ޑޮލަރު ލިބުން ދަތިވެ، ރުފިޔާ ކާޑުތަކުން ކުރެވޭ ޑޮލަރު މުއާމަލާތްތައް އެއްކޮށް ކަނޑާލައި ކުރިން ދޫކޮށްފައިވާ ކްރެޑިޓް ކާޑުތަކުގެ ލިމިޓު 100 ޑޮލަރަށް ކުޑަކުރަން ނިންމި ނިންމުމާއެކު ސަރުކާރުގެ އޮފިޝަލުންނާއި ޕީއެންސީގެ އެކްޓިވިސްޓުން ދައުލަތުގެ ބޭންކު، ބޭންކު އޮފް މޯލްޑިވްސްއަށް ފާޑުކިޔަން ފަށައިފި އެވެ.
ބީއެމްއެލް އިން މި ނިންމުން އިއުލާނުކުރީ މިއަދު އެވެ. އެއާއެކު ގިނަބަޔަކު ދަނީ ސަރުކާރަށާއި ބޭންކަށް ފާޑުކިޔަމުންނެވެ. ނަމަވެސް, ސަރުކާރުގެ އިސް އޮފިޝަލުންނާއި ޕީއެންސީގެ މެންބަރުން ސޯޝަލް މީޑިއާގައި ލިޔަމުންދަނީ، ބޭންކުން އެގޮތަށް ނިންމީ ސަރުކާރަށް އެންގުމެއް ނެތި ކަމަށެވެ.
ނިންމުން އިއުލާނު ކުރުމަށްފަހު، ސަރުކާރުން ވަނީ މަރުކަޒީ ބޭންކު އެމްއެމްއޭގެ ގަވަރުނަރު އަހުމަދު މުނައްވަރާއި ބީއެމްއެލްގެ ސީއީއޯ، ކާލް ސްޓުމްކެ ރައީސް އޮފީހަށް ގެންގޮސް ބައްދަލުވުމެއް ބާއްވާފަ އެވެ.
އެގޮތުން، ބީއެމްއެލްގެ ބޯޑުގައި ތިބީ އިދިކޮޅު އެމްޑީޕީއަށް ވާގިވެރިވާ ނާގާބިލު މީހުން ކަމަށާއި އެ މީހުން މިހާރުން މިހާރަށް އިސްތިއުފާ ދޭން ޖެހޭ ކަމަށް ސަސްޕެންޝަނުގައި ހުރި ޔޫތު މިނިސްޓްރީގެ ޑެޕިއުޓީ މިނިސްޓަރު، މަރިޔަމް ޝިއުނާ ލިޔެފައިވެ އެވެ.
"ސަރުކާރާ މަޝްވަރާ ކޮށްގެން ނޫނީ ރައްޔިތުންނަށް އަސަރުކުރާ މިފަދަ މުހިންމު ނިންމުންތަކެއް ނުނިންމޭނެ. ބޭންކް އޮފް މޯލްޑިވްސް އާއި ދޭތެރޭ ދިވެހިންގެ ކަންބޮޑުވުންތައް އޮތީ މިއަދަކު އެކަންޏެއް ނޫން،" އޭނާ ލިޔެފައިވެ އެވެ.
އެ ނިންމުން ނިންމާފައި ވަނީ ރައީސް ޑރ. މުހައްމަދު މުއިއްޒުއަށް އެންގުމެއް ނެތި ކަމަށް ބުނެ ބައެއް މަޖިލިސް މެންބަރުން ވެސް ގެންދަވަނީ ޓްވީޓު ކުރައްވަމުންނެވެ.
އޭގެއިތުރުން ވެސް ދައުލަތުގެ އެކި މަގާމުތަކުގައި ތިބި މީހުން ދަނީ ބީއެމްއެލް ފާޑުކިޔުން އަމާޒުކުރަމުންނެވެ. މައިގަނޑު ގޮތެއްގައި ވެރިކަންކުރާ ޕީއެންސީގެ އެކްޓިވިސްޓުން ދަނީ ބީއެމްއެލްގެ ނިންމުމަކީ ސިޔާސީ މަގުސަދެއްގައި އިދިކޮޅަށް ފައިދާވާނެ ގޮތަށް ނިންމި ނިންމުމެއް ގޮތުގައި ސިފަކުރަމުންނެވެ.
އަދި، މި ހާލަތަށް ގައުމު ދިޔައީ ނިމިދިޔަ އެމްޑީޕީ ސަރުކާރުގެ ސަބަބުން ކަމަށްވެސް ތަކުރާރުކޮށް، ސަރުކާރުގެ ސަޕޯޓަރުން ދަނީ ބުނަމުންނެވެ.
ބީއެމްއެލްގެ 50.08 ޕަސެންޓު ހިއްސާ އޮންނަ މެޖޯރިޓީ ހިއްސާދާރަކީ ސަރުކާރެވެ. ސަރުކާރުގެ ކުންފުނި އެމްޓީސީސީއަކީ ވެސް ބީއެމްއެލްގެ 4.07 ޕަސެންޓު ހިއްސާދާރެކެވެ.
