އިންޑިއާ ސިފައިން ރާއްޖޭގައި ގާއިމުވެ ތިބި ކަމަށް ބުނެ ޕީއެންސީ-ޕީޕީއެމުން އިސްނަގައިގެން ފެށި އިންޑިއާ އައުޓް ހަރަކާތް މި ވެރިކަމުގައި ކުރިއަށް ގެންދިޔުމުގެ ފުރުސަތު ދެއްވާނަންތޯ ސުވާލު ކުރުމުން، ދިވެހި ސަރުކާރުގެ ހާރިޖީ ސިޔާސަތާ ހިލާފު އެއްވެސް ކަމެއް ހިންގުމުގެ ޖާގަ ނުދެއްވާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.
މާލެ ސިޓީ ކައުންސިލާ ބައްދަލު ކުރެއްވުމަށްފަހު ނުކުމެވަޑައިގެން "އަދަދު" އަށް ރައީސް ދެއްވި ހާއްސަ އިންޓަވިއުއެއްގައި ވިދާޅުވީ އެމަނިކުފާނަށް ދިވެހިން ވޯޓު ދިނީ މި ސަރުކާރުގެ ހާރިޖީ ސިޔާސަތު ބަލައިގެންފައި ކަމަށެވެ. އަދި ގައުމު ކުރިއަށް ގެންދާނީ އެ ހާރިޖީ ސިޔާސަތުގެ ދަށުން ކަމަށް ރައީސް ވިދާޅުވި އެވެ.
އެއަށްފަހު ރައީސް ވިދާޅުވީ މި ގައުމަށް ބޭނުންވަނީ ހަމަޖެހުމާއި ތަރައްގީ އާއި ރައްކާތެރިކަން ކަމަށެވެ.
"އެ ތިން ކަންތައް ޔަގީންވާ ގޮތަށް މި ގައުމުގެ ކަންކަން ކުރިއަށް ދާނީ، ކުރިއަށް އޮތް ތަނުގައި، އެއާ ދެކޮޅަށް މި ގައުމުގެ ހަމަޖެހުން ނަގާލަން، މި ގައުމުގެ ތަރައްގީ ހުއްޓުވައިލަން، މި ގައުމުގެ ރައްކާތެރިކަމާއި މިނިވަންކަން ގެއްލޭނެ ގޮތަކަށެއް ދިވެހި ރައްޔިތުން ވެސް ފުރުސަތެއް ނުދޭނެ،" ރައީސް ވިދާޅުވި އެވެ.
ރައީސް ވިދާޅުވީ މި ސަރުކާރުގެ ހާރިޖީ ސިޔާސަތަކީ ހުރިހާ ގައުމަކާ ވެސް ގުޅިގެން ކުރިއަށް ދިޔުން ކަމަށެވެ.
އިންޑިއާ އައުޓް ގަރާރު އުވައިލައްވާނެތޯ ސުވާލު ކުރުމުން ރައީސް ސީދާ ޖަވާބެއް ނުދެއްވި އެވެ. އަދި، އިންޑިއާ އައުޓް ހަރަކާތް ނުހިންގޭނެތޯ ސުވާލު ކުރުމުން ވެސް ޖަވާބު ދެއްވަން އުޒުރުވެވަޑައިގެންނެވި އެވެ.
"އަޅުގަނޑު މި ދެންނެވީ އަޅުގަނޑުގެ، ދިވެހި ސަރުކާރުގެ ސިޔާސަތު، އަޅުގަނޑު މި ދެންނެވީ ސިޔާސަތު، ވަރަށް ސާފުކޮށް ހުރިހާ ސުވާލަކަށް ވެސް ޖަވާބު ދީފިން،" ރައީސް ވިދާޅުވި އެވެ.
އިންޑިއާ އައުޓް ހަރަކާތާ ގުޅޭ ގޮތުން ރައީސް މިފަދައިން ވާހަކަ ދެއްކެވިއިރު، ރާއްޖޭގައި ތިބި އިންޑިއާ ސިފައިން ފޭބި ކަމަށް ގަބޫލު ނުކުރައްވާ ކަމަށާއި އިންޑިއާ އައުޓް ކެމްޕޭނު ކުރިއަށް ގެންދަވާނެ ކަމަށް އެ ކެމްޕޭނުގެ އެއް މޭސްތިރިޔާ، ރައީސް ޔާމީން ވިދާޅުވެފައިވެ އެވެ.
ޔާމީނަށް އިއްވާފައިވާ 11 އަހަރުގެ ޖަލު ހުކުމްގެ އިސްތިއުނާފު މައްސަލާގައި ހައި ކޯޓުން އެ ހުކުމް ބާތިލް ކުރި އަޑުއެހުމަށް ފަހު ހައި ކޯޓު ބޭރުގައި ހުންނަވައި މީޑިއާތަކަށް މައުލޫމާތު ދެއްވަމުން ޔާމީން ވިދާޅުވީ އިންޑިއާ ސިފައިންގެ މައްސަލަ ހައްލު ނުވާ ކަމަށެވެ. އަދި ކުރީ ސަރުކާރުގައި ހިންގި އިންޑިއާ އައުޓް ކެމްޕޭނު ކުރިއަށް ގެންދަވާނެ ކަމަށް ޔާމީން އެދުވަހު ވިދާޅުވި އެެވެ.
އިންޑިއާ އައުޓް ހަރަކާތް ހިންގުމަށްފަހު ވެރިކަމަށް ވަޑައިގެން އިންޑިއާ އައުޓް ގަރާރު ބާތިލު ނުކުރާ މައްސަލައިގައި ވެސް ޔާމީން ފާޑު ވިދާޅުވި އެވެ.
