ރައްޔިތުންގެ މަޖިލީހުގެ އަދަދު ވަކި ވަރަކަށް ހިފަހައްޓާ ގޮތަށް ގާނޫނަށް ބަދަލު ގެންނައިރު، މަޖިލީހުގެ ވަކި ޕަސެންޓެއް އަންހެނުންނަށް ހާއްސަ ކުރަން ތާއީދު ކުރާ ކަމަށް އަދާލަތު ޕާޓީން މިއަދު ބުނެފި އެވެ.
ރައްޔިތުންގެ މަޖިލީހުގެ މެންބަރުންގެ އަދަދު، ރާއްޖޭގެ އާބާދީ އިތުރުވާ ނިސްބަތުން އިތުރު ނުވާ ގޮތަށް ބަދަލުކުރަން ރައްޔިތުންގެ މަޖިލީހުން ކުރާ މަސައްކަތުގައި، މަޖިލީހުން ގެންދަނީ ޕާޓީތަކުގެ ހިޔާލު ހޯދަމުންނެވެ. އެގޮތުން ބޮޑު ދެޕާޓީ ކަމަށްވާ އެމްޑީޕީ އާއި ޕީއެންސީގެ ހިޔާލު ހޯދުމަށް ފަހު މިއަދު ހޯދީ ކުދި ޕާޓީތަކުގެ ހިޔާލެވެ.
މެންބަރުންގެ އަދަދު ހިފެހެއްޓުމާ މެދު ޕާޓީތަކުގެ ހިޔާލު ހޯދަން އެމްއާރްއެމް، އެމްޑީއޭ އަދި އަދާލަތު ޕާޓީގެ މަންދޫބުން ބައިވެރިކޮށްގެން މަޖިލީހުގެ މިނިވަން މުއައްސަސާތަކުގެ ކޮމިޓީން މިއަދު ބޭއްވި ބައްދަލުވުމުގައި އަދާލަތު ޕާޓީގެ ރެޖިސްޓްރާ، އާދަމް މުހައްމަދު ވިދާޅުވީ އަންހެނުންނަކީ ރާއްޖޭގެ އާބާދީގެ ބޮޑު އިންސައްތައެއް ކަމަށާއި މަޖިލީހުގައި އަންހެނުންނަށް މަޖިލީހުގެ ވަކި އިންސައްތައެއް ކަނޑައަޅަން ފެންނަ ކަމަށެވެ.
"ދިވެހިރާއްޖޭގެ އާބާދީގެ ދެބައިކުޅަ އެއްބަޔަށްވުރެ ގިނަ އަދަދެއް އަންހެން ކަނބަލުންނަކީ، އެހެން ނަމަވެސް މުޅި މަޖިލީހުގައި މި ތިއްބެވީ ތިން މެންބަރުން، ލާމަރުކަޒީ ނިޒާމުގެ ތެރެއިން އެބަ އޮތް ކޯޓާ ސިސްޓަމެއް ކަނޑައެޅިގެން އަންހެން ބޭފުޅުންގެ ރިޕްރެޒެންޓޭޝަން އޭގެ ތެރެއަށް. އިލެކްޓޯރަލް ސިސްޓަމް ސިސްޓަމް ތެރެއަށް ގެނެވޭނެ ގޮތެއް ހަމަޖައްސަވާފައި،" އާދަމް މުހައްމަދު ވިދާޅުވި އެވެ.
"މިގޮތަށް ހަމަ ޖައްސާއިރުގައި އަޅުގަނޑަށް ފެނޭ، ދިވެހިރާއްޖޭގެ މި އޮންނަ އާބާދީގެ 50 ޕަސެންޓަށް ވުރެ ބޮޑު ބައެއް ޑިމޮކްރެޓިކް ޑިވިޑެންޓު ނެގުން ނުވަތަ އަބާދީގެ މި ހުންނަ އެޑްވާންޓޭޖު ނެގުން އެ ބޭފުޅުންގެ ރިސޯސަސް ބޭނުން ކުރަން މަޖިލީހުގެ ތެރެއިން ކޯޓާއެއް ކަނޑައަޅުއްވާފައި އެކަން އިންޕްލިމެންޓު ކުރުން މީގެ ތެރެއަށް ދާއިރުގައި،"
އަންހެނުންގެ އިތުރުން އެކި ދާއިރާތަކުގައި މަސައްކަތް ކުރާ ފަރާތްތަކަށް ވެސް މަޖިލީހުން ވަކި ޕަސެންޓޭޖެއް ދޭން ފެންނަ ކަމަށް އާދަމް ވިދާޅުވި އެވެ.
އެގޮތުން ވަސީލަތްތައް ބެހިފައި ހުންނަނީ ރާއްޖޭގެ އެކި ސަރަހައްދުތަކަށް ކަން ފާހަގަ ކުރައްވައި އާދަމް ވިދާޅުވީ ދުނިޔޭގެ ކުރި އަރާފައި ހުންނަ ގައުމުތަކުގައި ނުކުޅެދުންތެރިކަން ހުންނަ ފަރާތްތަކާއި ފައިނޭންޝިއަލް ދާއިރާ ފަދަ ތަފާތު ދާއިރާތަކުގެ މީހުންނަށް ވަކި ކޯޓާއެއް މަޖިލީހުން ހަމަޖައްސާފައި ހުންނަ ކަމަށެވެ. އެހެންކަމުން ރާއްޖޭގެ ގާނޫނަށް ބަދަލު ގެންނައިރު، އެކަންކަމަށް ވެސް ވިސްނުން މުހިންމު ކަމަށް އާދަމް ވިދާޅުވި އެވެ.
އަވައްޓެރި ބަންގްލަދޭޝްގެ ވެރިކަން ބަދަލުވެގެންދިޔަ ގޮތުން މިސާލު ނަންގަވައި އާދަމް ވިދާޅުވީ އެއީ ރާއްޖޭގައި ވެސް ވުން ގާތް ކަމެއް ކަމަށާއި ވަކީން ހާއްސަކޮށް އަންހެނުންނަށް މަޖިލީހުން ވަކި ކޯޓާއެއް ކަނޑައަޅަން ޖެހޭ ކަމަށް ގަބޫލު ކުރައްވާ ކަމަށެވެ.
"އަންހެން ކަނބަލުންނަށް ރިޕްރެޒެންޓޭޓު ނުކުރެވޭ ކަމަށްވަންޏާ ކޮންމެވެސް ހިސާބަކުން އެކަންކަން އަންނާނެ ބޮޑުވެގެން އަންނައިރުގައި މިވަރުގެ ބަދަލެއް ގެންނައިރުގައި އަޅުގަނޑުގެ ސަޖެސްޝަނެއް އެއީ ހަމަ ތިބޭފުޅުން އެކަންކަމާ މެދު ވިސްނާލެއްވުން، އެޓްލީސްޓު މި އަންހެން ކަނބަލުންގެ ކަންތަކާ އަޅުގަނޑަށް ހީވަނީ ވަރަށް ބޮޑަށް ތިބޭފުޅުން ވިސްނާލެއްވުން އެއީ ވަރަށް ރަނގަޅު ކަމަކަށް ވާނެހެން،" އާދަމް ވިދާޅުވި އެވެ.
މަޖިލިސް މެންބަރުންގެ އަދަދު ވަކިވަރެއްގައި ހިފެހެއްޓުމަށް މަސައްކަތް ކުރަނީ އިތުރުވަމުންދާ އާބާދީއާއެކު މަޖިލިސް މެންބަރުންގެ އަދަދު އިތުރުވިޔަ ނުދީ އެއްވަރެއްގައި ހިފެހެއްޓުމަށްޓަކަ އެވެ. ގާނޫނު މިހާރު އޮންނަ ގޮތުން ކޮންމެ 5000 ރައްޔިތުން ތަމްސީލު ކުރާ މެންބަރެއް މަޖިލީހުގައި ހުންނަވަ އެވެ.
