މި އަހަރުގެ މިހައިތަނަށް 64.84 ކިލޯގެ މަސްތުވާތަކެތި އަތުލައިގަންފައިވާ ކަމަށް މޯލްޑިވްސް ކަސްޓަމްސް ސާވިސަސްއިން ބުނެފި އެވެ.
ފުލުހުންނާއި ކަސްޓަމްސް ގުޅިގެން މިއަދު ކުރިއަށް ގެންދިޔަ ނޫސްވެރިންގެ ބައްދަލުވުމުގައި ވާހަކަ ދައްކަވަމުން ހެޑް އޮފް އިންޓެލިޖެންސް މުހައްމަދު އަފްޒަލް ވިދާޅުވީ މިއަހަރުގެ މިހައިތަނަށް އެންމެ ގިނައިން އަތުލައިގަތީ ކެނެބިސް ކަމަށެވެ. އެގޮތުން މިއަހަރުގެ މިހައިތަނަށް 17.38 ކިލޯގެ ކެނެބިސް އަތުލައިގަނެފައިވާ ކަމަށް އަފްޒަލް ވިދާޅުވި އެވެ.
"އަތުލައިގަނެވުނު މަސްތުވާތަކެތީގެ ބާވަތަށް ބަލާނަމަ އެންމެ ގިނައިން އަތުލައިގަނެވިފައި މިވަނީ ކެނެބިސްގެ ބާވަތް، އެއީ 17.38 ގުރާމުގެ [ކިލޯގެ] ކެނެބިސް، ދެވަނައަށް އެންމެ ގިނަ ބާވަތެއްގެ ގޮތުގައި ފާހަގަކުރެވެނީ ހެރޮއިން، ހެރޮއިންގެ ފަސް ކޭސްއަކުން ޖުމުލަ 11.60 ކިލޯގްރާމް އަތުލައިގަނެވިފައިވޭ،" އަފްޒަލް ވިދާޅުވި އެވެ.
ކަސްޓަމްސްގެ ތަފާސްހިސާބުތަކުން ދައްކާގޮތުން މިއަހަރުގެ ޖެނުއަރީން ޖުލައިގެ ނިޔަލަށް ކަސްޓަމަސްއިން އަތުލައިގަތް މަސްތުވާތަކެތީގެ މަގުމަތީ އަގު 106،358،952ރ. އަށް އަރަ އެވެ.
ކަސްޓަމްސްއިން އަތުލައިގަތް މަސްތުވާތަކެތީގެ ތަފާސްހިސާބު
- ކެނެބިސް - 17.38 ކިލޯ
- ހެރޮއިން - 11.60 ކިލޯ
- ކޮކެއިން - 15.64 ކިލޯ
- ސިންތެޓިކް ކެތިނޯން - 14.10 ކިލޯ
- މެތަމްފެޓަމިން - 4.62
- އެމްޑީއެމްއޭ - 1.15
- އެމްފެޓަމިން - 0.35
އަފްޒަލް ވިދާޅުވީ މަސްތުވާތެކެތީގެ ވިޔަފާރި ކުރާ ގުރޫޕުތަކުން ދިވެހިން އާންމުކޮށް ގޮސްއުޅޭ ގައުމުތަކުގައި ހަރަކާތްތެރިވަމުންދާ ކަމަށެވެ. އެހެންކަމުން އެ ގައުމުތަކަށް ދަތުރުކޮށް އުޅޭ މީހުން ގޮތް ނޭނގޭ މީހުން ހަވާލު ކުރާ ތަކެއްޗާ މެދު ސަމާލުވުމަށް އަފްޒަލް އިލްތިމާސް ކުރެއްވި އެވެ.
ވައިގެ މަގުން ރާއްޖެއަށް އެތެރެކުރާ މަސްތުވާތެކެތީގެ މައްސަލަތަކުގައި މީގެ ކުރިން ހައްޔަރު ކުރި ބައެއް މީހުންނަކީ އެގޮތަށް އެހެން މީހަކު ދިން އެއްޗެއް އުފުލައިދިން މީހުންނެވެ. އެފަދަ މީހުންގެ ކުށެއް ނެތް ނަމަވެސް އެމީހެއްގެ އަމިއްލަ ލަގެޖުން މަސްތުވާތަކެތި ފެނިއްޖެ ނަމަ އެކަމަށް އެމީހަކު ޒިންމާ ވާން ޖެހޭނެ އެވެ.
