ބޭންކް އޮފް މޯލްޑިވްސްގެ ރުފިޔާ ކާޑުތަކުން ކުރެވޭ ޑޮލަރު މުއާމަލާތްތައް އެއްކޮށް ކަނޑާލައި ކުރިން ދޫކޮށްފައިވާ ކްރެޑިޓް ކާޑުތަކުގެ ލިމިޓު 100 ޑޮލަރަށް ކުޑަ ކުރަން ނިންމީ މި ހާލަތަށް ރިއާއަތްކޮށް ކަމަށާއި އެއީ ވަރަށް އުނދަގޫވި ނިންމުމެއް ކަމަށް އެ ބޭންކުގެ ސީއީއޯ، ކާލް ސްޓުމްކެ ވިދާޅުވެއްޖެ އެވެ.

ބީއެމްއެލުން ގެނައި ބަދަލާ ގުޅިގެން އެ ބޭންކުގެ މުވައްޒަފުންނަށް ކާލް ފޮނުއްވި އިންޓާނަލް މެސެޖެއްގައި ވިދާޅުވީ ރުފިޔާ އެކައުންޓުތަކުގައި ހުންނަ ފައިސާ ބޭނުން ކޮށްގެން ރާއްޖެއިން ބޭރަށް މުއާމަލާތު ކުރުމުގައި ކަސްޓަމަރުން އެ ބޭނުން ކުރަނީ އަމިއްލަ ޑޮލަރެއް ނޫން ކަމަށެވެ.

އެގޮތަށް ކުރާ މުއާމަލާތްތަކަށް، ކާޑު ނެޓުވޯކުތަކަށް ބޭންކުން ފައިސާ ދައްކަން ޖެހެނީ ޑޮލަރުން ކަމަށާއި އެގޮތަށް ފައިސާ ދެއްކުމަށް ބޭނުން ކުރާ ޑޮލަރު ހޯދުމަށް ދަތިތަކެއް ހުންނަ ކަމަށް އޭނާ ވިދާޅުވި އެވެ.

"މި ހާލަތުގައި ބޭންކަށް އޮތީ ބޭންކަށް ނުލިބޭ އެއްޗެއް ހޭދަ ނުކުރުމެވެ. މި އަހަރަށް އެކަނި ބަލައިލިޔަސް ކަސްޓަމަރުންގެ އަތުން ގަންނަން 60 މިލިއަން ޑޮލަރު ލިބުނުއިރު، އޭގެ ތިން ގުނަ ބޭންކުން ހޭދަ ކުރަން ޖެހުނެވެ." ކާލްގެ މެސެޖުގައި ވިދާޅުވި އެވެ.

ބޭންކުގެ ނިންމުމަކީ ކަސްޓަމަރުންނަށް ދަތިތަކެއް ކުރިމަތިވާނެ ނިންމުމަކަށް ވާތީ އެއީ ބޭންކަށް ނިންމަން އުނދަގޫވި ނިންމުމެއް ކަމަށް ކާލް ވިދާޅުވި އެވެ.

"ބޭންކުގައި ނެތް އެއްޗެއް ބޭންކަށް ނުވިއްކޭނެ، ކަސްޓަމަރުން ބީއެމްއެލް ނޫން އެހެން ފަރާތްތަކަށް ބޭރު ފައިސާ ވިއްކަމުންދާހާ ހިނދަކު ކަސްޓަމަރުންނަށް ވިއްކާނެ ޑޮލަރެއް ބޭންކުގައި ނުހުންނާނެއެވެ." ކާލް ވިދާޅުވި އެވެ.

ކާޑު ލިމިޓުތަކަށް ގެނައި ބަދަލުތައް

• މިހާރު ދޫކޮށްފައިވާ ޑެބިޓް ކާޑުތައް: ކާޑުގެ ޕްރައިމަރީ އެކައުންޓް ރުފިޔާ އެކައުންޓުގެ ގޮތުގައި ކަނޑައަޅާފައިވާނަމަ ރާއްޖޭން ބޭރުގެ މުއާމަލާތް ކުރުމަށް އެއްވެސް އަދަދެއް ނުލިބޭނެ,
• މިއަދުން ފެށިގެން އަލަށް ދޫކުރާ ޑެބިޓް އަދި ކްރެޑިޓް ކާޑުތައް: ކާޑުގެ ޕްރައިމަރީ އެކައުންޓް ރުފިޔާ އެކައުންޓުގެ ގޮތުގައި ކަނޑައަޅާފައިވާނަމަ ރާއްޖޭން ބޭރުގެ މުއާމަލާތް ކުރުމަށް އެއްވެސް އަދަދެއް ނުލިބޭނެ,
• މިހާރު ދޫކޮށްފައިވާ ސްޓޭންޑަރޑް އަދި ގޯލްޑް ކްރެޑިޓް ކާޑުތައް: މަހެއްގެ މައްޗަށް ކުރެވޭ ރާއްޖޭން ބޭރުގެ މުއާމަލާތްތައް 100 ޑޮލަރަށް ދަށްކުރުމެވެ.

މި ބަދަލުތައް ގެނައީ ބޭންކަށް ޑޮލަރު ލިބުން ދަތިވެ ގަންނަން ލިބޭ ޑޮލަރަށް ވުރެ އިތުރަށް ބޭންކުން ވެސް ޑޮލަރު ހޭދަކުރަން ޖެހުމުގެ ސަބަބުންނެވެ.

ތަފާސްހިސާބަށް ބަލާއިރު ކާޑުތައް ބޭނުންކޮށްގެން މައިގަނޑުކޮށް ކުރާ ދަތުރުތަކާއި އޮންލައިން ވިޔާފާރިތަކަށް ވުރެ އިގްތިސާދީ މުހިންމު ހަރަކާތްތަކަށް ބޭންކުން ހޭދަކުރާ ބޭރު ފައިސާގެ މިންވަރު 75 ޕަސެންޓު ދަށް ކަމަށް ވެސް ބޭންކުން ބުނެފައިވެ އެވެ.

ގައުމުގެ މާލީ ހާލަތު ދަށަށް ދިޔުމާއި އެ ނޫން ވެސް އިތުރު ބައެއް ސަބަބުތަކާ ހުރެ، ޑޮލަރުގެ އަގު އުފެލުމުން ގޮސް ކަޅު ބާޒާރުގައި ޑޮލަރެއްގެ އަގު މިހާރު ހުރީ 18.50 ގަ އެވެ. ވިއްކާ އަދަދަށްވުރެ ޑޮލަރު ގަންނަން ލިބޭ އަދަދު މަދުވުމުގެ ސަބަބުން "އުނދަގޫ ނިންމުންތަކެއް" ނިންމަން ޖެހިދާނެ ކަމަށް ބީއެމްއެލްގެ ސީއީއޯ ކާލް ސްޓުމްކެ މީގެ ކުރިން ވިދާޅުވެފައިވެ އެވެ.