އަވަށްޓެރި އިންޑިއާގެ 76 ވަނަ މިނިވަންދުވަހާ ގުޅިގެން އެ ގައުމުގެ ވެރިންނާއި ރައްޔިތުންނަށް ރައީސް ޑރ. މުހައްމަދު މުއިއްޒު މަރުހަބާ ވިދާޅުވެއްޖެ އެވެ.
ސޯޝަލް މީޑިއާގައި ކުރެއްވި ޕޯސްޓެއްގައި ރައީސް މުއިއްޒު ވިދާޅުވީ، އިންޑިއާއެކު އޮތް ޒަމާންވީ ގުޅުމާއެކު ރާއްޖެއަށާއި މި ސަރަހައްދަށް ލިބުނީ އަމާންކަމާއި ތަރައްގީ ކަމަށެވެ.
"އިންޑިއާގެ މިނިވަން ދުވަހުގެ މުނާސަބަތުގައި އެ ގައުމުގެ ރައީސް މުރްމޫ އަދި ބޮޑުވަޒީރު ނަރެންދުރަ މޯދީއަށާއި އެ ގައުމުގެ އެންމެހާ ރައްޔިތުންނަށް މަރުހަބާ ދަންނަވަން،" އެކްސްގައި ކުރެއްވި ޕޯސްޓެއްގައި އެމަނިކުފާނު ވިދާޅުވި އެވެ.
މި ވެރިކަމުގެ ކުރީކޮޅު އިންޑިއާއާއެކު އޮތް ޒަމާންވީ ގުޅުމަށް ބުރޫ އެރި އެވެ. ނަމަވެސް ރައީސް މިއަދު ވިދާޅުވީ މުސްތަގުބަލުގައި ދެ ގައުމުގެ ގުޅުން އިތުރަށް ބަދަހިވެގެންދާނެ ކަމަށެވެ.
ރައީސް މުއިއްޒުގެ ސަރުކާރުގެ ފުރަތަމަ ދުވަހުން ފެށިގެން އިންޑިއާއާއެކު އޮތް ގުޅުން ދިޔައީ ގޯސްވަމުންނެވެ.
އެގޮތުން ރިޔާސީ އިންތިހާބުގެ ކުރިން އިދިކޮޅުގައި އޮތް އިރު ޕީއެންސީން ކުރިއަށް ގެންދިޔަ އިންޑިއާ އައުޓް ކެމްޕޭނާއި، ފުރަތަމަ ރަސްމީ ދަތުރުގައި އެ ގައުމަށް ވަޑައިނުގަތުމާއި، އިންޑިއާގެ ބޮޑުވަޒީރަށް ތިން ނައިބު ވަޒީރަކު ހަޖޫޖެހުން ވެގެންދިޔައީ ގުޅުން ގޯސްވި ބައެއް ސަބަބުތަކަށެވެ.
އިންޑިއާއާ އެންމެ ވާދަވެރި ޗައިނާއަށް ކުރެއްވި ދަތުރަށްފަހު ސީދާ ރައީސް މުއިއްޒުވެސް އިންޑިއާއަށް ބަހުގެ ހަމަލާތަކެއް ދެއްވި އެވެ.
ނަމަވެސް، ސަރުކާރާއި ރައީސް މިހާރު ގެންދަނީ އިންޑިއާއާއެކު ގުޅުން ބަދަހިކުރަން މަސައްކަތް ކުރަމުންނެވެ. މިދިޔަ ހަފުތާ އިންޑިއާގެ އެކްސްޓާނަލް އެފެއާޒް މިނިސްޓަރު ޑރ. ސުބްރަމާނިއަމް ޖައިޝަންކަރު ރާއްޖެއަށް ކުރެއްވި ރަސްމީ ދަތުރުގެ ތެރެއިންވެސް މިކަން ފެނިގެންދިޔަ އެވެ.
އޭނާއާ ބައްދަލުކުރުމަށްފަހު ރައީސް ވިދާޅުވީ، އިންޑިއާއާއެކު އޮންނަ ޒަމާންވީ ގާތް ގުޅުން އިތުރަށް ބަދަހިކުރަން މި ސަރުކާރުން ފުރިހަމައަށް އެއްބާރުލުން ދޭނެ ކަމަށެވެ.
"ކުރިއަށް އޮތް އަހަރުތަކުގައި ރާއްޖެއާއި އިންޑިއާގެ ގުޅުން އިތުރަށް ބަދަހިވެ ވަރުގަދަވާތަން ދެކެން އަޅުގަނޑު ބޭނުންވޭ. އަޅުގަނޑު ދެ ގައުމަށްވެސް ކުރިއަށް އޮތްތަނުގައި އެދެނީ ސުލްހަވެރިކަމާއި، އަމާންކަން އަދި ކުރިއެރުން،" އޮގަސްޓު 10، ގައި ރައީސް ވިދާޅުވި އެވެ.
ޖެހިގެން އައި ދުވަހު ރައީސް ވަނީ ޕީއެންސީ-ޕީޕީއެމުން އިސްނަގައިގެން ފެށި އިންޑިއާ އައުޓް ހަރަކާތް މި ވެރިކަމުގައި ކުރިއަށް ގެންދިޔުމުގެ ފުރުސަތު ދެއްވާނަންތޯ ސުވާލު ކުރުމުން، ދިވެހި ސަރުކާރުގެ ހާރިޖީ ސިޔާސަތާ ހިލާފު އެއްވެސް ކަމެއް ހިންގުމުގެ ޖާގަ ނުދެއްވާނެ ކަމަށްވެސް ވިދާޅުވެފަ އެވެ.
