ރައީސް ޑރ. މުހައްމަދު މުއިއްޒަށް ރިޔާސީ ޓިކެޓު ހޯދައި ދިނުމަށް އެންމެ ބޮޑަށް މަސައްކަތް ކުރެއްވި، އަދި އެ މަނިކުފާނުގެ އެންމެ އަރިސް ބޭފުޅެއްގެ ގޮތުގައި ހުންނެވި ރައީސް އޮފީހުގެ މިނިސްޓަރު، އާދަމް ރަމީޒު މަގާމުން ވަކިކުރިކަން އިއްޔެ ރިޕޯޓުކުރި އެވެ.
އަދަދު ނޫހަށް ކަށަވަރުވެފައިވާ ގޮތުގައި ރަމީޒު ވަޒީފާއިން ވަކިކުރީ ބުދަ ދުވަހު އެވެ. ރައީސް އޮފީހުގެ ވެބްސައިޓުން ރަމީޒުގެ ފޮޓޯ ވަނީ ނަގައިފަ އެވެ. މިކަމާ ގުޅޭ ގޮތުން ރައީސް އޮފީހުގެ ރަސްމީ ބަހެއް ނުލިބުނެވެ.
މިނިސްޓަރެއްގެ ފެންވަރުގައި ހުންނެވި ބޭފުޅަކު ރައީސް މުއިއްޒު ވަކިކުރި މިއީ ފުރަތަމަ ފަހަރެވެ.
ރައީސް އޮފީހުން ބަލަމުންދާ މައްސަލައަކާ ގުޅިގެން މިދިޔަ ޖޫން 27، އިން ފެށިގެން ރަމީޒު ހުރީ ސަސްޕެންޝަނުގަ އެވެ. ނަމަވެސް އޭނާގެ ބަލަމުން ދިޔައީ ކޮން މައްސަލައެއް ކަމެއް ސަރުކާރުން ހާމައެއް ނުކުރެ އެވެ.
ރައީސް މުއިއްޒަށް ރިޔާސީ ޓިކެޓު ހޯދައި ދިނުމަށް އެންމެ ބޮޑަށް މަސައްކަތް ކުރެއްވީ ރަމީޒެވެ. ޕީޕީއެމްއިން ރަމީޒު ވަކިކުރީ ވެސް ރައީސް މުއިއްޒަށް ޓިކެޓު ހޯދައި ދިނުމަށް ސިއްރިޔާތުގައި މަސައްކަތް ކުރަމުން ދިޔަ ކަމަށް ތުހުމަތުކޮށްފަ އެވެ.
ރައީސް މުއިއްޒުގެ "ކަނާތުގެ ގޮތުގައި" ފެނިގެން ދިޔަ ރަމީޒުއާ އޮތް ގުޅުން ދުރުކަން ފާހަގަ ވެގެން ދިޔައީ ނިމިގެން ދިޔައީ ރައްޔިތުންގެ މަޖިލީހުގެ އިންތިހާބުގެ ވަކި ހިސާބުންނެވެ. އެ އިންތިހާބުގެ ތެރޭގައި ރައީސް މުއިއްޒުގެ އަރިހުގައި ދަތުރުތަކުގައި ވެސް، އަދި ބައެއް ކެންޑިޑޭޓުންގެ ކެމްޕޭނުގައި ވެސް ރަމީޒު ބައިވެރިވެވަޑައިގަތެވެ.
ރައީސް މުއިއްޒު އާއި ރަމީޒުގެ ގުޅުން ގާތް ވެގެން ދިޔައީ ސިޓީ ކައުންސިލްގެ މޭޔަރަކަށް ހުންނެވި ދުވަސްވަރު އެވެ. އޭރު ސިޓީ ކައުންސިލުގެ އެންމެ ބާރުގަދަ މެންބަރަކަށް ވެސް ހުންނެވީ ރަމީޒު އެވެ. އަދި މުހިއްމު ކޮމިޓީތައް ބެލެހެއްޓުން ހަވާލުކޮށްފައި އޮތީ ވެސް އޭނާއާ އެވެ. ނަމަވެސް، ބާރު ލިބިވަޑައިގަތުމާއެކު ފެނިގެން މިދިޔައީ ރަމީދު ދުރުކޮށްލި ތަނެވެ. ސަބަބެއް، ހާމައެއް ނުކުރެ އެވެ. ބަލަމުން ދިޔައީ ކޮން މައްސަލައެއް ކަމެއް ވެސް ނުބުނެ އެވެ.
