ޗައިނާއިން ބޭނުންވަނީ ދިވެހިރާއްޖެއިން ހަމައެކަނި އެގައުމާއެކު އެކަނި ގުޅުން ބަދަހި ކުރަން ނޫން ކަމަށާއި ރާއްޖެއިން އިންޑިއާއާއެކު ގުޅުން ބަދަހި ކުރުމަކީ ޗައިނާއަށް މައްސަލައެއް ނޫން ކަމަށް އެ ގައުމުގެ ފޮރިން ޕޮލިސީ ތަޖުރިބާކާރަކު އާދީއްތަ ދުވަހު ބުނެފި އެވެ.
ރާއްޖެ/ޗައިނާ ގުޅުމުގެ ސަބަބުން މި ސަރަހައްދުގައި އިންޑިއާގެ ބާރު ކުޑަވާނެ ކަމަށް އިންޑިއާއިން ދެކުނު ނަމަވެސް ޗައިނާއިން ދެކެނީ ރާއްޖެ އާއި ޗައިނާއާ ދެމެދު އޮންނަ ގުޅުމަކީ "އާދައިގެ" ގުޅުމެއްގެ ގޮތުގައި ކަމަށް ސިޗުއާން އިންޓަނޭޝަނަލް ސްޓަޑީޒް ޔުނިވާސިޓީގެ ޕްރޮފެސަރު ލޮންގް ސީންޗަން ވިދާޅުވި އެވެ.
ޗައިނާ ސަރުކާރުގެ ހަބަރުތައް ގެނެސްދޭ ގްލޯބަލް ޓައިމްސް އަށް ދެއްވި އިންޓަވިއުއެއްގައި ސީންޗަން އިތުރަށް ވިދާޅުވީ، ރާއްޖެއިން އިންޑިއާއާއެކު ގުޅުން ބަދަހި ކުރަން ޗައިނާއިން އެދޭ ކަމަށާއި ސައުތު އޭޝިޔާގެ ކުދި ގައުމުތަކުން ވަކި ގައުމުތަކަކާއެކު އެކަނި ގުޅުން ބަދަހި ކުރަން ބާރު އެޅުމަކީ ޗައިނާގެ ޕޮލިސީއެއް ނޫން ކަމަށެވެ.
އިންޑިއާގެ އެކްސްޓާނަލް އެފެއާޒް މިނިސްޓަރު ޑރ. ސުބްރަމާނިއަމް ޖައިޝަންކަރު މިދިޔަ ހުކުރު ދުވަހު ރާއްޖެ ވަޑައިގަތީ ރާއްޖެ/ޗައިނާ ގުޅުން ވެސް އެޖެންޑާގައި ހިމަނައިގެން ކަމަށް ބައެއް އިންޑިއާ ނޫސްތަކުން ރިޕޯޓުކޮށްފައިވާ ކަމަށް ގްލޯބަލް ޓައިމްސް އިން ބުނެ އެވެ.
ރައީސް ޑރ. މުހައްމަދު މުއިއްޒު ވެރިކަމަށް ވަޑައިގެންނެވި ފަހުން ރާއްޖެ އާއި އިންޑިއާއާ ދެމެދު އޮތް ގުޅުން ގޯސްވެފައިވާކަން ވެސް އެ ނޫހުން ފާހަގަ ކުރި އެވެ. އަދި އިންޑިއާއިން ހަދިޔާކޮށްފައިވާ ތިން އޭވިއޭޝަން ޕްލެޓްފޯމް އޮޕަރޭޓު ކުރާ އެ ގައުމުގެ ސިފައިން ރާއްޖެއިން ބޭރު ކުރުމުން އިންޑިއާއިން "ލަދުގަތް" ކަމަށް ވެސް ގްލޯބަލް ޓައިމްސް އިން ބުންޏެވެ.
އޭގެ އިތުރުން، އިންޑިއާއިން ރާއްޖެއާއެކު އޮގް ގުޅުން ބަދަހި ކުރަން ވަރަށް ބޮޑަށް ބޭނުންވާ ކަމަށާއި މިފަހުން ގުޅުމަށް އެރި ލޮޅުމުގެ ތެރެއިން ރާއްޖެ ދުރުކޮށްލައިފި ނަމަ ޗައިނާ އާއި ރާއްޖެ މާ ބޮޑަށް ގާތްވުމުގެ ފުރުސަތު އޮންނާނެކަން އިންޑިއާއިން ގަބޫލު ކުރާ ކަމަށް ވެސް އެ ނޫހުގައި ބުނެފައި އޮތެވެ.
