ރައީސް ޑރ. މުހައްމަދު މުއިއްޒު، މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގެ ގަވަރުނަރުގެ މަގާމަށް އަހުމަދު މުނައްވަރު މިއަދު އައްޔަންކުރައްވައިފި އެވެ.
މުނައްވަރު ގަވަރުނަރުކަމަށް އައްޔަންކޮށް، މަގާމުގެ ފަތްކޮޅު ހަވާލުކުރީ ރައީސް އޮފީހުގައި ބޭއްވި ހާއްސަ ރަސްމިއްޔާތެއްގަ އެވެ.
ރައީސް އޮފީހުން ބުނީ އެ އެ ރަސްމިއްޔާތަށް ފަހު ރައީސް މުނައްވަރާ ބައްދަލުކުރެއްވި ކަމަށެވެ. މި ބައްދަލުކުރެއްވުމުގައި އިގުތިސޯދީ ހާލަތާއި މާލީ ދާއިރާއާ ގުޅޭގޮތުން މަޝްވަރާ ކޮށް، މާލީ އިދާރާތަކުން ގުޅިގެން މަސައްކަތް ކުރުމަށް ރައީސް ބާރު އެޅުއްވި ކަމަށް އެ އޮފީހުން ބުންޏެވެ.
ރައީސްގެ ވާހަތަކާ ގުޅިގެން، ގައުމުގެ އިގުތިސޯދު މިހާރު އޮތް ހާލަތުން އަރައިގަތުމަށް ފުރިހަމަ އެއްބާރުލުން ދެއްވާނެ ކަމުގެ ޔަގީންކަން ގަވަރުނަރު ދެއްވި ކަމަށް ވެސް ރައީސް އޮފީހުން ބުންޏެވެ.
މުނައްވަރުގެ ގަވަރުނަރުގެ މަގާމަށް އައްޔަން ކުރަން މަޖިލީހުން ރުހުން ދިނީ މަޖިލީހުގެ އިއްޔެ ޖަލްސާގައި އެކަމާ މެދު ގޮތެއް ނިންމަން ނެގި ވޯޓުގައި ބައިވެރިވެވަޑައިގެންނެވި 78 މެންބަރުންގެ އިއްތިފާގުންނެވެ.
މުނައްވަރަކީ ކުރީގެ ރައީސް އަބްދުالله ޔާމީންގެ ވެރިކަމުގައި ފިނޭންސް މިނިސްޓަރުކަން ކުރެއްވި ބޭފުޅެކެވެ. އޭނާ އެ މަގާމަށް އައްޔަނުކުރީ ޖޫން 22, 2016 ގަ އެވެ. ޔާމީންގެ ވެރިކަން ނިމެންދެން އެ މަގާމު އޭނާ ފުރުއްވި އެވެ.
މި ސަރުކާރުގައި އޭނާއަކީ ފިނޭންސް މިނިސްޓްރީގެ އެޑްވައިޒަރެވެ. މިނިސްޓަރެއްގެ ފެންވަރުގައި އޭނާ އައްޔަނުކުރީ ޑިސެމްބަރު 12, 2023 ގަ އެވެ.
އެމްއެމްއޭގެ ގަވަރުނަރު ކަމުގައި ކުރިން ހުންނެވި އަލީ ހާޝިމް މަގާމުން ވަކި ކުރީ އެމްއެމްއޭގެ ގާނޫނުގައި ބަޔާންކޮށްފައިވާ އެ އޮތޯރިޓީގެ މަގުސަދުތަކާއި މަސައްކަތްތައް އަދާކުރުމުގެ ގާބިލުކަން އޭނާގެ ކިބައިގައި ނެތް ކަމަށް މާލިއްޔަތު ކޮމިޓީއަށް ސާބިތުވާ ކަމަށް ބުނެ އެވެ.
