މައުލޫމާތު ހޯދާ ލިބިގަތުމުގެ ހައްގުގެ ގާނޫނުގެ ދަށުން ހޯދަން އެދޭ މައުލޫމާތު ދިނުމަށް، އިންފޮމޭޝަން ކޮމިޝަނަރުގެ އޮފީސް (އައިކޮމް) އިން އެންގުމުންވެސް ރައީސް އޮފީހުން އެންގުމަށް ތަބާނުވާތީ ފިޔަވަޅު އަޅައިދިނުމަށް އެދި މައްސަލަ ހުށަހަޅައިފި އެވެ.
އައިކޮމް އިން މި މައްސަލަ ހުށަހެޅީ ޕްރޮސެކިއުޓާ ޖެނެރަލް (ޕީޖީ) ގެ އޮފީހަށެވެ. މިކަމާ ގުޅިގެން އިންފޮމޭޝަން ކޮމިޝަނަރު އަހުމަދު އާހިދު ރަޝީދު "އަދަދު" އަށް ވިދާޅުވީ މައްސަލަ ހުށަހަޅަން ނިންމީ ރައީސް އޮފީހުން މައުލޫމާތު ދޭން އެންގި އެންގުމަށް އަމަލު ނުކުރުމުން ކަމަށެވެ.
އައިކޮމް އިން ހުށަހެޅި މައްސަލައާ ގުޅިގެން މައުލޫމާތު ދެއްވަމުން މީޑިއާ އޮފިޝަލް އަހުމަދު ޝަފީއު ވިދާޅުވީ، އައިކޮމް އިން އެދިފައިވަނީ ޖިނާއީ ދައުވާއެއް ކުރުމަށް ކަަމަށް ވާތީ އެ މައްސަލަ މިހާރު ފުލުހުންނަށް ހުށަހަޅާފައިވާ ކަމަށެވެ.
"ތަހުގީގީ އިދާރާއަކުން ދެއްތޯ ޖިނާއީ ތަހުގީގެއް ހިންގަންޖެހޭނީ، ޕީޖީ އޮފީހުން ފުލުހުންގެ ކިބައިން އެދިފައިވާނީ މިކަމުގައި ޖިނާއީ ކުށުގެ އަމަލެއް ހިނގާފައިވޭތޯ ބަލާ އެކަން ހުށަހަޅަން،" ޝަފީއު ވިދާޅުވި އެވެ.
އާރުޓީއައި ގާނޫނުގައި ބުނަނީ، އައިކޮމްގެ ނިންމެއް އިސްތިއުނާފުނުކޮށް، އެ ނިންމުމަށް އަމަލު ނުކޮށް 45 ދުވަސް ފާއިތުވެއްޖެ ނަމަ، އަމުރަށް ނުކިޔަމަންތެރިވުމުގެ މައްސަލަ ޝަރުއީ ކޯޓަށް ފޮނުވުމަށް އެދި، ޕްރޮސިކިއުޓަ ޖެނެރަލްގެ އޮފީހަށް ހުށަހެޅޭނެ ކަމަށެވެ.
މިފަދަ މައްސަލައެއްގައި މިހާތަނަށް ދައުލަތުގެ އެއްވެސް އޮފީހަކާމެދު ފިޔަވަޅު އަޅައިފައެއް ނުވެ އެވެ.
މި ސަރުކާރުން ވެރިކަމާ ހަވާލުވިފަހުން ރައީސް އޮފީހުން ވަނީ އާރުޓީއައި ރިކުއެސްޓުތަކަށް ޖަވާބު ދިނުން އެކީގައިހެން ހުއްޓާލައިފަ އެވެ.
ގާނޫނުގެ ދަށުން ހިފެހެއްޓެން ނެތް އެ މައުލޫމާތަށް އެދި ހުށަހެޅި ހުށަހެޅުމަށް އެއްވެސް ޖަވާބެއް ނުދޭއިރު، އެ މައްސަލަތަކުގެ އަޑުއެހުމެއްގައި ވެސް ރައީސް އޮފީހުން ބައިވެރިނުވެ އެވެ. އެކި މައްސަލަތަކުގައި މިފަހުން ބޭއްވި ހުރިހާ އަޑުއެހުމަކީ ވެސް އެކި ދުވަސް މަތިން ތާވަލުކުރުމަށް ފަހު ރައީސް އޮފީހުގެ އެދުމުގެ މަތިން ފަސްކުރުމަށް ފަހު، ގާނޫނުގައި ބުނާ މުއްދަތު ހަމަވާތީ އައިކޮމްއަށް މަޖުބޫރުވެގެން ބާއްވާފައިވާ އަޑުއެހުންތަކެވެ.
"ރައީސް އޮފީހަކީ ސަރުކާރުގެ އެންމެ އިސް އިދާރާއަށް ވެފަ، ރައީސް އޮފީހުން މިކަމަށް އެއްގޮތަކަށްވެސް އަޅާނުލާތަން ފެނުން އެއީ ހަގީގަތުގަ މި ހައްގު އެއްކޮށް ބަލިކަށި ކޮށްލެވިދާނެ ކަމެއް،" މީގެ ކުރިން މި ނޫހަށް މައުލޫމާތު ދެއްވަމުން އިންފޮމޭޝަން ކޮމިޝަނަރު އާހިދު ވިދާޅުވެފައިވެ އެވެ.
