ރާއްޖޭގައި މިހާރު އަމަލުކުރާ ގާނޫނުއަސާސީ ތަސްދީގު ކުރިތާ މިއަދު 16 އަހަރު ފުރުމުން، އެކަން ފާހަގަކުރައްވައި، ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ މިއަދު ރައްޔިތުންނަށް ބޮޑު ޔަގީންކަމެއް ދެއްވައިފި އެވެ.
މަޖިލީހުގެ މިއަދުގެ ޖަލްސާ ފަށްޓަވައި، ރިޔާސަތުން އަންގާ އެންގުމެއްގެ ގޮތުގައި އަބްދުއްރަހީމް ވިދާޅުވީ ގާނޫނުއަސާސީން ލިބިދީފައިވާ ހައްގުތައް ކަށަވަރުކުރުމަށް މަޖިލީހުގެ ޒިންމާ ފުރިހަމައަށް އަދާކުރާނެކަމުގެ ޔަގީންކަން ރައްޔިތުންނަށް ދެެއްވާ ކަމަށެވެ. ގާނޫނުއަސާސީން ރައްޔިތުންގެ މަޖިލީހާ މަތިކޮށްފައިވާ ވާޖިބުތައް ފުރިހަމަށް އަދާކުރާނެ ކަމަށް ވެސް އެމަނިކުފާނު ވިދާޅުވި އެވެ.
"ހައްގުތައް ކަށަވަރުކޮށްދިނުމުގައި، އަދި ރައްޔިތުންގެ މަޖިލީހަށް މަތިކޮށްފައިވާ ވާޖިބުތައް އަދާކޮށް، މުއައްސަސާތައް ޖަވާބުދާރީކުރުވައި، ރައްޔިތުންގެ މަޖިލީހުގެ މަސްއޫލިއްޔަތު މިމަޖިލީހުން އަދާކުރާނެކަމުގެ ފުރިހަމަ ޔަގީންކަން ދިވެހި އެންމެހާ ލޮބުވެތި ރައްޔިތުންނަށް އަރުވަން،" އަބްދުއްރަހީމް ވިދާޅުވި އެވެ.
މިހާރު އަމަލުކުރަމުން އަންނަ ގާނޫނުއަސާސީއަކީ، ގާނޫނުއަސާސީ އިސްލާހުކުރުމުގެ މަސައްކަތެއްގެ ގޮތުގައި ފެށި މަސައްކަތެއްގެ ނަތީޖާއެވެ. އިސްލާހުކުރުމުގެ ނަމުގައި މުޅިން އާ ގާނޫނުއަސާސިއެއް އެކުލަވައިލައި ނިމި، މި ގާނޫނު އަސާސީ ތަސްދީގުކުރީ 2008، އޮގަސްޓް 7، ގަ އެވެ. އޭރުގެ ރައީސް މައުމޫނު އަބްދުލްގައްޔޫމު މި ގާނޫނުއަސާސީ ތަސްދީގުކުރެއްވީ އެކަން ނުކުރައްވައި ލަސްކުރައްވާތީ އޭރުގެ އިދިކޮޅު ފަރާތްތަކުން ރިޔާސީ ގަނޑުވަރުގެ ކައިރިއަށް އެއްވެ މުޒާހަރާތައް ވެސް ކުރި ފަހުންނެވެ.
މިގާނޫނުއަސާސީ އެކުލަވައިލަން ނެގި ހާއްސަ މަޖިލީހުން އެ މަސައްކަތް ނިންމި އިރު ރިޔާސަތުގައި އިންނެވީ މާމިނގިލި ދާއިރާގެ މެންބަރު އަދި ޖުމްހޫރީ ޕާޓީގެ ލީޑަރު ގާސިމް އިބްރާހީމެވެ. އެކަން ފާހަގަކުރައްވައި އަބްދުއްރަހީމް މިއަދު ގާސިމަށް ޝުކުރުއަދާކުރެއްވި އެވެ. ހާއްސަ މަޖިލީހުގެ އެހެން މެންބަރުންނަށް ވެސް އެމަނިކުފާނު ޝުކުރުއަދާކުރެއްވި އެވެ.
