ދިވެހިންގެ އުފެއްދުންތައް ބައިނަލްއަގުވާމީ މާކެޓުތަކުގައި ވިއްކުމަށްޓަކައި ޕޭޕަލް އާއި އެހެނިހެން ޕޭމެންޓު ގޭޓުވޭތައް ގާއިމުކޮށްދޭނެ ކަމަށް ރައީސް ޑރ. މުހައްމަދު މުއިއްޒު ވެވަޑައިގެންނެވި ވައުދަށް އަހަރެން ވުމަށް ގާތްވެފައި ވާއިރު، އެކަމުގައި ނަތީޖާއަކާ ހަމައަށް އަދިވެސް ނުދާ ކަމަށް އެ މަނިކުފާނު ރޭ ވިދާޅުވެއްޖެ އެވެ.
މޯލްޑިވިއަން އާޓިސްޓް ކޮމިއުނިޓީން އިންތިޒާމުކޮށްގެން އާޓް ގެލަރީގައި ކުރިއަށް ގެންދާ "އަންވެއިލިން ވިޒަންސް 2024" މައުރަޒު ބައްލަވައިލެއްވުމަށް ފަހު، ރައީސް މުއިއްޒު ވިދާޅުވީ ކްރިއޭޓާ އިކޮނޮމީއެއް ގާއިމުކުރުމަކީ ރިޔާސީ ވައުދެއް ކަމަށެވެ.
އެކަމަށްޓަކައި ޕޭޕަލް އާއި އޮންލައިން އެހެން ގޭޓުވޭތައް ގެންނައުމުގެ މަސައްކަތުގައި ނަތީޖާއަކާ ހަމައަށް ނުގޮސް އޮތް ސަބަބެއް ކަމަށް ރައީސް މުއިއްޒު ވިދާޅުވީ އެކަމުގައި "ވަރަށް ގިނަ މަސައްކަތް ކުރަން ޖެހޭ"ތީ ކަމަށެވެ.
އެކަންކަން ކާމިޔާބު ވާނެ ދުވަހެއް ވިދާޅުނުވި ނަމަވެސް، އެ ވައުދު ފުއްދަވައި ދެއްވާނެ ކަމަށް ރޭ ވެސް ރައީސް މުއިއްޒު ވިދާޅުވި އެވެ.
"ތިބޭފުޅުންގެ ހުނަރުތައް ވިއްކުމުގެ ފުރުސަތުތައް ހުޅުވާލަ ދިނުމަށްޓަކައި ކަރަންޖެހޭ މަސައްކަތްތަކަށް އެބަ މަސައްކަތް ކުރެވޭ. އަޅުގަނޑު ތިބޭފުޅުންނަށް ދޭނެ ޔަގީން ކަމަކީ އެ މަސައްކަތް ކާމިޔާބުވާނެ. ކާމިޔާބު ވުމުން ތިބޭފުޅުންނަށް ދުނިޔޭގެ ކޮންމެ ތަނަކަށް ވެސް ތިބޭފުޅުންގެ ތި މަސައްކަތް ވިއްކައި އޭގެން އާމްދަނީ ހޯދުމުގެ ފުރުސަތު ފަހިވެގެން ދާނެ،" މުއިއްޒު ވިދާޅުވި އެވެ.
ރިޔާސީ އިންތިހާބުގެ ކެމްޕޭނުގައި ރައީސް މުއިއްޒު ވިދާޅުވީ ޒުވާނުން އުފައްދާ ތަކެތި އިންޓަނޭޝަނަލް މާކެޓުގައި ވިއްކުމުގެ ފުރުސަތު ދިނުމަށްޓަކައި ކްރިއޭޓާ އިކޮނޮމީ ގާއިމްކޮށްދ،ީ ޕޭޕަލްގެ އިތުރުން އެހެނިހެން ޕޭމެންޓު ގޭޓްވޭތައް ގެނެސް، ސެލާ އެކައުންޓްސްތައް ހުޅުވަން ޖާގަ ދ،ީ އަދި ކޮންމެ މީހަކަށް ސިޓިޒަންސް ވޮލެޓެއް ދޭނެ ކަމަށެވެ.
