ގެދޮރުވެރިކަމުގެ މައްސަލައަށް ހައްލު ގެނައުމަށްޓަކައި އަންނަ އޮކްޓޯބަރު މަހުން ފެށިގެން ކުޑަ އިންޓްރެސްޓަކާއެކު ލޯނު ދޫކުރަން ފަށާނެކަން ރައީސް ޑރ. މުހައްމަދު މުއިއްޒު ރޭ ވިދާޅުވެއްޖެ އެވެ.
މިނިވަން ދުވަހުގެ ރަސްމީ ޖަލްސާގައި ރައީސް މުއިއްޒު ވިދާޅުވީ ގެދޮވެރިކަމަށް އޮކްޓޯބަރު މަހު ލޯނު ދޫކުރަން ފަށާނީ ފަސް އިންސައްތައަށްވުރެ އިންޓްރެސްޓު ރޭޓު ބޮޑުނުވާ ގޮތަށް ކަމަށެވެ.
"އަޅުގަނޑު ދެންނެވިން ފަސް ޕަސަންޓަށްވުރެ ބޮޑު ނޫން އިންޓްރެސްޓު ރޭޓުގައި ލޯނު ދޫކުރަން ފަށާނަމޭ. މީގެ ހުރިހާ މަސައްކަތެއް ގާތްގަނޑަކަށް ނިމިއްޖެ. ތިން ބާވަތެއްގެ ލޯނު ލިބޭނެ ތިން ކެޓަގަރީއަކަށް،" ރައީސް މުއިއްޒު ވިދާޅުވި އެވެ.
އެ ސްކީމްގެ ދަށުން ހަ މިލިއަން ރުފިޔާއާ ހަމައަށް ކެޕް ކުރެވޭ ލޯނު ދޫކުރާނީ އާބަން ސެންޓަރުތަކަށް ކަމަށާއި ތިން މިލިއަން ރުފިޔާއަށް ކެޕް ކުރެވޭ ލޯނު ދޫކުރާނީ އާބަން ސެންޓަރުތަކަށް ކަމަށާއި އެހެން ރަށްތަކަށް ދޭނީ އެއް މިލިއަން ރުފިޔާގެ ލޯނުތައް ކަމަށް ވެސް އެމަނިކުފާނު ވިދާޅުވި އެވެ.
ރައީސް ވިދާޅުވި ގޮތުގައި އެ ލޯނު ބޭނުންކޮށްގެން އަލުން ގެއެއް އިމާރަތް ކުރުމުގެ އިތުރުން، ނުނިމިހުރި ގެއެއް ނިންމަން ވެސް އެ ސްކީމްގެ ދަށުން ލޯނު ދޫކުރާނެ އެވެ.
"ނިންމައިލުމަށް ޓަކައި ބޭނުންވާ ލޯނުގެ ކޮންމެވެސް ޕަސަންޓެއް މިއިން އަދި އެނަގާ ލޯނު ހަދަން ފަށާ ބާކީބައި ބޭންކަށް ވަދެގެން ހޯދުމުގެ މަގުވެސް އެބަ ފަހިވެގެންދޭ. އެހެންވީމަ ބޭންކުތަކުން ދޭ 12 ޕަސަންޓު ބޮޑު އިންޓްރެސްޓް ރޭޓުގައި ނަގަން ނުޖެހި ފަސް ޕަސަންޓުގެ އިންޓްރެސްޓް ރޭޓުގައި ލޯނު ދޫކުރުމުގެ ނިޒާމު ގާއިމުކުރާނެ ކަމަށް އަޅުގަނޑު ދެންނެވިން،" ރައީސް މުއިއްޒު ވިދާޅުވި އެވެ.
ރައީސް ވިދާޅުވީ މީގެ ނަތީޖާއަކަށް ވެގެންދާނީ މި ފަސް އަހަރު ތެރޭގައި އަމިއްލަ ބާރުގައި، އަމިއްލައަށް ބޭނުންވެގެން ގެދޮރު އަޅަން ބޭނުންވާ ހުރިހާ އެންމެންނަށް ލޯނު ލިބިގެންދިޔުން ކަމަށާއި ސަރުކާރުން ހިންގާ މަޝްރޫއުތަކުން ރާއްޖޭގެ އެކި ކަންކޮޅުގައި ގެދޮރު އެޅިގެންދާނެ ކަމަށެވެ.
ރާއްޖެއަށް ދިމާވެފައިވާ ގެދޮރުގެ މައްސަލައަށް ޖުމްލަ ހައްލެއް މި ދައުރުގައި ހޯދައި ދިނުމަކީ ރައީސް މުއިއްޒުގެ އެންމެ ބޮޑު ވައުދެވެ. އެގޮތުން ރަސްމާލޭގައި އެކަނި ވެސް މި ދައުރުގައި 30،000 ހައުސިން ޔުނިޓް އަޅާނެ ކަމަށް އެމަނިކުފާނު ވަނީ ވައުދުވެފަ އެވެ.
