ބިޒްނަސް ސެންޓާ ކޯޕަރޭޝަން (ބީސީސީ) މާލޭގައި 11 ބުރީގެ އިމާރާތެއް އަޅަން ނިންމައިފި އެވެ.
މަޝްރޫއުގެ އީއައިއޭ ރިޕޯޓުން އެނގޭ ގޮތުގައި ބީސީސީގެ އާ އިމާރާތް އަޅަނީ ޗާންދަނީ މަގަށް އިންނަ ދަނބު ގޯޅީގެ ކަންމަތީގަ އެވެ. އެ ބިން މިހާރު ވަނީ ބަންދުކޮށް އިމާރާތް ފެށުމަށް ތައްޔާރު ކޮށްފަ އެވެ.
ބީސީސީއިން އީއައިއޭއަށް ދިން މައުލޫމާތުން އެނގޭ ގޮތުގައި މި އިމާރާތް ތަރައްގީކުރަނީ ކުދި އަދި މެދުފަންތީގެ ވިޔަފާރިތަކަށް ޖާގަ ދޫކުރުމަށް ހާއްސަކޮށްގެންނެވެ. ބެލެވޭ ގޮތުގައި އެ އިމާރާތުގައި ވިޔަފާރި ކުރުމަށާއި އޮފީސް ހިންގުމަށްވެސް ޖާގަ ދޫކުރާނެ އެވެ.
އެ އިމާރާތް އެޅުމުގެ މަސައްކަތް ކުރާނީ ރާއްޖޭގެ މަޝްހޫރު ކޮންސްޓްރަކްޝަން ކުންފުނި ފެޑޯ ކޮންސްޓްރަކްޝަން އިންނެވެ.
ބީސީސީގެ އާ އިމާރާތް ބެހިގެންދާނެ ގޮތް
- އެއް ވަނަ ފަންގިފިލާ - ވިޔަފާރި ފިހާރަތައް
- ދެ އަދި ތިން ވަނަ ފަންގިފިލާ - އޮފީސް ޖާގަތައް
- ހަތަރު ވަނަ ފަންގިފިލާ - ފަންނުވެރިންނަށް ހާއްސަ އާޓް ސްޓޭޝަންތައް އަދި އޮފީސް ޖާގަތައް
- ފަސް އަދި ހަ ވަނަ ފަންގިފިލާ - ޝެއާ ކުރެވޭ ނުވަތަ ވަކިން މަސައްކަތް ކުރެވޭ އޮފީސް ޖާގަތައް
- ހަތް ވަނަ ފަންގިފިލާ - މީޓިން ރޫމާއި ޕޭންޓްރީ އެކުލެވޭ އޮފީސްތަައް
- އަށް ވަނަ ފަންގިފިލާ - ގުދަން، ޕޭންޓްރީ އަދި ނަމާދު ކުރާނެ ޖާގަވެސް ހިމެނޭ އޮފީސްތައް
- ނުވަ ވަނަ ފަންގިފިލާ - މީޓިން ރޫމްތަކާއި އެގްޒެކެޓިވް ރޫމްތައް ހިމެނޭ މާސްޓާ އޮފީހެއް
- 10 އަދި 11 ވަނަ ފަންގިފިލާ - އިންޑޯ އަދި އައުޓްޑޯ ޖާގަ ހިމެނޭ ކެފޭ އެއް
އީއައިއޭގައި ވާގޮތުން އެ މަޝްރޫއު މަސައްކަތް ކުރިއަށް އޮތް ދެތިން ހަފުތާގެ ތެރޭގައި ފެށޭނެ އެވެ. މި މަސައްކަތް ހަވާލުކޮށްފައިވަނީ ތިން އަހަރު ތެރޭގައި ނިންމާ ގޮތަށެވެ.
ބީސީސީއިން އާ އިމާރާތެއް އަޅަން ނިންމާފާ މިވަނީ ކުންފުނި ހިންގުމުގެ ހަރަދުބޮޑުވެ، ބީސީސީއިން ހިންގާ އެސްއެމްއީ ހަބުގެ ދެ ފްލޯއެއް ދޫކޮށްލަން ނިންމާފައިވާ ދުވަސްވަރެއްގަ އެވެ.
"ހަރަދު ބޮޑުވެގެން މި ދޫކޮށްލަނީ ބީސީސީއިން ހިންގާ ދެ ފްލޯ،" މެނޭޖިން އިބްރާހިމް ޒިޔާއު ޖުލައި 7، ގައި "އަދަދު" އަށް ވިދާޅުވި އެވެ.
ބީސީސީއިން ދޫކޮށްލަން ނިންމި ދެ ފްލޯގެ ތެރެއިން މަތީ ފްލޯއަކީ އެކި ކަހަލަ ގޭމްތައް ކުޅެވޭ ގޮތަށް ތަރައްގީކޮށް ހިންގަމުންދިޔަ ފްލޯއެކެވެ. އެސްއެމްއީ ހަބަކީ މިދިޔަ ސަރުކާރުގެ އިކޮނޮމިކް މިނިސްޓްރީން ކުރިއަށް ގެންދިޔަ މަޝްރޫއެއްގެ ދަށުން ވުޖޫދަށް ގެނެސްފައިވާ ތަނެކެވެ.
ރާއްޖޭގެ މާލީ ހާލަތު ގޯސްވެ ދައުލަތުން ވަނީ މި ދަނޑިވަޅުގައި ހަރަދުކުޑަކުރުމަށް ފިޔަވަޅުތަކެއްވެސް އަޅާފަ އެވެ. އެ ފިޔަވަޅުތަކުގެ ތެރޭގައި ބީސީސީ ފަދަ ސަރުކާރު ހިއްސާވާ ކުންފުނިތަކުގެ ހަރަދުކުޑަކުރުމަށްވެސް އަންގާފައިވެ އެވެ.
މި މަޝްރޫއަށް ފައިސާ ހަމަޖައްސާ ގޮތް ސާފެއް ނޫނެވެ.
