ހުޅުމާލޭގައި އިއްޔެ ހިނގި އެކްސިޑެންޓާއި ގުޅިގެން ހައްޔަރުކުރި މީހުން މައްސަލަ ބަލައި ނިމެންދެން ބަންދުގައި ބެހެއްޓުމަށް ކޯޓުން ނިންމައިފި އެވެ.
މި މައްސަލަ ބަލައި ނިމެންދެން ބަންދުގައި ބަހައްޓަން ނިންމީ އެ މައްސަލާގައި ހައްޔަރުކުރި އިބްރާހިމް އިކުރާމް އާއި އިކުރަމުއްރަހުމާން އެވެ.
ކޯޓުގައި އިކުރަމުއްރަހުމާން ބުނީ އޭނާ އިނީ ކާރުގެ ފަހަތު ސީޓުގައި ކަމެވެ. މިކަމާއި ގުޅިގެން އިކުރާމް ކޯޓުގައި ވާހަކައެއް ނުދައްކަ އެވެ.
މިކަމުގައި ހައްޔަރުކުރި ތިން ވަނަ މީހާ އާއި ބެހޭގޮތުން މައުލޫމާތު ހިއްސާއެއް ނުކުރެ އެވެ.
މި އެކްސިޑެންޓުގައި އަނިޔާވި މީހާއަށް އައިޖީއެމްއެޗް އިން އަވަސް ފަރުވާ ވަނީ ދީފަ އެވެ. އަދި މިހާރު އޭނާގެ ހާލު ސްޓޭބަލް ކަމަށާއި ވޯޑަށް ނެރިފައިވާ ކަމަށް ވެސް މައުލޫމާތު ލިބެ އެވެ.
ވިނަރެސް ފުލެޓުތައް ކައިރީގައި އިއްޔެ ހިނގި އެ އެކްސިޑެންޓުގެ ވީޑިއޯއެއް ސޯޝަލްމީޑިއާގައި ވަނީ އާންމުވެފަ އެވެ. އެ ވީޑިއޯއިން ފެންނަ ގޮތުގައި އެކްސިޑެންޓްވީ ކޮންޓްރޯލުން ނެއްޓިގެން އައި ކާރެއް، މަގުގެ އެއްފަރާތުގައި ސައިކަލެއްގައި މަޑުކޮށްގެން އިން މީހެއްގެ ގައިގައި ޖެހިގެންނެވެ.
