ސެޕްޓެމްބަރު 30, 2023, ގައި އޮތް ރިޔާސީ އިންތިހާބަށް ފަހު އޭރުގެ ރައީސް އިބްރާހިމް މުހައްމަދު ސޯލިހުގެ އަރިހުން އެމަނިކުފާނު ގެއަށް ބަދަލުކުރުމަށް އަދި މިނިވަން ކުރުމަށް ވެސް މިހާރުގެ ރައީސް ޑރ. މުހައްމަދު މުއިއްޒު އެދިވަޑައިގެންފައި ނުވާ ކަމަށް ކުރީގެ ރައީސް އަބްދުالله ޔާމީން ވިދާޅުވެއްޖެ އެވެ.
އިންތިހާބު ނިމުނުއިރު ޔާމީން ހުންނެވީ މަނީ ލޯންޑަރިން އާއި ރިޝްވަތު ހިފުމުގެ ކުށުގައި 11 އަހަރުގެ ޖަލު ހުކުމެއް ތަންފީޒު ކުރައްވަން މާފުށީ ޖަލުގަ އެވެ. ނަމަވެސް ޖެހިގެން އައި އޮކްޓޯބަރު އެކެއްގައި އެމަނިކުފާނު ގެއަށް ބަދަލުކުރި އެވެ.
ޔާމީން އުފެއްދެވި ޕީޕަލްސް ނޭޝަނަލް ފްރޮންޓް (ޕީއެންއެފް) އިން ރޭ ބޭއްވި ޖަލްސާއެއްގައި ޔާމީން ވިދާޅުވި ގޮތުގައި އިންތިހާބީ ރައީސް މުއިއްޒު އޭރުގެ ރައީސުލްޖުމްހޫރިއްޔާއާ ބައްދަލުކުރައްވައި އެކަމަށް އެދިވަޑައިގެންފައި ނުވެ އެވެ.
"މުއިއްޒު ވޯޓުން ހޮވިވަޑައިގެން ރައީސުލްޖުމްހޫރިއްޔާގެ ދައުވަތަކަށް ދިޔައިރު އެ މީޓިންގައި ތިބީ ހަތަރު މީހުން. މުއިއްޒުއާ އެކީގައި ދިޔައީ އަބްދުއްރަހީމް. އަނެއްކޮޅުން ސޯލިހު އާއި ރައީސް އޮފީހުގެ އިސް ބޭފުޅެއް. އެ މީޓިންގައި ވެސް ޔާމީން ގެއަށް ބަދަލުކޮށްދޭށޭ, ޔާމީން މިނިވަން ކޮށްދޭށޭ މުއިއްޒުއެއް ނުބުނޭ," ޕީއެންއެފް އޮފީހުގައި ރޭ ޔާމީން ވިދާޅުވި އެވެ.
ޔާމީން މިނިވަން ކުރުމަށް ސޯލިހުގެ އަރިހުން ބައްދަލުވުމުގައި އެދިވަޑައިގެންނެވި ކަމަށް ވަރަށް ގިނަ ޕޯޑިއަމްތަކުގައި ރައީސް މުއިއްޒު ވިދާޅުވެފައިވެ އެވެ. އެ ވާހަކަތައް ދޮގު ކުރައްވައި ޔާމީން ވަނީ އެމަނިކުފާނު ރޭ ހިއްސާކުރެއްވީ ހުރިހާ ރައްޔިތުންނަށް އެނގެން ޖެހޭ ވާހަކައެއް ކަމަށް ވިދާޅުވެފަ އެވެ.
"އެހެންވެގެން ވެރިކަމަށް ހޮވުނު ފަހުން އަޅުގަނޑުމެން ގޭދޮށުގައި މުޒާހަރާ ކުރާ ކުރުން ވެސް ހުއްޓުވާލީ އެހެންވެ. އެއްވެސް ކަހަލަ އިހުލާސްތެރި ނިޔަތެއް ނެތް އަޅުގަނޑު ގެއަށް ބަދަލުކުރާކަށް ވެސް. މި ދެންނެވީ ހޮވުނީމައި އެ ލިބުނު ފުރުސަތުގައި ވެސް ނެތޭ ރިކުއެސްޓް ކޮށްފައެއް ގެއަށް ބަދަލުކުރާކަށް," ޔާމީން ވިދާޅުވި އެވެ.
ޔާމީން ދިރުއުޅުއްވާ ހ. ދޫވެހި ކައިރިއަށް ވަޑައިގެން މީޑިއާތަކާ ވާހަކަ ދައްކަވަމުން އޭރު ރައީސް މުއިއްޒު ވިދާޅުވި ގޮތުގައި ޔާމީން ގެއަށް ބަދަލުކުރުމަށް އެމަނިކުފާނު އަމިއްލައަށް ސޯލިހުއަށް ދެންނެވި އެވެ.
"އަޅުގަނޑުވެސް ރައީސް އިބްރާހިމް މުހައްމަދު ސޯލިހާ ބައްދަލުކޮށްފަ މިއައީ ދެއްވި ފުރުސަތުގަ. މިކަން ފާހަގަކޮށް އަޅުގަނޑު ދެންނެވިން މިވާހަކަ. މި ގައުމުގެ ރައްޔިތުން ބަސް އިއްވީމާ އެކަމުގެ ހަމަ ގޮތް ނިންމެވީ ކަމަށް ގައުމުގެ މަސްލަހަތު އިސްކުރައްވާފައި،" ޔާމީން ގެއަށް ބަދަލުކުރި ދުވަހު ރައީސް މުއިއްޒު ވިދާޅުވެފައިވެ އެވެ.
ޔާމީންގެ ބައިވެރިވުން ރައީސް މުއިއްޒުގެ ސަރުކާރުގައި އޮންނާނެ ކަމަށް އެ ދުވަހު ބެލެވުނު ނަމަވެސް ވެރިކަމުގެ ހުވާ ކުރައްވައި ރައީސް އާ ސަރުކާރު އެކުލަވާލިތާ މާ ގިނަ ދުވަސްތަކެއް ނުވަނީސް ޔާމީން ވަނީ ޕީޕީއެމް/ޕީއެންސީއާ ފެއަށް ޖެހިވަޑައިގެން އާ ސިޔާސީ ޕާޓީއެއް އުފައްދަވާފަ އެވެ.
