ޖެނުއަރީ މަހު ސަސްޕެންޑު ކުރި ޔޫތު މިނިސްޓަރީގެ ތިން ނައިބު ވަޒީރުން ކަމަށްވާ، މަލްޝާ ޝަރީފާއި މަރިޔަމް ޝިއުނާ އަދި މަހުޒޫމް މާޖިދު ލައްވައި ފާއިތުވި ހަތް މަސްދުވަހު ރަސްމީ އެއްވެސް މަސައްކަތެއް ނުކުރުވައި މުސާރައިގެ ގޮތުގައި ހަ ލައްކައަށް ވުރެ ގިނަ ރުފިޔާ ދައުލަތުން ދީފި އެވެ.
އިންޑިއާގެ ބޮޑުވަޒީރު ނަރެންދުރަ މޯދީއަށް ސޯޝަލް މީޑިއާގައި ފުރައްސާރަކުރި މައްސަލައިގައި އެ ތިން ނައިބު ވަޒީރުން މުއްދަތެއް ނެތް ގޮތަށް ސަސްޕެންޑު ކުރީ މި އަހަރުގެ ޖެނުއަރީ 7، ގަ އެވެ. ނައިބުންތައް ސަސްޕެންޑުކުރީ މައްސަލަ އިތުރަށް ބަލަން ކަމަށް ރައީސް އޮފީހުގެ ކޮމިއުނިކޭޝަން މިނިސްޓަރު، އިބްރާހިމް ހަލީލް އޭރު ވިދާޅުވެފައިވެ އެވެ.
އެ ތިން ބޭފުޅުން ސަސްޕެންޑު ކުރި ފަހުން މި މައްސަލައިގެ އަޕްޑޭޓެއް ސަރުކާރުން ނުދެ އެވެ. ނޫސްވެރިން ސުވާލުކުރުމުން ރައީސް އޮފީހުން އަދިވެސް ދޭ ޖަވާބަކީ އެ މައްސަލަ "ބަލަމުންދާ" ކަމަށެވެ.
މައުލޫމާތު ހޯދައި ލިބިގަތުމުގެ ހައްގުގެ ގާނޫނުގެ ދަށުން އެ ބޭފުޅުންނަށް ދޭ މުސާރައިގެ ތަފުސީލު ހޯދުމަށް މާޗު މަހު "އަދަދު" ނޫހުން ހުށަހެޅުމުން ޔޫތު މިނިސްޓަރީން ދިން ޖަވާބުގައި ސަސްޕެންޑު ކޮށްފައި ހުރި ކޮންމެ ޑެޕިއުޓީ ވަޒީރަކަށް ވެސް ކޮންމެ މަހަކު 31،500ރ. ދޭ ކަމަށް ބުނެފައިވެ އެވެ.
އެ ޖަވާބުގައި ބުނެފައި ވަނީ މާޗު މަހުގެ ނިޔަލަށް ސަސްޕެންޑުގައި ތިބި ޑެޕިއުޓީ މިނިސްޓަރުންނަށް މުސާރައިގެ ގޮތުގައި 283،500ރ. ދައުލަތުން ދީފައިވާ ކަމަށެވެ. އެއީ ކޮންމެ ބޭފުޅަކަށް 94،500ރ. އެވެ.
އޭގެފަހުން ހިނގާދިޔަ ހަތަރު މަސްދުވަހުގެ މުސާރަ އެއް ކޮށްލުމުން ސަސްޕެންޑު ކުރިފަހުން މިއަދާ ހަމައަށް ކޮންމެ ނައިބު ވަޒީރަކަށް މުސާރައާއި އިނާޔަތްތަކުގެ ގޮތުގައި 220،500ރ. ދައުލަތުން ދީފައިވެ އެވެ. ހިސާބުތައް އެއްކޮށްލުމުން ވަޒީފާގެ ރަސްމީ އެއްވެސް މަސައްކަތެއް ނުކުރުވައި ޝިއުނާ، މަލްޝާ އަދި މަހުޒޫމް އަށް މުސާރައާއި އިނާޔަތްތަކުގެ ގޮތުގައި ދިން ފައިސާގެ ޖުމުލަ 661،500ރ. އަށް އަރަ އެވެ.
އެ ތިން ބޭފުޅުންގެ ތެރެއިން ޝިއުނާ އާއި މަލްޝާއަކީ ރައީސް ޑރ. މުހައްމަދު މުއިއްޒުއާ ވަރަށް ގާތް، އަދި ރައީސް މުއިއްޒުގެ މޭޔަރުކަމުގައި މާލެ ސިޓީ ކައުންސިލުގެ މީޑީއާގައި މަސައްކަތް ކުރެއްވި ދެ ކަނބަލުންނެވެ.
ސަސްޕެންޝަނުގައި ތިން ނައިބު ވަޒީރުން ބައިތިއްބައިގެން މުސާރަދެމުންދާއިރު، ފެނަކައިގައި މަސައްކަތް ކުރާ 700 އަށްވުރެ ގިނަ މުވައްޒަފުން ވަޒީފާއިން ވަކި ކުރަން އެ ކުންފުނިން ވަނީ ނިންމައިފަ އެވެ. ސަރުކާރުގެ މަގުހަދާ ކުންފުނި އާރުޑީސީންވެސް މި ވެރިކަމުގައި، ޖުލައި 1، ގެ ކުރިން 232 މުވައްޒަފަކު މަގާމުން ވަކިކުރި އެވެ.
ރާއްޖެ އާއި އިންޑިއާއާ ދެމެދު އޮތް ޒަމާންވީ ގާތް ގުޅުމަށް ބުރޫ އަރައި ހުޅުގަނޑު ފަޅައިގެން ދިޔައީ އެ ތިން ބޭފުޅުން އެކްސްގައި ކުރެއްވި ޕޯސްޓުތަކެއްގެ ސަބަބުންނެވެ. މި މައްސަލައިގައި އިންޑިއާގެ މަޝްހޫރު ފިލްމީތަރިންނާއި އިންޑިއާގެ ސޯޝަލްމީޑިއާ އެކްޓިވިސްޓުން ރާއްޖެއާ ދެކޮޅަށް ވަރުގަދަ ކެމްޕޭނެއް ވެސް ކުރި އެވެ.
އެ ކަންތައްގަނޑުގެ ސަބަބުން ކުރިމަތިވަމުންދާ ގޮންޖެހުންތަކާ ގުޅިގެން ފަތުރުވެރިކަމުގެ އިންޑަސްޓްރީގައި ވިޔަފާރި ކުރާ ފަރާތްތަކުން ކަންބޮޑުވުން ފާޅުކުރި އެވެ. އޭގެ ތެރޭގައި ޓްރެވަލް އެޖެންޓުގެ ޖަމިއްޔާ މަޓާޓޯ ވެސް ހިމެނެ އެވެ. މޯދީއަށް މަލާމާތް ކުރުން ރާއްޖޭގެ ފޮރިން މިނިސްޓްރީން ވެސް ކުށްވެރިކުރި އެވެ.
އިންޑިއާ އާއި ރާއްޖެއާ ދެމެދު އޮތް ގުޅުމަށް ބުރޫ އެރުމުގެ ސަބަބުން ރާއްޖޭގެ ފަތުރުވެރިކަމަށް ފާހަގަކޮށްލެވޭ ވަރުގެ ހީނަރުކަމެއް އައިސްފައިވެ އެވެ.
އެކަން ގަބޫލުކޮށް އިންޑިއާ ފަތުރުވެރިންގެ އަދަދު އިތުރު ކުރުމަށްޓަކައި ޓޫރިޒަމް މިނިސްޓަރީން އިސްނަގައިގެން އެމްއެމްޕީއާރުސީއާއެކު ދަނީ މަސައްކަތްތަކެއް ކުރަމުންނެވެ. އެގޮތުން މިދިޔަ މަހުގެ 31 އިން މިމަހުގެ ތިންވަނަ ދުވަހުގެ ނިޔަލަށް އިންޑިއާގެ ތިން ސިޓީއެއްގައި "ވެލްކަމް އިންޑިއާ" ގެ ނަމުގައި ރޯޑް ޝޯތަކެއް ވެސް ކުރިއަށް ގެންދިޔަ އެވެ. އެ ރޯޑް ޝޯ ތަކުގައި ޓޫރިޒަމް މިނިސްޓަރު، އިބްރާހިމް ފައިސަލް ވެސް ބައިވެރިވެވަޑައިގެންނެވި އެވެ.
އިންޑިއާއާއި ރާއްޖެއާ ދެމެދުގައި އޮތް ޒަމާންވީ ގުޅުމުގައި ލީ ރެނދު ބެއްދުމަށްޓަކައި ދިވެހި ސަރުކާރުން މަސައްކަތް ކުރަމުންދާއިރު، އިންޑިއާގެ ބޮޑު ވަޒީރަށް ފުރައްސާރަ ކުރި ބަޔަކަށް ގޭގައި ބައިތިއްބައިގެން ދައުލަތުން މުސާރަ ދޭތީ ގިނަ ބައެއްގެ ފާޑުކިޔުން އެކަމަށް އަމާޒުވެފައިވެ އެވެ.
