ސައުތު އޭޝިއަން އެސޯސިއޭޝަން ފޯ ރީޖެނަލް ކޯޕަރޭޝަން (ސާކް) ގެ ސެކްރެޓަރީ ޖެނެރަލްގެ މަގާމާ އަލަށް ހަވާލުވެވަޑައިގެންނެވި އެމްޑީ ގޮލަމް ސަރުވާރު ރާއްޖެއަށް ވަޑައިގެންފި އެވެ.
މިދިޔަ އަހަރުގެ އޮކްޓޯބަރުގައި މަގާމާ ހަވާލުވެވަޑައިގެންނެވި ސަރުވާރު ރާއްޖެއަށް ވަޑައިގެންނެވީ ތައާރަފުވެވަޑައިގަތުމުގެ ދަތުރުފުޅެއްގައި މިއަދެވެ. މި ދަތުރުފުޅުގައި ރައީސް ޑރ. މުހައްމަދު މުއިއްޒުގެ އަރިހަށް ވެސް އިހުތިރާމުގެ ޒިޔާރަތެއް ކުރެއްވުމަށް ވަނީ ނިންމައިފަ އެވެ.
އޭގެއިތުރުން ފޮރިން މިނިސްޓަރު، މޫސާ ޒަމީރުއާއި ފޮރިން ސެކްރެޓަރީ ފާތުމަތު އިނާޔާ އާ ބައްދަލު ކުރެއްވުމަށް ވެސް ހަމަޖެހިފައިވާ ކަމަށް ފޮރިން މިނިސްޓަރީން ބުންޏެވެ.
މި ދަތުރުފުޅުގައި ސަރުވާރުގެ އަނބިކަނބަލުން ތަސްލީމާ ސަރުވާރާއި ސާކް ސެކްރެޓޭރިއެޓް ޑިރެކްޓާ، ޝާހިޔާ އަލީ މަނިކު އަދި ބަވެޝް ރ. ޓްރިވެޑީ ބައިވެރިވެވަޑައިގަންނަވަ އެވެ.
ބަންގުލަދޭޝްއަށް ނިސްބަތްވެވަޑައިގަންނަވާ ސަރުވާރަކީ ސާކްގެ 15 ވަނަ ސެކްރެޓަރީ ޖެނެރަލް އެވެ. އޭނާގެ ކުރިން އެ މަގާމުގައި ހުންނެވީ އަވަށްޓެރި ސްރީލަންކާގެ އީސަލް ވީރަކޫން އެވެ.
