އެންޓި ކޮރަޕްޝަން ކޮމިޝަން (އޭސީސީ) އަށް މައްސަލަ ހުށަހަޅާ ފަރާތްތަކަށް އެ ހުށަހެޅި މައްސަލައެއްގެ އަދާހަމަ މެސެޖެއް މެދުވެރިކޮށް ފޮނުވޭނެ ނިޒާމެއް އެންމެ ފަހުން ތައާރަފުކޮށްފި އެވެ.
އޭސީސީން މިއަދު އެ ނިޒާމު އިފްތިތާހު ކުރީ "ލިބީގެ" ނަމުގަ އެވެ. އެ ކޮމިޝަނުން ބުނީ ދެން މައްސަލަ ހުށަހަޅާ ހިސާބުން މައްސަލަ ނިމެންދެން ތަހުގީގުގައި ހިމެނޭ ކޮންމެ މަރުހަލާއެއް ފެށުމުން އަދި ނިމުމުން އެކަމުގެ އަދާހަމަ ފޮނުވާނެ ކަމަށެވެ. އަދި މެސެޖު ފޮނުވަނީ ކާކުކަން އެނގޭ ގޮތަށް ކަމަށެވެ.
"މިއަދު ތައާރަފުކުރި "ލިބީގެ" ފަންކަޝަންގެ ސަބަބުން ކޮމިޝަނަށް ހާޒިރު ނުވެ މައްސަލައިގެ އަދާހަމަ ބެލުމަށް އިތުރު ވަގުތު ހޭދަ ކުރުމަކާނުލައި މައްސަލައިގެ އަދާހަމަ ލިބިގެންދާނެ،" އޭސީސީން ބުންޏެވެ.
މައްސަލަތަކުގެ އަދާހަމަ ހޯދުމަށް އެދި ހުށަހަޅާ ހުށަހެޅުންތަކަށް ޖަވާބު ދިނުމަށް ހޭދަކުރަމުންދާ ވަގުތު ސަލާމަތްކުރެވ،ި ހުށައަޅާ މައްސަލައާ ގުޅިގެން ކޮމިޝަނުން ނިންމާ ނިންމުން ފަސޭހައިން އެނގިގެންދާނެ އެވެ.
އޭސީސީއަށް ހުށަހަޅާ މައްސަލަތަކުގެ އަދާހަމަ ފަސޭހައިން ލިބޭނެ ގޮތެއް ފަހިކޮށްދީފައި މިވަނީ އެ ކޮމިޝަނަށް ހުށަހަޅާ މައްސަލަތަކާ ގުޅޭ ގޮތުން، އެ ކޮމިޝަން ހާޒިރުކޮށްގެން، ރައްޔިތުންގެ މަޖިލީހުގެ މިނިވަން މުއައްސަސާތަކާ ބެހޭ ކޮމިޓީގައި މަޝްވަރާކުރި ފަހުންނެވެ.
