ރައީސް ޑރ. މުހައްމަދު މުއިއްޒުގެ ސަރުކާރުގައި އިގުތިސޯދީ ހަކަތަ ނެތް ކަން ފެންނަން އެބަ އޮތް ކަމަށާއި އާންމު ރައްޔިތުންނަށް އޭގެ ތާށިކަން އައުން ގާތް ކަމަށް ޕީއެންއެފްގެ ލީޑަރު އަދި ކުރީގެ ރައީސް އަބްދުﷲ ޔާމީން ވިދާޅުވެއްޖެ އެވެ.
ޕީއެންއެފްގެ ހަރުގޭގައި ރޭ ބޭއްވި ޖަލްސާގައި އެމަނިކުފާނު ވިދާޅުވީ މިދިޔަ މަސްތަކުގައި ސަރުކާރުން ދައުލަތުގެ މުވައްޒަފުންގެ މުސާރަތަކާއި އިދާރީ ހަރަދުތައް ހަމަޖައްސާފައިވަނީ ސަރުކާރުގެ ކުންފުނިތަކުގެ ނަމުގައި ބޭންކް އޮފް މޯލްޑިވްސް (ބީއެމްއެލް) އިން ލޯނު ނަގައިގެން ކަމަށެވެ.
އެއީ އެއް ކަމަކަށް ދައުލަތުގެ ހަރަދުތައް ހަމަޖެއްސުމަށް ޓަކައި ލޯނު ނުނަންގަވާނެ ކަމަށް ރައީސް މުއިއްޒުގެ ރިޔާސީ ކެމްޕެއިނުގައި ދެއްކެވި ވާހަކަފުޅުތަކަށް ފުށުއަރާ ކަމެއް ކަމަށް ވެސް ޔާމީން ވިދާޅުވި އެވެ.
"ރައްޔިތުންނަށް އެއްވެސް ކަހަލަ ދައްޗެއް ނެތޭ ވިދާޅުވާތީ، އަޅުގަނޑު ހަމަ ސަމާލު ކަމަށް މި ގެންނަނީ، ނޫނެކޭ، ތެދު ބަހުން ވާހަކަ ދައްކަވާށޭ، އެއީ ރައްޔިތުން ކޮންމެހެން ރައީސް މުއިއްޒު ދެކެ ރުޅި އަންނާނެ ކަމެއް ނޫނޭ،" ވެރިކަންކުރާ ޕީއެންސީން ވަކިވެވަޑައިގެންނެވި ޔާމީން ވިދާޅުވި އެވެ.
ސަރުކާރުގައި "އިގުތިސޯދީ ހަކަތަ" ނެތް ކަމަށް ޔާމީން ތަކުރާރުކޮށް ވިދާޅުވި އެވެ. މުވައްޒަފުންގެ މުސާރައިގެ އިތުރުން ކަރަންޓާއި ފެން ބިލު ފަދަ އިދާރީ ހަރަދުތައް ހަމަޖައްސަން ލޯނު ނަގާނަމަ އެއީ ވަރަށް ބޮޑު މައްސަލައެއް ކަމަށް ޔާމީން ވިދާޅުވި އެވެ.
"މުސާރަދޭން ލޯނު ނަގާ ކަމަށް ވަންޏާ އެޑްމިޓްކުރާށޭ [އިއުތިރާފްވާށޭ] ސަރުކާރުގައި ހަކަތަ ނެތިއްޔޭ، ސަރުކާރުގެ އިގުތިސާދީ ހަތަކަ ނެތިއްޔޭ،" އެމަނިކުފާނު ވިދާޅުވި އެވެ.
އެންމެ ފަހުން ސަރުކާރުން ހަރަދު ކުރި ގޮތާއި ލިބުނު އާމްދަނީގެ ތަފުސީލުތައް ލިބެން އޮތީ މީގެ ހަ ހަފުތާ ކުރިންނެވެ. ވީކްލީ ރިޕޯޓުތައް ފިނޭންސް މިނިސްޓްރީން ގަވާއިދަކުން ނުނެރެ އެވެ.
ޔާމީން އެ ކަމަށް ވެސް ރޭ ފާޑުވިދާޅުވި އެވެ.
ހަރަދު ކުޑަކުރުމުގެ ސިޔާސަތު ސަރުކާރުން ގެންގުޅެނީ "ރައްޔިތުންނަށް ނޭނގޭ ގޮތަށް" ކަމަށް ބުންޏަސް އޭގެ އިހުސާސް ރައްޔިތުން ކުރަމުންދާ ކަމަށް އެމަނިކުފާނު ވިދާޅުވި އެވެ. ސަރުކާރުގެ ވާހަކަ އެމަނިކުފާނު ސިފަކުރެއްވީ ރައްޔިތުންނަށް އެ މައުލޫމާތު ސިއްރުކޮށްފައި ބޭއްވުމަށެވެ.
"ފަހަރުގައި އެ ބުނަނީ ރައްޔިތުންނަށް ނޭނގޭނެއޭ އަހަރުމެން ސިއްރުކޮށްފައި ބޭއްވިމައެއް، އެހެންވެގެން އެ މައުލޫމާތު ކޮންމެ ހަފުތާއަކު މި އާންމު ނުކުރަނީ، އެކަމަކު ރައްޔިތުންނަށް މި ކަން އެބަ ފީލްވޭ، ތާށިވާ ކަމުގެ އިހުސާސް އެބަ ކުރޭ،" ޔާމީން ވިދާޅުވި އެވެ.
