މި ނިމުނު ރިޔާސީ ދައުރުގައި ހިންގި ބިންވެރިޔާ ސްކީމްގެ ދަށުން މާލޭ މީހުނަށް މާލެ ސަރަހައްދުން ގޯތި ދޫކުރި ގޮތަކީ މި ފަހުގެ ތާރީހެއްގައި ހިންގި އެންމެ ބޮޑު ހިޔާނާތް ކަމަށް މިހާރު ވެރިކަންކުރާ ޕީއެންސީގެ ޕާލިމެންޓްރީ ގްރޫޕްގެ ލީޑާޝިޕުން މިއަދު ބޭއްވި ނޫސްވެރިންގެ ބައްދަލުވުމެއްގައި ބުނެފި އެވެ.
ރައްޔިތުންގެ މަޖިލީހުގެ އިދާރާގައި ބޭއްވި އެ ބައްދަލުވުމުގައި ޕީއެންސީގެ ޕާލިމެންޓްރީ ގްރޫޕްގެ ލީޑަރު އިބްރާހީމް ފަލާހު ވިދާޅުވީ ބިންވެރިޔާ ސްކީމްގެ ނަމުގައި މިދިޔަ ސަރުކާރުގައި ކުރިހާ ވެސް ކަމަކީ ގޯތި ލިބޭ މީހުންގެ ލިސްޓެއް އެކުލަވާލުން އެކަނި ކަމަށެވެ. ގޯތި ދޫކޮށްފައި ވެސް ނެތް ކަމަށް ވިދާޅުވި އެވެ.
"ރައްޔިތުންގެ ޓެކްސް ފައިސާއިން ވަރަށް ހަރަދު ބޮޑުކޮށް ހިއްކާފައިވާ ބިންތަކުން ހަމަ ރިޔާސީ އިންތިހާބަށް ހަމަ މަސް ދުވަހަށް ވެފައި ވަނިކޮށް ހުޅުމާލެއާއި ގުޅީފަޅާއި ގިރާވަރުފަޅުން އެބަ އޮތް ޖުމުލަ 9،100 ގޯތި ދޫކޮށްފަ، ގޯތި ލިސްޓެއް ހަދާފައި،" ފަލާހު ވިދާޅުވި އެވެ.
"ސަރުކާރަކުން އެ އެއްޗެއް ބަހާލާއިރުގައި އަޅުގަނޑު ގަބޫލު ކުރާ ގޮތުގައި ޒިންމާދާރު ސަރުކާރުތަކުން އަމަލުކުރަން ޖެހޭ އުސޫލުތަކާއި ހަމަތަކާ ހިލާފަށް، އަޅުގަނޑު ދަންނަވާނީ މި ފަހުގެ ތާރީހެއްގައި ހިންގި އެންމެ ބޮޑު ހިޔާނާތުގެ ގޮތުގައި ސިފަކުރަނީ،" ފަލާހު ވިދާޅުވި އެވެ.
އޭނާ ވިދާޅުވި ގޮތުގައި ހުޅުމާލެއިން ދޫކުރި ގޯތިތަކުގެ އަގު އެކަނި ވެސް 5.4 ބިލިއަން ރުފިޔާ އަރަ އެވެ. މާލޭގެ މީހުނަށް އެކަނި ގޯތި ދޫކުރަން ނިންމި އިރު މާލޭން އެކަނި ގޯތި ބޭނުންވާ އެތައް މީހުން އަދިވެސް އެބަ ތިބި ކަން އޭނާ ފާހަގަ ކުރެއްވި އެވެ.
ބިންވެރިޔާ ސްކީމްގެ މައްސަލާގައި ޕީއެންސީގެ ޕާލިމެންޓްރީ ގްރޫޕްގެ ލީޑާޝިޕުން ނޫސްވެރިންގެ ބައްދަލުވުމެއް މިއަދު ބޭއްވީ މި ސަރުކާރު އައިސް ގޯތި ދޫކުރުން ލަސްވާތީ އެ ކަމާ ގުޅިގެން ހައުސިން މިނިސްޓަރު ޑރ. އަލީ ހައިދަރު މިއަދު މަޖިލީހުގައި ދެއްވި ޖަވާބުތަކަށް އިދިކޮޅު އެމްޑީޕީން ނުރުހުން ފާޅުކޮށްފައިވަނިކޮށެވެ.
ބިންވެރިޔާ ސްކީމުގެ ދަށުން މިދިޔަ ސަރުކާރުގައި މާލެ ރައްޔިތުންނަށް 9،003 ގޯތި ދޫކުރި އެވެ. ބިންވެރިޔާ ސްކީމުން ދޫކުރި ގޯތިތައް ހުންނަނީ ހުޅުމާލޭ އާއި ގުޅީފަޅާއި ގިރާވަރު ފަޅުންނެވެ. އެއީ ހުޅުމާލެއިން ދޫކުރާ 1351 ގޯއްޗާއި ގުޅީފަޅުން ދޫކުރާ 2219 ގޯއްޗާއި ގިރާވަރުފަޅުން ދޫކުރާ 5433 ގޯއްޗެވެ.
