މ. އަތޮޅުގެ ވެރިރަށް، މުލީގައި ކަރަންޓުގެ މައްސަލަތައް ބޮޑުވަމުން ގޮސް، ރޭ މުޅި ރަށުން އެއްކޮށް ކަރަންޓު ކެނޑިއްޖެ އެވެ.
މުލިން ވާހަކަ ދެއްކި މީހަކު ބުނީ އެ ރަށުގެ ރައްޔިތުން ކަނު އަނދިރީގައި ތިބޭތާ އެތައް ގަޑިއިރެއް ވެއްޖެ ކަމަށެވެ. ކަރަންޓުގެ މައްސަލަ ދިމާވަމުންދާތާ ދެ ދުވަސް ވެއްޖެ ކަމަށް އޭނާ ބުންޏެވެ.
ފެނަކަ ކޯޕަރޭޝަންގެ މެނޭޖިން ޑިރެކްޓަރު މުއާޒު މުހައްމަދު ރަޝީދު އަދަދު ނޫހަށް ވިދާޅުވީ ކަރަންޓު ދިޔައީ ޖަނަރޭޓަރު ސެޓަކަށް ދިމާވި މައްސަލައެއްގެ ސަބަބުން ކަމަށެވެ. އެ ރަށަށް ގެންގޮސްފައި ހުރި އާ ޖެންސެޓު ގުޅުމުގެ މަސައްކަތް ކޮށް މިއަދު މުޅި ރަށަށް އަލުން ކަރަންޓު ދެވޭނެ އޭނާ ވިދާޅުވި އެވެ.
"މިވަގުތު އެރަށުގައި ކަރަންޓެއް ނެތް. މައްސަލަ ހައްލުކުރުމުގެ މަސައްކަތް މިހާރު ވެސް ކުރަމުން އެބަ ގެންދޭ،" މުއާޒު ވިދާޅުވި އެވެ.
މުލީގެ އާބާދީއަކީ 1014 އެވެ. އެއީ 520 ފިރިހެނުންނާއި 492 އަންހެނުންނެވެ. އަތޮޅު ހޮސްޕިޓަލް އެ ރަށުގައި ހިންގަމުން އަންނައިރު، މިހާރު ވަނީ އެއާޕޯޓެއް ވެސް ތަރައްގީކޮށް، ރަށުގެ އިގުތިސޯދު ފުޅާކޮށްފަ އެވެ.
