ރައްޔިތުންގެ މަޖިލީހުގެ މެންބަރުންގެ އަދަދާއި އެކުލަވާލެވިފައިވާ ގޮތަށް ބަދަލު ގެންނައިރު، ކެންޑިޑޭޓަކު ނެރުމަކާ ނުލާވެސް ސިޔާސީ ޕާޓީތަކަށް ގޮނޑި ލިބޭނެ ގޮތައް އިންތިހާބު ފަރުމާ ކުރަން ދަ ޑިމޮކްރެޓްސް އިން ހުށަހަޅައިފި އެވެ.
މަޖިލީހުގެ މެންބަރުންގެ އަދަދު އެއްވަރެއްގައި ހިފެހެއްޓުމަށް ޓަކައި ގާނޫނަށް ބަދަލުކުރުމާ މެދު ޕާޓީތަކުގެ ހިޔާލު ހޯދަން މަޖިލީހުގެ މިނިވަން މުއައްސަސާތަކުގެ ކޮމިޓީން މިއަދު ބޭއްވި ބައްދަލުވުމުގައި ޑިމޮކްރެޓުންގެ ނައިބު ރައީސް އާޝިޔަތު އަލައިކާ އަދުނާން ވިދާޅުވީ، އެ ޕާޓީންވެސް މަޖިލީހުގެ މެންބަރުންގެ އަދަދު މަދުކޮށް އެއްވަރެއްގައި ހިފެހެއްޓުމަށް ތާއީދުކުރާ ކަމަށެވެ.
އެއީ އެ ޕާޓީން ނިމިދިޔަ ރިޔާސީ އިންތިހާބާއި މަޖިލިސް އިންތިހާބުގެ ކެމްޕޭނުގައި ހުށަހެޅި މެނިފެސްޓޯތަކުގައިވެސް ހިމެނި ސިޔާސަތެއްކަން އޭނާ ފާހަގަކުރެއްވި އެވެ. ނަމަވެސް، އެހެން ޕާޓީތަކާ ހިލާފަށް ޑިމޮކްރެޓުން އެދެނީ މަޖިލިސް އެކުލެވޭ ގޮތަށްވެސް ބަދަލުތަކެއް ގެންނާށެވެ.
އެގޮތުން ޕާޓީތަކުން ބޭނުންވާ ބަޔަކު އައްޔަން ކުރުމަށް ވަކި ހާއްސަ ގޮނޑިތަކެއް ހިމަނައި، ރައްޔިތުން ޕާޓީތަކަށް ވޯޓުލާ ގޮތަށް ހެދުމަށް ފެންނަ ކަމަށް އަލައިކާ މިއަދު ހުށަހެޅުއްވި އެވެ.
"ވޯޓިން ކަރުދާހުގަ ޕާޓީއަށް ވޯޓުލެވޭ ގޮތަށް ހަދާފަ. އަދި މެންބަރަކަށް ވޯޓުލެވޭ ގޮތް ހެދޭނެ. އެހެންވީމަ އެންޑް އޮފް ދަ ޑޭގަ ވޯޓިން ނިމި ގުނާއިރު އިނގޭނެ ކޮންމެ ޕާޓީއަކަށްވެސް ލިބިފައިވާ ރެޕްރެޒެންޓޭޝަން. އޭރުން ޕާޓީތަކަށް އެބަލިބޭ އެމީހުން ރެޕްރެޒެންޓުކުރާނެ ސްލޮޓެއް،"
ޑިމޮކްރެޓުން ދެކޭ ގޮތުގައި މިއީ މަޖިލިސް މެންބަރުން ޕާޓީ ބަދަލުކުރުން މަދުކުރަންވެސް އެޅޭނެ ރަނގަޅު ފިޔަވަޅެކެވެ. ސަބަބަކީ އެ ސްލޮޓުތަކަށް ލަނީ ޕާޓީ ތަމްސީލުކުރާނެ މީހުން ކަމަށް ވާތީ ކަމަށާއި ޕާޓީއަށް ލިބޭ ސްލޮޓު މެންބަރު ބަދަލުވިޔަސް ނުގެއްލޭނެތީ ކަމަށް އަލައިކާ ވިދާޅުވި އެވެ.
މިއީ ބައެއް ގައުމުތަކުގައި ގާނޫނު ހަދާ މަޖިލީހަށް މެންބަރުން ހޮވުމުގައި ގެންގުޅޭ ސިޔާސަތެކެވެ. އެގޮތުން ޕާޓީތަކަށް ވަކިވަރަކަށް ހާއްސަކުރާ ގޮނޑިތަކަށް އައްޔަންކުރާނެ ބަޔަކު ކަނޑައަޅާނީ ސީދާ ޕާޓީންނެވެ.
