އދ.ގެ 76 ވަނަ އާންމު މަޖިލީހުގައި ތަގުރީރުކުރެއްވުމަށް ކުރީގެ ރައީސް އިބްރާހިމް މުހައްމަދު ސޯލިހު ނިއުޔޯކަށް ކުރެއްވި ދަތުރުފުޅުގެ ހަރަދުތައް ހާމަކުރުމަށް ހައި ކޯޓުން ކުރި ހުކުމް މިދިޔަ ސަރުކާރުގައި ސުޕްރީމް ކޯޓުގައި އިސްތިއުނާފު ކުރި މައްސަލައިގެ ފުރަތަމަ އަޑުއެހުން މާދަމާއަށް ތާވަލުކޮށްފި އެވެ.
މާދަމާ ހެނދުނު ނުވައެއް ޖަހާއިރު ފަށަން ތާވަލުކޮށްފައިވާ ޝަރީއަތް ކުރިއަށް ގެންދަވާނީ ތިން ފަނޑިޔާރުންގެ ބެންޗަކުންނެވެ. އެއީ ފަނޑިޔާރު އައިޝާ ޝުޖޫން މުހައްމަދު، ފަނޑިޔާރު މަހާޒު އަލީ ޒާހިރު އަދި ފަނޑިޔާރު އަލީ ރަޝީދު ހުސައިނެވެ.
އިންފޮމޭޝަން ކޮމިޝަނަރުގެ އޮފީހަށް ރައްދުވާ ގޮތަށް ރައީސް އޮފީހުން ހުށަހެޅި އެ މައްސަލައަކީ ކުރީގެ ރައީސް ސޯލިހު ނިއުޔޯކަށް ކުރެއްވި ދަތުރުތަކުގެ ފައިސާގެ މައްސަލަ ކަން އިންފޮމޭޝަން ކޮމިޝަނަރުގެ އޮފީހުން ކަށަވަރުކޮށްދިނެވެ. ސުޕްރީމްކޯޓުގެ ވެބްސައިޓްގައި ވެސް މައްސަލައިގެ މައުލޫމާތު އޮތީ އެގޮތަށެވެ.
އެ އޮފީހުން މައުލޫމާތު ދިން ގޮތުގައި އެއީ އެ މައްސަލައިގެ ފުރަތަމަ އަޑުއެހުމެވެ. އަދި މައްސަލައިގެ ނޯޓިސް ވެސް އެ އޮފީހަށް ލިބިފައިވާ ކަމަށް ބުންޏެވެ.
އާ ސަރުކާރުން މި މައްސަލައިގެ ސްޓޭންޑް އޮތް ގޮތް ސާފުކުރަން ރައީސް އޮފީހުގެ ތަރުޖަމާނު ހީނާ ވަލީދަށް މިދިޔަ ބުރާސްފަތި ދުވަހު ގުޅައި ސުވާލުކޮށް އަދި ފަހުން އިއްޔެއާއި މިއަދު ސުވާލު ތަކުރާރުކޮށް މެސެޖު ކުރުމުން ވެސް އަދި ބަހެއް ވިދާޅެއް ނުވެ އެވެ.
މި ހަރަދުތައް ހާމަކުރުމަށް ރައީސް އޮފީހުން އޭރު ދެކޮޅު ހަދާފައި ވަނީ ދަތުރުގައި ބައިވެރިވެވަޑައިގެންނެވި ބޭފުޅުންގެ ޒާތީ މައުލޫމާތުތައް ހާމަވެދާނެ ކަމަށާއި ރައީސުލްޖުމްހޫރިއްޔާގެ ފުރާނަފުޅަށް ނުރައްކާވުމަކީ ވެސް މައުލޫމާތު ހާމަކުރުމުން ކުރިމަތިވުމުގެ އިހުތިމާލު އޮތްކަމެއް ކަން ފާހަގަކޮށެވެ.
އެހެންނަމަވެސް ހައި ކޯޓުން މެއި 25، 2023 ގައި ކުރި ހުކުމުގައި ވަނީ ގާނޫނުގެ ދަށުން ދޫނުކޮށް ހިފަހެއްޓޭނެ މައުލޫމާތު ކަމަށް ބުނެފައިވާ މައުލޫމާތެއް ލިޔުމެއްގައި ހިމެނޭނަމަ އެ މައުލޫމާތެއް އުނިކުރުމަށް ފަހު އެ ލިޔުމެއް ހާމަކުރުމަށް އަންގައިފަ އެވެ.
އެފަދަ ޒާތީ މައުލޫމާތެއް އެކުލެވޭތީ މައުލޫމާތު އެކީ ހިފަހައްޓާނަމަ ވަރަށް ބޮޑަށް މައުލޫމާތު ލިބިގަތުމުމުގެ ހައްގަށް ހުރަސް އެޅިގެންދާ ކަން ވެސް ހައި ކޯޓުގެ ހުކުމުގައި ފާހަގަ ކޮށްފައިވެ އެވެ.
