ޗައިނާއިން ރާއްޖެއަށް ހަދިޔާކުރި 1500 ޓަނުގެ މިނެރަލް ފެން ކޭސްތައް ބަލަހައްޓާނެ މީހަނު ނެތި، ހުޅުމާލޭގެ ފަޅުތަނަކަށް ދޫކޮށްލާފައި ހުންނަތާ ބަހައްޓާފައި ހުންނަތާ ދެ މަސްދުވަސްވެއްޖެ އެވެ.
އެ ފެން ބޭނުން ކުރާނީ ރާއްޖޭގެ ރަށްރަށުން ސާފު ބޯފެން ހުސްވާ ދުވަސްވަރު އެ ރަށްތަށަށް ބޭނުންވާ ފެނުގެ ގޮތުގައި ފޯރުކޮށްދޭން ކަމަށް ފޮރިން މިނިސްޓަރީން އޭރު ބުނެފައިވެ އެވެ.
ނަމަވެސް އެ ކޭސްތައް ގެނައި ގޮތަށް ބަހައްޓާފައި ހުރީ ހުޅުމާލޭ އަސުރުމާ ހިނގުމުގައި ހުރި ވަގުތީ މިސްކިތެއްގެ ގޯތި ތެރޭގަ އެވެ. 100 އެތައް ޕެލެޓެއްގައި ޖަހާފައި ހުރި އެ ފެން ކޭސްތައް ހުންނަނީ ސަތަރި އަޅައި ބަންދު ކޮށްފަ އެވެ.
ބަލަހައްޓާނެ މީހަކު ނެތި އެތަނުގައި ފެން ކޭސްތައް ބަހައްޓާފައި ހުއްޓައި އޭގެތެރެއިން ބައެއް ކޭސްތައް ކަނޑައި ބޭނުން ވެސް ކޮށްފައިވާ ކަމަށް އެތަނުން ފެންނަ މަންޒަރުން ބެލެވެ އެވެ. އެތަނުގައި ބަޔަކު މީހުން ނިދައި، މަސްތުވާތަކެތި ބޭނުން ކޮށްފައި ހުރިކަމަށް ބެލެވޭ ނިޝާންތައް ވެސް އެބަ ހުއްޓެވެ.
ފެން ކޭސްތައް ބަހައްޓާފައި ހުރި ކުރީގެ މިސްކިތް ތެރޭގައި ބަޔަކު މީހުން ނިދަން އަޅާފައި ހުރި ގޮދަޑިތަކެއް. ފަހަތުގައި ހުރި ކަބަޑުގައި ޗައިނާޢިން ހަދިޔާކުރި ފެންފުޅިއެއް -- ފޮޓޯ: އަދަދު
ހޫނު މޫސުމުގައި ރާއްޖޭގެ ރަށްރަށުން ސާފު ބޯފެން ހުސްވުމުގެ މައްސަލައަކީ ކޮންމެ އަހަރަކު ވެސް ކުރިމަތިވާ މައްސަލަ އެކެވެ. 2022 ވަނަ އަހަރު ކޮށްފައިވާ އޮޑިޓަކުން ދައްކާ ގޮތުގައި 2014 ވަނަ އަހަރުން ފެށިގެން 2019 ވަނަ އަހަރުގެ ނިޔަލަށް ޖުމުލަ 390 ރަށަކަށް ފެން ފޯރުކޮށްދޭން 40،696،771 (ސާޅީސް މިލިއަން ހަ ސަތޭކަ ނުވަދިހަ ހަ ހާސް ހަތް ސަތޭކަ ހަތްދިހަ އެކެއް) ރުފިޔާ ދައުލަތުން ހަރަދުކޮށްފައިވެ އެވެ.
އެ ދިރާސާއިން ދައްކާ ގޮތުން 2014 ވަނަ އަހަރު ފެން ފޯރުކޮށްދީފައި ވަނީ 61 ރަށަކަށެވެ. ނަމަވެސް ފަސް އަހަރު ފަހުން 2019 ވަނަ އަހަރު 82 ރަށަކަށް ފެން ފޯރުކޮށްދޭން ޖެހުނެވެ. ރަށްރަށުގެ އަދަދުން ބަލާނަމަ އެއީ 34 އިންސައްތައިގެ އިތުރުވުމެކެވެ. ހަރަދުގެ ގޮތުން ބަލާނަމަ ފަސް އަހަރުދުވަހުގެ ތެރޭގައި ފެން ފޯރުކޮށްދޭން ދައުލަތުން ކުރި ހަރަދު 2.3 ގުނަ ވަނީ އިތުރުވެފަ އެވެ.
މި ހުރިހާ ކަމެއް މިހެން ހުއްޓައި ރާއްޖެއަށް ހިލޭ އެހީގެ ގޮތުގައި ލިބުނު ފެން ކޭސްތަކެއް އެކަށީގެންވާ ގޮތެއްގައި ނުބެލެހެއްޓި އެތައް ދުވަހެއް ވަންދެން އާންމުންނަށް ވަދެ ނިކުމެވޭ ތަނެއްގައި ބަހައްޓާފައި ހުރުމުން ބައެއް ފަރާތްތަކުން ވަނީ ސަރުކާރަށް ފާޑު ވެސް ކިޔައިފަ އެވެ.
ނަމަވެސް އެ ފެން ކޭސްތައް ރާއްޖޭގެ ރަށްރަށަށް ފޯރު ކޮށްދިނުމަށް ވެސް ނުވަތަ ރައްކާތެރި ތަނެއްގައި ރައްކާ ކުރުމަށް ވެސް މިހައިތަނަށް ސަރުކާރުން އެއްވެސް ފިޔަވަޅެއް އަޅައިފައެއް ނުވެ އެވެ.
