މިނިވަންދުވަހުގެ ރަސްމީ ޖަލްސާގައި ރައީސް ޑރ. މުހައްމަދު މުއިއްޒު ދޮޅު ގަޑިއެއްހާ އިރު ވަންދެން ދެއްކެވި ވާހަކައިގެ ތެރެއިން ގިނަ ބަޔަކު އަޅައިގަތް އެއް ކަމަކީ މި ވެރިކަމުގެ ކާމިޔާބީއެއްގެ ގޮތުގައި ކެބިނެޓުގެ ބައްދަލުވުންތަކުގެ އަދަދާއި ނިންމުންތައް ފާހަގަކުރެއްވުމެވެ.
އެމަނިކުފާނުވެސް ވަޒީރުކަން ކުރެއްވި ޕީޕީއެމްގެ ވެރިކަމާއި ނިމިދިޔަ އެމްޑީޕީގެ ވެރިކަމުގެ މަސައްކަތް މަދުކަމާއި ދުވެލި މަޑުކަން ދެއްކުމަށް އެ ސަރުކާރުތަކުގެ ކެބިނެޓު ނިންމުންތަކުގެ އަދަދުވެސް ރައީސް ހާމަކުރެއްވި އެވެ.
މި ވެރިކަމުގެ ފުރަތަމަ އަށް މަހު ކެބިނެޓުގެ 17 ބައްދަލުވުމެއް ބާއްވައި 225 ނިންމުމެއް ނިންމި ކަމަށް ރައީސް މުއިއްޒު ވިދާޅުވި އެވެ.
"އާދެ، މިއަދާ ހަމަޔަށް އައިއިރުގަ. މި ވޭތުވެދިޔަ އަށް މަސް ދުވަހުގެ ތެރޭގަ. އަޅުގަނޑުމެން ވަޒީރުންގެ މަޖިލީހުގެ 17 ބައްދަލުވުން ބޭއްވި. 225 ނިންމުމެއް ވާނީ ނިންމާފައި. އާދެ، 225 ނިންމުމެއް ނިންމި ވާހަކަ ދަންނަވާއިރުގަ. އެއީ، ވަރަށް ގިނަ މަޝްވަރާތައް. ވަރަށް ގިނަ ކަންކަން," އެމަނިކުފާނު އެރޭ ވިދާޅުވި އެވެ.
ކުރީގެ ރައީސް ޔާމީނުގެ ވެރިކަމުގެ އެ މުއްދަތުގައި ކެބިނެޓުގެ ހަތް ބައްދަލުވުމަކުން ނިންމީ އަށް ކަމެއް ކަމަށާއި ކުރީގެ ރައީސް އިބްރާހިމް މުހައްމަދު ސޯލިހުގެ ފުރަތަމަ އަށް މަހު ބޭއްވި ކެބިނެޓުގެ 14 ބައްދަލުވުމުން ނިންމީ 34 ކަމެއް ކަމަށް އެމަނިކުފާނު ވިދާޅުވީ ފަހުރުވެރިކަމާއެކު އެވެ.
މި ސަރުކާރުގެ ވަޒީރުންގެ މަޖިލީހުގެ ބައްދަލުވުންތަކުގައި ނިންމާ ކަންކަން ހާމަކުރަން ރައީސް އޮފީހުގެ ވެބްސައިޓުގައި ޕޭޖެއް ހާއްސަކުރާނެކަން ރައީސް އޮފީހުން އިއުލާނުކުރީ މި މެއި 6، ގަ އެވެ. އެ ޕޭޖުން ފެންނަ ހުރި ނިންމުންތަކާ ރައީސް ވިދާޅުވި އަދަދާ އަޅައިކިޔާލުމުން ފެނުނީ އެހެން މަންޒަރެކެވެ.
އެގޮތުން އެމަނިކުފާނު ވިދާޅުވި ބައްދަލުވުންތަކުގެ އަދަދުވެސް އަދި ނިންމުންތަކުގެ އަދަދުވެސް ރައީސް އޮފީހުގެ ވެބްސައިޓާ ދިމައެއް ނުވެ އެވެ. ބައްދަލުވުންތައް ވީ އިތުރެވެ. ނިންމުންތައް ވީ މަދެވެ.
ރައީސް އޮފީހުގެ ވެބްސައިޓުގައިވާ ގޮތުން ޖުލައި 26، އާ ހަމައަށް މި ވެރިކަމުގައި ކެބިނެޓުގެ 20 ބައްދަލުވުމެއް ބޭއްވި އެވެ. އެއީ ނޮވެމްބަރު މަހު އެއް ބަދަލުވުން، ޑިސެމްބަރު މަހު ފަސް ބައްދަލުވުން، ޖެނުއަރީ މަހު ހަތަރު ބައްދަލުވުން، ފެބްރުއަރީ މަހު ދެ ބައްދަލުވުން، މާޗު، އެޕްރީލް، އަދި މެއި މަހު އެއް ބައްދަލުވުމުގެ އިތުރުން ޖޫން މަހު ބޭއްވި ހަތަރު ބައްދަލުވުމާއި ޖުލައި މަހު ބޭއްވި އެއް ބައްދަލުވުމެވެ.
އެ ބައްދަލުވުންތަކައި ނިންމި ކަންކަމުގެ ގޮތުގައި ރައީސް އޮފީހުން ބުނާ އަދަދަކީ 136 އެވެ. އޭގެ ތެރެއިން ޑިސެމްބަރު މަހުގެ އެކަނި 97 ނިންމުމެއް ވަޒީރުންގެ މަޖިލީހުން ނިންމި އެވެ. މިއީ ރައީސް ވިދާޅުވި އަދަދަށްވުރެ 89 ނިންމުން މަދު އަދަދެކެވެ.
ރައީސް އޮފީހުގެ ވެބްސައިޓުން ކެބިނެޓުގެ ހުރިހާ ނިންމުމެއް ފެންނަން ހުންނާނެތޯ އެހުމުން، އެ އޮފީހުގެ ކޮމިއުނިކޭޝަން މިނިސްޓަރު އިބްރާހިމް ހަލީލު "އަދަދު" އަށް ވިދާޅުވީ ކެބިނެޓުގެ ހުރިހާ ނިންމުމެއްވެސް ފެންނަން ހުންނާނެ ކަމަށެވެ.
