ރާއްޖެއިން ޗައިނާއަށް ކަނޑައަޅާފައި ހުންވާ ސަފީރު ޑރ. ފަޒީލް ނަޖީބު، ޗައިނާ ނޭޝަނަލް ޕެޓްރޯލިއަމް ކޯޕަރޭޝަން (ސީއެންޕީސީ) ގެ ނައިބު ރައީސް އާ ބައްދަލުކުރައްވައިފި އެވެ.
ޗައިނާގައި ހުންނަ ރާއްޖޭގެ އެމްބަސީން ކުރި ޕޯސްޓެއްގައި ބުނީ މި ބައްދަލުވުމުގައި އެކުގައި މާލީ ކަންކަމުގައި އެ ކުންފުންޏާއެކު ދިވެހި ސަރުކާރުން އެކުގައި މަސައްކަތް ކުރުމާ ގުޅޭ ގޮތުން މަޝްވަރާކުރި ކަމަށެވެ.
ކުރިއަށް އޮތް ތަނުގައި އިތުރު މަޝްވަރާތަކަށް ބައްދަލުކުރުމަށް ދެ ފަރާތުން އެއްބަސްވި ކަަމަށް ވެސް އެ ޕޯސްޓުގައި ބުނެފައިވެ އެވެ.
ސީއެންޕީސީ އަކީ އެ ގައުމުގެ ސަރުކާރުން 82 ޕަސެންޓު ހިއްސާވާ ތެލާއި ގޭހުގެ ވިޔަފާރިކުރާ ކުންފުންޏެކެވެ. މިއީ މިހާރު ދުނިޔޭގައި އޮތް އެންމެ ބޮޑު އެއް ކުންފުންޏެވެ. އެގޮތުން 2022 ގައި ފޯޗިއުން ގްލޯބަލް 500 އިން އެކުލަވާލާ އެންމެ ގިނަ އާމްދަނީ ލިބުނު ކުންފުނިތަކުގެ ލިސްޓުގެ ހަތަރުވަނަ ސީއެންޕީސީ އިން ހޯދި އެވެ.
ރާއްޖެއިން ޗައިނާއަށް ކަނޑައަޅާފައި ހުންނަ ސަފީރުގެ މަގާމަށް، ރައްޔިތުންގެ މަޖިލީހުގެ ރުހުމާއެކު ރައީސް ޑރ. މުހައްމަދު މުއިއްޒު، ފަޒީލް އައްޔަންކުރެއްވީ މެއި 7، ގަ އެވެ. އޭގެ ކުރިން އޭނާ ހުންނެވީ އެމްބެސެޑާ އެޓް ލާޖުގެ މަގާމުގަ އެވެ. ފޮރިން މިނިސްޓްރީގެ ސްޓޭޓް މިނިސްޓަރު ކަމާއި އެމްއެމްއޭގެ ގަވަރުނަރުކަން ވެސް އޭނާ ކުރިން ކުރެއްވި އެވެ.
ޕީއެންސީގެ ވެރިކަމުގައި ހާރިޖީ ގޮތުން އެންމެ ގާތްކޮށް ގެންގުޅެނީ ޗައިނާ އެވެ. އެގޮތުން ރައީސް މި އަހަރުގެ ޖެނުއަރީގައި ކުރެއްވި ދަތުރުގައި 20 އަށްވުރެ ގިނަ އެއްބަސްވުމުގައި ސޮއިކުރައްވާ ގިނަ މަޝްވަރާތަކެއް ބޭއްވި އެވެ.
އޭގެފަހުންވެސް ވަޒީރުންގެ އެކި ވަފުދުތަކުން ޗައިނާއަށް ގޮސް އެ ގައުމުގެ އިސްވެރިންނާއެކު މާލީ އެހީ ހޯދުމާއި ފަތުރުވެރިކަން ކުރިއެރުވުން އަދި މަޝްރޫއުތައް ހިންގުމުގެ ދާއިރާއިން ދެ ގައުމުގެ ދެމެދުގައި ގިނަ މަޝްވަރާތަކެއް ވަނީ ކޮށްފަ އެވެ.
