ސައުތު އޭޝިއަން އެސޯސިއޭޝަންސް ފޯ ރީޖަނަލް ކޯޕޮރޭޝަން (ސާކް) ގެ ސެކްރެޓަރީ ޖެނެރަލް، ގޮލަމް ސަރްވާރް، ރައީސް ޑރ. މުހައްމަދު މުއިއްޒުގެ އަރިހަށް އިހުތިރާމުގެ ޒިޔާރަތެއް ކުރައްވައިފި އެވެ.
އިއްޔެ ހެނދުނު އޮތް މި ބައްދަލުވުމުގައި ސެކްރެޓަރީ ޖެނެރަލް ވަނީ ރާއްޖެއާއި އެ ކޯޕަރޭޝަން އޮންނަ ގާތް ގުޅުން ފާހަގަކޮށްފަ އެވެ. އަދި އެ ކޯޕަރޭޝަނުން މެންބަރު ގައުމުތަކުގެ ކުރިއެރުމަށާއި ފައިދާއަށް ހިންގަވާ އެކިއެކި ޕުރޮގްރާމުތަކުގެ މައުލޫމާތުތައް ވަނީ ރައީސްއާ ހިއްސާކުރައްވައިފަ އެވެ.
ސާކްގެ ތަރައްގީއަށް ކުރައްވާ ހުރިހާ މަސައްކަތަކަށް ވެސް ރާއްޖޭގެ ފުރިހަމަ އެއްބާރުލުން ދެއްވާނެ ކަމަށާއި، ސާކްގެ އެ ކޯޕަރޭޝަންގެ ސެކްރެޓަރީ ޖެނެރަލްގެ ހައިސިއްޔަތުން އެ ބޭފުޅާ ކުރައްވާ މަސައްކަތަށް ރައީސް ތައުރީފުކުރެއްވި އެވެ.
ސާކްގެ ސެކްރެޓަރީ ޖެނެރަލް ރާއްޖެ ވަޑައިގަތީ މިދިޔަ އާދީއްތަ ދުވަހެވެ. މި ދަތުރުފުޅުގައި ސަރުވާރުގެ އަނބިކަނބަލުން ތަސްލީމާ ސަރުވާރާއި ސާކް ސެކްރެޓޭރިއެޓް ޑިރެކްޓާ، ޝާހިޔާ އަލީ މަނިކު އަދި ބަވެޝް ރ. ޓްރިވެޑީ ބައިވެރިވެވަޑައިގަންނަވަ އެވެ.
ބަންގުލަދޭޝްއަށް ނިސްބަތްވެވަޑައިގަންނަވާ ސަރުވާރަކީ ސާކްގެ 15 ވަނަ ސެކްރެޓަރީ ޖެނެރަލް އެވެ. އޭނާގެ ކުރިން އެ މަގާމުގައި ހުންނެވީ އަވަށްޓެރި ސްރީލަންކާގެ އީސަލް ވީރަކޫން އެވެ.
