ސިޔާސީ މުވައްޒަފުންގެ އަދަދު 700 އަށް ވުރެ ގިނަ ނުކުރާނެ ކަމަށް ސަރުކާރުން ވެފައިވާ ވައުދާ ހިލާފުވެ، މެއި މަހާ ހަމައަށް 18 މިނިސްޓްރީގައި 799 ސިޔާސީ މުވައްޒަފުން ތިބި ކަން މިނިސްޓްރީތަކުން ދިން މައުލޫމާތުތަކުން އެނގިއްޖެ އެވެ.
މައުލޫމާތު ހޯދައި ލިބިގަތުމުގެ ހައްގުގެ ގާނޫނުގެ ދަށުން "އަދަދު" ނޫހުން ވަނީ ނޮވެމްބަރު 17, 2023 އިން މެއި 1, 2024 އާ ހަމައަށް ރައީސް އޮފީހާއި 22 މިނިސްޓްރީއަށް އެއިން ކޮންމެ މިނިސްޓްރީއެއްގައި ތިބި ސިޔާސީ މުވައްޒަފުންގެ އަދަދު ދިނުމަށް އެދިފަ އެވެ.
އޭގެ ތެރެއިން 19 މިނިސްޓްރީއަކުން ޖަވާބު ދީފައިވެ އެވެ. އެޑިއުކޭޝަން މިނިސްޓްރީން ފުރަތަމަ ދިން ޖަވާބަކީ ސިޔާސަތު ހިންގުމަށް ހުރަސް އެޅޭތީ އެ މައުލޫމާތު ދެވެން ނެތް ކަމަށެވެ. ނަމަވެސް އިންފޮމޭޝަން ކޮމިޝަނަރުގެ އޮފީހުގެ އަޑުއެހުމުގައި މިނިސްޓްރީން ބުނީ މައުލޫމާތު ހިއްސާކުރާނެ ކަމަށެވެ.
ބާކީ 18 މިނިސްޓްރީން ވަނީ އެ މިނިސްޓްރީގައި ތިބި ސިޔާސީ މުވައްޒަފުންގެ އަދަދު ހިއްސާކޮށްފަ އެވެ.
މޭ މަހާ ހަމައަށް ސިޔާސީ މުވައްޒަފުންގެ އަދަދު ހުރި ގޮތުން
- ޑިފެންސް މިނިސްޓްރީ - ހަތް ސިޔާސީ މުވައްޒަފުން
- ފޮރިން މިނިސްޓްރީ - 16 ސިޔާސީ މުވައްޒަފުން
- ހޯމްލޭންޑް މިނިސްޓްރީ - 53 ސިޔާސީ މުވައްޒަފުން
- ފިނޭންސް މިނިސްޓްރީ - 18 ސިޔާސީ މުވައްޒަފުން
- ހެލްތު މިނިސްޓްރީ - 26 ސިޔާސީ މުވައްޒަފުން
- އިކޮނޮމިކް މިނިސްޓްރީ - 34 ސިޔާސީ މުވައްޒަފުން
- ފިޝަރީޒް މިނިސްޓްރީ - 39 ސިޔާސީ މުވައްޒަފުން
- ޓުއަރިޒަމް މިނިސްޓްރީ - 29 ސިޔާސީ މުވައްޒަފުން
- ޖެންޑާ މިނިސްޓްރީ - 66 ސިޔާސީ މުވައްޒަފުން
- ސްޕޯޓްސް މިނިސްޓްރީ - 195 ސިޔާސީ މުވައްޒަފުން
- އެންވަޔަރަމަންޓް މިނިސްޓްރީ - 47 ސިޔާސީ މުވައްޒަފުން
- ކަލްޗާ މިނިސްޓްރީ - 35 ސިޔާސީ މުވައްޒަފުން
- ހަޔާ އެޑިއުކޭޝަން މިނިސްޓްރީ - 32 ސިޔާސީ މުވައްޒަފުން
- އިންފްރާސްޓްރަކްޗާ މިނިސްޓްރީ - 40 ސިޔާސީ މުވައްޒަފުން
- އެގުރިކަލްޗާ މިނިސްޓްރީ - 31 ސިޔާސީ މުވައްޒަފުން
- ޔޫތު މިނިސްޓްރީ - 71 ސިޔާސީ މުވައްޒަފުން
- ޓްރާންސްޕޯޓް މިނިސްޓްރީ - 58 ސިޔާސީ މުވައްޒަފުން
- އެޓާނީ ޖެނެރަލްގެ އޮފީސް - ދެ ސިޔާސީ މުވައްޒަފުން
ރައީސް ޑރ. މުހައްމަދު މުއިއްޒުގެ ސަރުކާރުގެ ސިޔާސީ މަގާމުތައް 700 އަށްވުރެ އިތުރު ނުކުރަން އެމަނިކުފާނު ނިންމާފައިވާ ކަން ހާމަކުރީ އިންތިހާބީ ރައީސްގެ ގޮތުގައި އެމަނިކުފާނު ހުންނެވި އިރު އިންތިހާބީ ރައީސްގެ ތަރުޖަމާނު މުހައްމަދު ފިރުޒުލެވެ.
އޭނާ އެ ދުވަހު ވިދާޅުވި ގޮތުގައި އެއީ މިނިސްޓްރީތަކުގެ އިތުރުން ރައީސް އޮފީހާއި މުލިއާގެ ވެސް ހިމެނޭ ގޮތަށެވެ.
ރައީސް އޮފީހުން ދިން ޖަވާބަކީ ވެބްސައިޓުން އެ އަދަދު އެނގޭނެ ކަމަށެވެ. އެކަމަކު ރައީސް އޮފީހުގެ ވެބްސައިޓު އަދާހަމަވަމުން ނުދާ ކަން ފާހަގަވެ އެވެ. އަދި ފޮރިން މިނިސްޓްރީން ދިން އަދަދަކީ ވެސް އެމްބަސީތަކުގައި ތިބި ސިޔާސީ މުވައްޒަފުންގެ އަދަދު ނުލަ އެވެ.
މީގެ އިތުރުން ހަތަރު މިނިސްޓްރީއަކުން އަދި މައުލޫމާތެއް ނުލިބެ އެވެ. އެއީ ލޯކަލް ގަވަނަންސް މިނިސްޓްރީ، ހައުސިން މިނިސްޓްރީ، އިސްލާމިކް މިނިސްޓްރީ، އަދި އެޑިއުކޭޝަން މިނިސްޓްރީ އެވެ.
