ޖެންޑާ މިނިސްޓްރީގެ ކުރީގެ ސްޓޭޓް މިނިސްޓަރު ޒިފްލީނާ ހަސަން 3.5 މިލިއަން ރުފިޔާއަށް ފުލެޓެއް ބައްލަވައިގެން މައްސަލާގައި އޭނާގެ މައްޗަށް ކޮރަޕްޝަނުގެ ދައުވާ ކުރުމާ މެދު ގޮތެއް ނިންމުމަށް އެ މައްސަަލަ ބެލި އެންޓި ކޮރަޕްޝަން ކޮމިޝަން (އޭސީސީ) އިން ޕީޖީ އޮފީހަށް ފޮނުވައިފި އެވެ.
އާންމު ފަރާތަކުން މި މައްސަލަ ފުރަތަމަ ހުށަހަޅާފައިވަނީ ފުލުހުންނަށެވެ. ނަމަވެސް, ކޮރަޕްޝަންގެ މައްސަލަތައް ތަހުގީގު ކުރުމުގެ އިހުތިސޯސް އޮންނަނީ އޭސީސީއަށް ކަމަށް ވާތީ ފުލުހުން އެ މައްސަލަ އެ ކޮމިޝަނަށް ހުށެހެޅި އެވެ.
މައްސަލަ ހުށެހެޅިތާ މަސް ދުވަހުގެ ތެރޭގައި ތަހުގީގު ނިންމާ ކޮރަޕްޝަނުގެ ދައުވާ ކުރުމާ މެދު ގޮތެއް ނިންމުމަށް ޕީޖީ އޮފީހަށް ފޮނުވާފައިވާކަން، އޭސީސީގެ މީޑިއާ އޮފިޝަލް ހަސަން މަނިކު "އަދަދު" ކަށަވަރުކޮށްދެއްވި އެވެ.
ނަމަވެސް މިވަގުތު ތަހުގީގުގެ އެއްވެސް ތަފުސީލެއް ދެވެން ނެތް ކަމަށް އޭނާ ވިދާޅުވި އެވެ. މި މައްސަލަ ހުށަހެޅީ ޖުލައި 14، ގަ އެވެ.
މި މައްސަލަ ފެންމަތިވީ ފައިސާ ދެއްކުމުން ފުލެޓުގެ މިލްކުވެރިކަން ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން ޒިފްލީނާގެ ނަން މައްޗަށް ބަދަލުކުރަން ސިވިލް ކޯޓުން ކުރި ހުކުމާ ގުޅިގެންނެވެ. އެއާއެކު މި ސަރުކާރުގެ ގިނަ އޮފިޝަލުންނާއި އާންމުން ދިޔައީ މި މައްސަލަ ބަލަން ޖެހޭނެ ކަމަށް ސޯޝަލް މީޑިއާގައި ބުނަމުންނެވެ.
ސިވިލް ކޯޓުގެ ހުކުމުން އެނގޭ ގޮތުން ޒިފްލީނާ 3.5 މިލިއަން ރުފިޔާއަށް ބައްލަވައިގެންނެވީ 1200 އަކަ ފޫޓުގެ ފުލެޓެކެވެ.
އެމްޑީޕީގެ އެކި މަގާމުތައް މީގެ ކުރިން އަދާކުރެއްވި ޒިފްލީނާއަށް ނިމިދިޔަ އެ ޕާޓީގެ ސަރުކާރުގައި ސްޓޭޓް މިނިސްޓަރުކަން ދިނީ 2019 ގަ އެވެ. އެއަށްފަހު މި އަހަރު ބޭއްވި ރައްޔިތުންގެ މަޖިލީހުގެ އިންތިހާބުގައި އޭނާ ވަނީ އެމްޑީޕީގެ ޓިކެޓުގައި ވާދަކުރައްވާފަ އެވެ. ނަމަވެސް, އެ ޕާޓީއަށް ބޮޑު ނާކާމިޔާބީއެއް ކުރިމަތިވި އެ އިންތިހާބުގައި ޒިފްލީނާ ވެސް ކާމިޔާބު ލިބިފައި ނުވެ އެވެ.
