އިސްލާމިކް މިނިސްޓަރު ޑރ. މުހައްމަދު ޝަހީމުގެ އަބުރަށް ހުތުރުވާ ގޮތަށް އޭނާ ފެންނަ ކަމަށް ބުނެ ފޭކު ވީޑިއޯއެއް ސޯޝަލް މީޑިއާގައި ފެތުރިތާ ދެ ދުވަސް ފަހުން ވެރިކަންކުރާ ޕީއެންސީން އެކަން ކުށްވެރިކޮށްފި އެވެ.
ޕީއެންސީން މިރޭ ނެރުނު ބަޔާނެއްގައި ބުނީ، ޝަހީމުގެ އަބުރަށް ގެއްލުންދިނުމުގެ ނިޔަތުގައި ސޯޝަލް މީޑިއާގައި އަދި ބައެއް ނޫސްތަކުގައި ދޮގު ވާހަކަތަކެއް ދައްކަމުންދާތީ އެކަން ކުށްވެރިކުރާ ކަމަށެވެ.
ނަމަވެސް ޝަހީމަކީ ހުލްގު ހެޔޮ ދީނީ ލީޑަރެއް ކަމަށާއި ރައީސް ޑރ. މުހައްމަދު މުއިއްޒުގެ އިސްލާމީ މެނިފެސްޓޯ ތަންފީޒުކުރަން ވަޒީރު ކުރައްވާ މަސައްކަތަށް ޕާޓީން ފަހުރުވެރިވާ ކަމަށް ބަޔާނުގައިވެ އެވެ.
"ޑރ. ޝަހީމް އަލީ ސައީދަކީ ފުރައްސާރަކޮށް ހަގީގަތާ ހިލާފު ދޮގު އިލްޒާމުތަކުން ފަހަތަށް ޖެހިވަޑައިގަންނަވާނެ ބޭފުޅެއް ނޫން. އެއީ ދީނީ އިލްމު ލިބިވަޑައިގެން ހުންނެވި އަޒުމް ވަރުގަދަ ސިޔާސީ ލީޑަރެއް" ޕީއެންސީގެ ބަޔާން ނިންމާލަމުން ގޮވާލާފައިވަނީ މި ފިނޑި އަމަލު ހުއްޓައިލުމަށެވެ.
މީގެ ދެ ދުވަސްކުރިން އަންހެނަކާއި ފިރިހެނަކު ބަދުއަހުލާގީ އަމަލެއް ހިންގާ މަންޒަރު ފެންނަ ވީޑިއޯ ސޯޝަލް މީޑިއާގައި އާންމުކޮށް، އެއަށް ފަހު ވީޑިއޯއިން ފެންނަނީ ޝަހީމު ކަމަށް ބަޔަކު ތުހުމަތުކުރި އެވެ. އެ ވީޑިއޯއިން ފެންނީ ޝަހީމް ނޫންކަން ހަމަ އެ ދުވަހު ކަށަވަރު ވިއެވެ.
މި ވީޑިއޯ އާންމުވެ ދައުރުވާން ފެށުމާއެކު "އަދަދު" އިން އިތުރަށް ހޯދި ހޯދުންތަކުގައި އެނގުނު ގޮތުގައި މިއީ ޕާކިސްތާނުގެ ދެ މީހެއްގެ ވީޑިއޯއެކެވެ. އެ ވީޑިއޯގެ އަސްލު އިންޓަނެޓުގެ އެކި ސައިޓުތަކުން ފެންނަން އެބަހުއްޓެވެ.
ވީޑިއޯގެ އިތުރުން މި ފަހުން ޝަހީމަށް ފާޑުކިޔުން އަމާޒުވީ މިދިޔަ ހަފުތާގައި ހަމާސްގެ ލީޑަރު އިސްމާއިލް ހަނިއްޔާ ޝަހީދުކޮށްލަން އިޒްރޭލުން ދިން ހަމަލާ ކުށްވެރިނުކުރުމާއި ހަނިއްޔާގެ މައްޗަށް ގައިބުގައި ކަށުނަމާދު ކުރަން އިމާމުންނަށް ނޭންގުމުންނެވެ. އަދި، އޭނާގެ ޕީއެޗްޑީގެ ސައްހަކަމާމެދު ސުވާލު އުފައްދައި ގެން ވެސް ސޯޝަލް މީޑިއާ ގައި ވާހަކަ ފެތުރި އެވެ.
