އިންޑިއާއަށް ދެކޮޅަށް ގެންގުޅުނު ބަސްމަގު ދޫކޮށްލަން މަޖުބޫރުކޮށް، އެ ގައުމުން ރައީސް ޑރ. މުހައްމަދު މުއިއްޒު ސައިޒުކޮށްލައިފި ކަމަށް ކުރީގެ ނައިބު ރައީސް ޑރ. މުހައްމަދު ޖަމީލު އަހުމަދު ވިދާޅުވެއްޖެ އެވެ.
ރަސްމީ ދަތުރެއްގައި އިންޑިއާގެ އެކްސްޓާނަލް އެފެއާޒް މިނިސްޓަރު ސުބްރަމާނިއަމް ޖައިޝަންކަރު ރާއްޖެއަށް ކުރައްވަމުން ގެންދަވާ ދަތުރާ ދިމާކޮށް އެކްސްގައި ކުރެއްވި ޕޯސްޓެއްގައި ޖަމީލު ވިދާޅުވީ، ސިޔާސީ އަގީދާއެއް ނެތި ރައީސް މިއަދު އިންނެވީ "ކުޑަކަކޫ" މައްޗަށް ތިރިވެ ކަމަށެވެ.
"މުއިއްޒު ސައިޒުކޮށް އިންޑިއާގެ ޓާމްސްގައި ބިންމައްޗަށް ގެނައީ. މިއަދު މޮޅު މިވީ އިންޑިއާގެ ޑިޕްލޮމެސީ. ސާބިތުކޮށްދިނީ އިންޑިއާގެ ތަޖުރިބާ. ރައީސަކީ އަދި އެމެޗާ ބޭފުޅެއްކަން އަންގާލަދެއްވީ. ރަތް ރޮނގޭ، ބުލީ ނުކުރެވޭނެއޭ ވިދާޅުވިއިރު، މިއަދު ނާށިގަނޑު ދިއްކޮށް ސަލާން ޖަހަނީ،" ޖަމީލު ލިޔުއްވާފައިވެ އެވެ.
އިދިކޮޅުގައި އޮތްއިރު ޕީއެންސީ ކޯލިޝަނުގެ އިސް ސަފުގައި މަސައްކަތް ކުރެއްވި ޖަމީލު ވިދާޅުވީ މިދިޔަ އަހަރު ބޭއްވި ރިޔާސީ އިންތިހާބުގައި ރައީސް މުއިއްޒަށް ވޯޓުދިން ރައްޔިތުންނަށް ބޭވަފާތެރިވެފައިވާ ކަމަށާއި ރައްޔިތުން ލަދުގަންނަވާލާފައިވާ ކަމަށެވެ.
ޖަމީލަކީ، މި ސަރުކާރުގެ ފުރަތަމަ ހަފުތާގައި ޕީއެންސީ ކޯލިޝަނާ ފެޔަށްޖެހުނު ކުރީގެ ރައީސް އަބްދުﷲ ޔާމީނާއެކު މިހާރު އިދިކޮޅުގައި ހުންނެވި ބޭފުޅެކެވެ.
އޭނާ މިފަދަ ޕޯސްޓެއް ކުރައްވާފައި ވާއިރު، ޖައިޝަންކަރުގެ ދަތުރުގައި ރައީސްގެ އިތުރުން ސަރުކާރުގެ ވަޒީރުންނާ ވަނީ ބައްދަލުކުރައްވާފަ އެވެ. ދެ ގައުމުގެ ދެމެދުގައި ބޭއްވި މަޝްވަރާތަކުގައި އަސްކަރީ ގުޅުން އިތުރަށް ވަރުގަދަކުރަން ވަނީ އެއްބަސްވެފަ އެވެ.
އިންޑިއާގެ އެންމެ ނުފޫޒުގަދަ އެއް ވަޒީރު ރާއްޖެ ވަޑައިގެންފައި މިވަނީ އެ ގައުމާއެކު އޮތް ޒަމާނީ ގުޅުމަށް މި ސަރުކާރުގެ ކުރީކޮޅު އެރި ލޮޅުމުން އަރައިގަތުމަށް ސަރުކާރުން ގިނަ މަސައްކަތްތަކެއް ކުރަމުންދާ ދަނޑިވަޅެއްގަ އެވެ.
އެ ގައުމާއެކު ގުޅުން ގޯސްވީ އިދިކޮޅުގައި ތިބެ ޕީއެންސީން ހިންގި އިންޑިއާ އައުޓް ކެމްޕޭނާއި ވެރިކަމާ ހަވާލުވުމަށްފަހު ރައީސް އިންޑިއާއަށް ރައްދުކޮށް ވިދާޅުވި ގަދަބަސްތަކުގެ ސަބަބުންނެވެ. ސަރުކާރުގެ ތިން ޑެޕިއުޓީ މިނިސްޓަރަކު އިންޑިއާގެ ބޮޑުވަޒީރު މޯދީއަށް ފުރައްސާރަކުރުމަކީ ވެސް ހާރިޖީ ނުތަނަވަސްކަން އިތުރުވި ސަބަބެކެވެ.
