މޯލްޑިވްސް މަނިޓަރީ އޮތޯރިޓީގެ ގަވަރުނަރުގެ މަގާމަށް އައްޔަންކުރެއްވުމަށް ރައީސުލްޖުމްހޫރިއްޔާ ރައްޔިތުންގެ މަޖިލީހަށް ނަން ފޮނުވާފައިވާ ކުރީގެ ފިނޭންސް މިނިސްޓަރު ޑރ. އަހްމަދު މުނައްވަރާ ގުޅޭ ގޮތުން އާއްމުންގެ ޝަކުވާއެއް އޮތްތޯ ބަލަން މަޖިލީހުން މަސައްކަތް ފަށައިފި އެވެ.
މަޖިލީހުން މިއަދު ކުރި އިއުލާނެއްގައި ބުނީ އެމްއެމްއޭގެ ގަވަރުނަރުގެ މަގާމަށް އައްޔަނުކުރެއްވުމަށް ރައީސް ފޮނުއްވާފައިވާ ނަންފުޅާ ގުޅޭގޮތުން އާންމުންގެ ޝަކުވާއެއްވޭތޯ ބަލަން ރައްޔިތުންގެ މަޖިލީހުގެ ގަވާއިދުގެ 201 ވަނަ މާއްދާގެ (ރ) ގެ ދަށުން ހުޅުވާލައިފައިވާ ކަމަށެވެ.
އެ އިއުލާނުގައި ބުނީ މުނައްވަރާ ގުޅޭ ޝަކުވާއެއް އޮތް ނަމަ މާދަމާ މެންދުރު ފަހު 2:00 ގެ ކުރިން މަޖިލީހަށް ހުށަހަޅަން އެދޭ ކަމަށެވެ. އެ އިއުލާނުގައިވާ ގޮތުން ޝަކުވާ ހުށަހެޅޭނީ ޝަކުވާ ހުށަހަޅާ މީހާގެ ފުރިހަމަ ނަމާއި، ދާއިމީ އެޑްރެހާއި އަދި ގުޅޭނެ ފޯން ނަންބަރު ވެސް ޖަހައިގެންނެވެ. ޝަކުވާ ހުށަހެޅޭނީ އެ މައުލޫމާތު ތަކާ އެކު ފޮނުވާ ސިޓީ ނުވަތަ އީމެއިލްގެ ޒަރިއްޔާއިންނެވެ.
މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގެ ގަވަރުނަރުގެ މަގާމަށް ފިނޭންސް މިނިސްޓަރުގެ އެޑްވައިޒަރުގެ މަގާމުގައި ހުންނެވި ހަމަޖެއްސުމަށް ރައްޔިތުންގެ މަޖިލީހުގެ ލަފާ ހޯދުމަށް ފޮނުވުމަށް ރައީސް ޑރ. މުހައްމަދު މުއިއްޒު ފޮނުއްވީ ކުރިން ގަވަރުނަރަކަށް ހުންނެވި އަލީ ހާޝިމް ވަކިކުރެއްވުމަށް ފަހުގަ އެވެ.
ހާޝިމް ވަކިކުރަން ލަފާ ދިނުމަށް މަޖިލީހުން ފާސްކުރީ އިއްޔެ އެވެ.
މުނައްވަރަކީ ކުރީގެ ރައީސް އަބްދުالله ޔާމީންގެ ވެރިކަމުގައި ފިނޭންސް މިނިސްޓަރުކަން ކުރެއްވި ބޭފުޅެކެވެ. އޭނާ އެ މަގާމަށް އައްޔަނުކުރީ ޖޫން 22, 2016 ގަ އެވެ. ޔާމީންގެ ވެރިކަން ނިމެންދެން އެ މަގާމު އޭނާ ފުރުއްވި އެވެ.
ފިނޭންސް މިނިސްޓަރުގެ އެޑްވައިޒަަރުގެ މަގާމަށް މިނިސްޓަރެއްގެ ފެންވަރުގައި އޭނާ އައްޔަނުކުރީ ޑިސެމްބަރު 12, 2023 ގަ
