ބީއެމްއެލުން މިއަދު ގެނައި ބަދަލު އުވައިލަން އެ ބޭންކުން ނިންމީ ދާދި ދެންމެއަކު އެވެ. ނިންމުން ބަދަލު ކުރީ އެމްއެމްއޭގެ އިރުޝާދުގެ ދަށުން ކަމަށް ވެސް ބީއެމްއެލުން ބުންޏެވެ.
