މަޖިލީހުގައި ތިއްބެވި ޕީއެންސީގެ މެންބަރުންނަށް ރައީސް ޑރ. މުހައްމަދު މުއިއްޒު ދެއްވި މެސެޖެއް ލީކު ނުކުރާ ކަމަށް ބައެއް މެންބަރުން ލައްވައި ރޭ ހުވާ ކުރުވައިފި އެވެ.
"އަދަދު" އަށް އެނގިފައިވާ ގޮތުގައި މެންބަރުން ލައްވައި ހުވާ ކުރުވާފައި ވަނީ ރޭ ރައްޔިތުންގެ މަޖިލީހުގެ އިދާރާގައި ބޭއްވި ޕީއެންސީގެ ޕާލިމެންޓަރީ ގްރޫޕްގެ ބައްދަލުވުމެއްގަ އެވެ. މަޖިލިސް މެންބަރުން ހުވާ ކުރީ މަޖިލީހުގެ ރައީސް، އަބްދުއްރަހީމް އަބްދުﷲ އާއި ޕީއެންސީގެ ޕީޖީ ލީޑަރު، އިބްރާހިމް ފަލާހު ކުރިމަތީގަ އެވެ.
އެކަމާ ގުޅިގެން ޕީއެންސީ ބައެއް މަޖިލިސް މެންބަރުން "އަދަދު" އަށް ބުނީ ރޭ ހުވާ ކުރުވީ "ރައީސްގެ އެއްވެސް މެސެޖެއް ލީކު ކުރިނަމަ އަނތްބެއް ދަރިއެއް ނުހުންނާނެ،" ކަމަށެވެ. އެ ބައްދަލުވުމުގައި ސާޅީހަކަށް މެންބަރުން ބައިވެރިވެވަޑައިގެންނެވި ކަމަށް ވެސް އެ މެންބަރުން ވިދާޅުވި އެވެ.
"އެ ވަރުގެ ކަމެއްގައި މެންބަރުން ލައްވައި އެފަދަ ހުވައެއް ކުރެއްވީތީ، ބައެއް މެންބަރު ތިބީ ހިތްހަމަ ނުޖެހިފައި. ރޭގެ ބައްދަލުވުމަށް ދިޔައީ ވެސް ބައެއް މެންބަރުން،" އަދަދު ނޫހާ ވާހަކަ ދެއްކެވި މެންބަރަކު ވިދާޅުވި އެވެ.
މަޖިލިސް މެންބަރުން ލައްވައި ހުވާ ކުރުވީ ޕީއެންސީގެ ގުރޫޕަކަށް ރައީސް ފޮނުއްވި މެސެޖެއް ލީކުވުމާ ގުޅިގެންނެވެ. ރައީސްގެ ލީކުވި ކަމަށް ބެލެވޭ މެސެޖަކީ ރޭ އެމްޑީޕީ ގައުމީ މަޖިލިސް ކުރިއަށް ދިޔަ ވަގުތު އެމްޑީޕީގެ ޗެއާޕާސަން، ފައްޔާޒް އިސްމާއިލް ހިއްސާ ކުރެއްވި މެސެޖެކެވެ.
އެމްޑީޕީ ގައުމީ މަޖިލީހުގެ ތެރެއިން ފައްޔާޒު ވިދާޅުވީ، ޕީއެންސީގެ މަޖިލިސް މެންބަރަކު މެސެޖެއް ފޮނުއްވާފައިވާ ކަމަށާއި މެސެޖުގައި އޮތީ "ރަށްރަށުގައި ފަށައިގެން ކުރިއަށްގެންދާ ޕްރޮޖެކްޓުތައް ސަރުކާރުގެ މާލީ ހާލަތު މިވަގުތު ދަށްވަމުން ދާތީ އެ ޕްރޮޖެކްޓުތަކުގެ ވާހަކަ ނުދެއްކުމަށް ރައީސް މުއިއްޒު ވަނީ އަޅުގަނޑުމެންނަށް އަންގަވާފައި،" ކަމަށެވެ.
ޕީއެންސީގެ މަޖިލިސް ބައެއް މެންބަރުން ލައްވައި ރައީސްގެ މެސެޖެއް ލީކު ނުކުރާ ކަމަށް ހުވާ ކުރުވިއިރު، މިދިޔަ އަންގާރަ ދުވަހު ޕީއެންސީ ޖަގަހައިގައި ބޭއްވި ޖަލްސާގައި ވާހަކަ ދައްކަވަމުން މަޖިލީހުގެ ރައީސް އަބްދުއްރަހީމް ވަނީ މަޖިލީހުގެ މެންބަރުން ހައްލަން ބައެއް ފަރާތްތަކުން މަސައްކަތް ކުރައްވާނެ ކަމަށާއި އެކަމަށް ސަމާލުވާން ޖެހޭ ކަމަށް ބުނެ އިލްތިމާސްއެއް ކުރައްވައިފަ އެވެ.
އެރޭ އަބްދުއްރަހީމް ވިދާޅުވީ ޕީއެންސީގެ މެންބަރުން ރައްޔިތުން ހޮވީ ރައީސް ޑރ. މުހައްމަދު މުއިއްޒުގެ ވެރިކަން ހިމާޔަތް ކުރުމަށް ކަމަށެވެ.
ރައްޔިތުންގެ އިއްޒަތްތެރި މެންބަރުން ހައްލަން އެކި ގޮތްގޮތަށް ވަރަށް މަސައްކަތް ކުރާނެ، މިއީ ވަރަށް ބޮޑަށް ސަމާލުވާން ޖެހޭ ވަގުތެއް. ތިބޭފުޅުން ގަބޫލުކުރައްވަންވާނެ، ރައްޔިތުން ތިބޭފުޅުން އިންތިހާބު ކުރީ ރައީސް މުއިއްޒުގެ ވެރިކަން ދިފާއުކުރަން،" ޕީއެންސީގެ ޗެއާޕާސަންގެ މަގާމުގައި ވެސް ހުންނެވި އަބްދުއްރަހީމް އެރޭ ވިދާޅުވި އެވެ.
މަޖިލީހުގެ ރައީސް އާއި ނައިބު ރައީސް އިންތިހާބު ކުރަން ނެގި ވޯޓުގައި، ނައިބު ރައީސް ކަމަށް އިންތިހާބުވި ދިއްގަރު ދާއިރާގެ މެންބަރު އަހުމަދު ނާޒިމަށް ލިބިވަޑައިގެންނެވި ވޯޓަށް ވުރެ، މަޖިލީހުގެ ރައީސް ކަމަށް އަބްދުއްރަހީމް އަށް ލިބިވަޑައިގެންނެވި ވޯޓު މަދުވުމުން، ވޯޓު ނުދެއްވާ މެންބަރު ހޯދުމަށް ވެސް ހުވާ ކުރައްވަން މަސައްކަތް ކުރި އެވެ.
