ރައީސް ޔާމީނުގެ ޝަރީއަތްތަކަށް ނުފޫޒު ފޯރުވުމަށް މަސައްކަތް ކުރި މި ސަރުކާރުގެ ވެރިންނާއި ޕީއެންސީގެ އިސް ވެރިންގެ އޯޑިއޯތައް ވަރަށް އަވަހަށް އާންމު ކުރައްވާނެ ކަމަށް ކުރީގެ ރައީސް، ޔާމީން އަބްދުލްގައްޔޫމް ވިދާޅުވެއްޖެ އެވެ.
ޕީޕްލަސް ނެޝަނަލް ފްރަންޓު، ޕީއެންއެފުން ރޭ ބޭއްވި ޖަލްސާގައި ވާހަކަދައްކަވަމުން ޔާމީން ވިދާޅުވީ އެމަނިކުފާނުގެ ޝަރީއަތް ލަސް ކުރަން ނުފޫޒު ފޯރުވުމަށް މި ސަރުކާރުން މަސައްކަތް ކުރި ކަމަށާއި ނުފޫޒު ފޯރުވުމަށް މަސައްކަތް ކުރެއްވީ ކޮންބައެއްކަން ވެސް އެނގިވަޑައިގަންނަވާ ކަމަށެވެ.
"އިރާދަކުރެއްވިއްޔާ މާލަސްތަކެއް ނުވެ ހަމަ އެބަ ނުކުމޭ ކޮންމެވެސް ކަހަލަ އަޑުތަކެއް ޝަރީއަތުގައި އަޅުގަނޑުގެ މައްސަލައިގައި ނުފޫޒު ފޯރުވި މީހުންނާއި ގުޅި މީހުންނާ އެމީހުންގެ އޯޑިއޯ ބައިޓާ އެކީ،" ޔާމީން ވިދާޅުވި އެވެ.
އެމަނިކުފާނުގެ ޝަރީއަތަށް މި ސަރުކާރުން ނުފޫޒު ފޯރުވި ކަމަށް ކުރައްވާ ތުހުމަތުގެ ތަފުސީލު ދެއްވަމުން ޔާމީން ވިދާޅުވީ ހައިކޯޓުގައި މައްސަލަ ކުރިއަށްދިޔައިރު މައްސަލައަށް ނުފޫޒު ފޯރުވި މީހުންނާއި ހައި ކޯޓުގައި މައްސަލަ ލަސްކުރި މީހުންނާއި ހައިކޯޓުގެ ފަނޑިޔާރެއް ފުރުވާލައިގެން އަޔަނުދީ ހިފެހެއްޓި މީހުން ވެސް އެނގިވަޑައިގަންނަވާ ކަމަށެވެ.
"ޕީޖީ އޮފީހުގެ މީހުން ތިން ހަތަރު ޖަލްސާއަށް ގާތްގަނޑަކަށް މަހެއްހާ ދުވަސްވަންދެން މައްސަލަ ނުބެލި ދިޔައީ ޕީޖީ މީހުން ނައިސްގެން، އެކަން ކުރި މީހުން، މި ހުރިހާ އެއްޗެއް އަޅުގަނޑަށް އެނގޭ،" ޔާމީން ވިދާޅުވި އެވެ.
ޔާމީންގެ ޝަރީއަތްތަކަށް މި ސަރުކާރުން ނުފޫޒު ފޯރުވި ކަމަށް ތަކުރާރުކޮށް މީގެ ކުރިން ވެސް އެމަނިކުފާނު ތުހުމަތު ކުރައްވަ އެވެ. ނަމަވެސް ޝަރުއީ ނިޒާމުގެ ތެރެއަށް މި ސަރުކާރުން އަތް ނުބާނާނެ ކަމަށް ރައީސް މުއިއްޒު ވެެރިކަމުގެ ހުވާ ކުރެއްވި ދުވަހު ވިދާޅުވި އެވެ.
އެ ދުވަހު ރައީސް ވިދާޅުވީ "ސަރުކާރުން ޝަރުއީ ދާއިރާއަށް ނުފޫޒު ފޯރުވުން މިހިނދުން މިނދަށް ނިންމުން، އެކަން މި ނިންމީ،" ކަމަށެވެ.
ރައީސް އެ ދުވަހު ވިދާޅުވީ ބާރުތަކުގެ މިނިވަންކަން ކަށަވަރު ކުރުމަށް އިސްކަން ދެއްވާނެ ކަމަށެވެ. ނަމަވެސް އޭގެ މާނައަކީ ދިވެހި ރައްޔިތުންނާއި ދިވެހި ދައުލަތަށް ހިޔާނާތްތެރިވުން ފަދަ ކުށްތައް ކުރާ ފަރާތްތަކާއި މެދު ސަރުކާރުން ލޯ މަރާލުން ނޫންކަމަށް ރައީސް ވިދާޅުވި އެވެ.
މިހާރު ވެރިކަމުގައި ތިއްބެވި ބޭފުޅުން ޔާމީންއާ އެކު އެމަނިކުފާނުގެ ބޭފުޅުންގެ ގޮތުގައި އިދިކޮޅުގައި ތިއްބެވިއިރު، އެންމެ ބޮޑަށް ކުރި ތުހުމަތަކީ ރައީސް ޔާމީނުގެ މައްޗަށް އުފުލާފައިވާ ދައުވާތަކަކީ ސިޔާސީ ދައުވާތަކެއް ކަމަށެވެ. އަދި، އެމަނިކުފާނަކީ މައުސޫމު ބޭފުޅެއް ކަމަށް ތަކުރާރުކޮށް މިހާރު ޕީއެންސީގެ އިސްކޮށް ތިއްބެވި ބޭފުޅުން އޭރު ވިދާޅުވަމުން ގެންދެވި އެވެ.
ނަމަވެސް ވެރިކަން ލިބިވަޑައިގަތުމަށްފަހު، ޕާޓީ ދެފަޅިވުމަށްފަހު މިހާރު އެ ވާހަކައިގެ ރާގު ބަދަލުވެ ޔާމީންގެ އެންމެ އަރިހުގައި ހުންނެވި، އަބްދުއްރަހީމް ވެސް ޔާމީނަށް މީގެ ތިން ރޭ ކުރިން ވަގަށް ގޮވި އެވެ. ޔާމީނުގެ އެކައުންޓުގައި ހުރި ފައިސާއަކީ ކިހިނެއް ލިބުނު ފައިސާއެއްތޯ ރައްޔިތުންނަށް ސާފު ކޮށްދެއްވަންޖެހޭ ކަމަށް ވެސް އަބްދުއްރަހީމް އެރޭ ވިދާޅުވި އެވެ.
