ފެނަކަ ކޯޕަރޭޝަންގެ ހަރަދު ކުޑަކުރުމުގެ ގޮތުން ކަމަށް ބުނެ އެ ކުންފުނީގެ އެކި މަޝްރޫއުތަކަށް ނަގާފައިވާ 731 ކޮންޓްރެކްޓް މުވައްޒަފުން މި މަހަށް ފަހު ވަކި ކުރަން ނިންމައިފި އެވެ.
"ހުރިހާ ރަށަކުން ވެސް އެބަ ދޫކޮށްލަން ކޮންޓްރެކްޓަށް ނަގާފައި ތިބި މުވައްޒަފުން. މި ހަފްތާ ތެރޭގައި ހުރިހާ މުވައްޒަފުންނަށް އެކަން އަންގާ ނިމޭނެ. ޖުމްލަ 731 މުވައްޒަފުން އެބަ ދޫކޮށްލަން،" ފެނަކައިގެ އެމްޑީ މުއާޒް މުހައްމަދު ރަޝީދު ވިދާޅުވި އެވެ.
މުއާޒު ވިދާޅުވީ މިވަގުތު މަޝްރޫއުތަކަށް ކޮންޓްރެކްޓަށް މުވައްޒަފުން ނަގައިގެން ކުރިއަށް ދެވެން ނެތް ކަމަށާއި ވިސްނުމަކީ އެ މަޝްރޫއުތައް ބިޑަށް ލައިގެން ޕްރައިވެޓް ކުންފުނިތަކަށް ދިނުމަށް ކަމަށެވެ.
މަޝްރޫއުތައް ހުއްޓުނީ ސަރުކާރުގެ މާލީ ހާލަތު އިންތިހާއަށް ދަށަށް ދިޔުމުންނެވެ.
މަޝްރޫއުތައް ހުއްޓިފައި ވިޔަސް އެ މަޝްރޫއުތަކަށް ނަގާފައި ތިބި މުވައްޒަފުންނަށް މުސާރަ ދޭން ޖެހޭތީ އުނދަގޫތަކެއް ދިމާވާކަން ފާހަގަކުރައްވާ މުއާޒު ވިދާޅުވީ އެ މުވައްޒަފުންނަށް ހަތް މިލިއަނާއި ނުވަ މިލިއަން ރުފިޔާއާ ދެމެދުގެ އަދަދަކަށް ފައިސާ ހަރަދުވާ ކަމަށެވެ.
ސަރުކާރުން ގިނަ އަދަދެއްގެ ސިޔާސީ މުވައްޒަފުން ނަގައި، އެ މުވައްޒަފުންނަށް ބޮޑު ހޭދައެއްކޮށް، ސަރުކާރު ހިއްސާވާ ކުންފުނިތަކުން އާދައިގެ މުވައްޒަފުންނާ ގުޅޭ މިފަދަ ނިންމުންތައް ނިންމާތީ ގިނަ ބަޔަކު އަންނަނީ ހިތްހަމަނުޖެހުން ފާޅުކުރަމުންނެވެ.
ހދ، ދިއްދޫ ފެނަކައިގެ 21 މުވައްޒަފަކު ވަކިކުރަން ނޯޓިސް ދީފައިވާތީ އެ ރަށުގައި އިއްޔެ މުޒާހަރާ ކުރި އެވެ.
