މޯލްޑިވްސް ސިވިލް އޭވިއޭޝަން އޮތޯރިޓީގެ ދަށުގައިވާ "ސިވިލް އޭވިއޭޝަން ފަންޑް" އަށް ލިބެން ޖެހޭ ގިނަ އަދަދެއްގެ ފައިސާ ނުލިބިވާ މައްސަލައިގައި، އެޓާނީ ޖެނެރަލް އޮފީހާ ހަވާލުކޮށްގެން އެ ފައިސާ ހޯދަން މާލިއްޔަތު ކޮމިޓީން ނިންމައިފި އެވެ.
ރައްޔިތުންގެ މަޖިލީހުގެ މާލިއްޔަތު ކޮމިޓީން މޯލްޑިވްސް ސިވިލް އޭވިއޭޝަން އޮތޯރިޓީގެ އޮޑިޓް ރިޕޯޓުތައް ދިރާސާކޮށް ނިންމިގޮތުގެ ރިޕޯޓުގައި ވަނީ އެ އޮތޯރިޓީއަށް 2012 އިން 2014 ވަނަ އަހަރަށް ލިބެންޖެހޭ 78.9 މިލިއަން ރުފިޔާ ނުލިބިވާ ކަމަށެވެ.
"2012 އިން 2014 ވަނަ އަހަރަގެ ނިޔަލަށް ފަންޑަށް ލިބެންޖެހޭ 119.1 މިލިއަން ރުފިޔާގެ ތެރެއިން އެ އޮތޯރިޓީއަށް ލިބި ހަރަދުކޮށްފައިވަނީ 40.1 މިލިއަން ރުފިޔާ، ބާކީ ލިބެންޖެހޭ 78.9 މިލިއަން ރުފިޔާ އެ ފަންޑަށް ލިބިފައިނުވޭ" އެ ރިޕޯޓުގައިވެ އެވެ.
ސިވިލް އޭވިއޭޝަން ގާނޫނުގައި އޮންނަނީ ރާއްޖޭން ބޭރަށް ފުރާ ފަސިންޖަރުންގެ އަތުން އެއާޕޯޓު ސާވިސް ޗާޖް ނެގުމާ ބެހޭ ގާނޫނުގެ ދަށުން ނެގޭ ފައިސާގެ ތެރެއިން 2 (ދޭއް) އެމެރިކާ ޑޮލަރަކީ ސިވިލް އޭވިއޭޝަން ފަންޑަށް ލިބޭ ފައިސާ ކަމަށެވެ.
އެއާޕޯޓުން ފުރާ ޕަސިންޖަރުން އަތުން ޓެކުހާއި ފީތައް ނަގަން ފެށި ހިސާބުން އެ ގާނޫނު ވަނީ އުވާލާފަ އެވެ. ނުލިބިވާ ފައިސާއަކީ އެ ގާނޫނު އުވާލުމާ ހަމައަށް ސިވިލް އޭވިއޭޝަނަށް ލިބެން ޖެހޭ ފައިސާ އެވެ.
ގާނޫނު އުވާލުމާއެކީ ކުރިމަތިވާ އަނެއް މައްސަލައަކީ އެ ގާނޫނު އުވާލުމާއެކީ ސިވިލް އޭވިއޭޝަން ފަންޑަށް ފައިސާ ނުލިބޭ މައްސަލަ އެވެ.
މިކަން ހައްލުކުރަން ގާނޫނަށް ބަދަލު ގެނައުމުގެ މަސައްްކަތް އެ އޮތޯރިޓީން ފަށައި، ބިލުގެ ޑްރާފްޓަށް އެޓާނީ ޖެނެރަލްގެ އޮފީހުުގެ ލަފައަށް އެދިފައިވާނެ ކަމަށް އެ އޮތޯރިޓީން މާލިއްޔަތު ކޮމިޓީއަށް ފޮނުވި ސިޓީއެއްގައި ބުނެފައިވެ އެވެ.
