ލޯބިވެރިޔާއަށް ވަޅިން ހަމަލާ ދިން ކަމުގެ ތުހުމަތުގައި، ދިވެހި ޒުވާނަކު 30 ދުވަހަށް ނުވަތަ އެއް މަސް ދުވަހަށް ބަންދު ކުރަން ކްރިމިނަލް ކޯޓުން އިއްޔެ އަމުރުކޮށްފި އެވެ.
މި މައްސަލާގައި ބަންދުކުރި މީހަކީ މާރާމާރީ ހިންގުމުގެ ކުށުގެ ރެކޯޑެއް ވެސް އޮތް، އަދި ކުރިން ހައްޔަރު ބަންދުގެ 26 ރެކޯޑެއް އޮތް 22 އަހަރުގެ ދިވެއްސެކެވެ.
ކޯޓު އަމުރުގައި ބުނާ ގޮތުން އަނިޔާގެ އަމަލެއް އޭނާ ހިންގާފައިވާ ކަމަށް ބެލެވޭ ހެކި ފުލުހުން ކޯޓަށް ވަނީ ހުށަހަޅައިފަ އެވެ.
އަނިޔާގެ ޝިކާރަައަށްވި އަންހެން މީހާއަކީ އޭނާގެ ލޯބިވެރިޔާ ކަން އޭނާ ކޯޓުގައި ދެއްކި ވާހަކަތަކުން އެނގޭ ކަމަށް ކޯޓު އަމުރުގައިވެ އެވެ.
ލޯބިވެރިޔާއާ އޭނާއާ ދެމެދު ޒުވާބެއް ހިނގި ކަން ކޯޓުގައި އެއްބަސްވި އެވެ. އެކަމަކު މާރާމާރީ ހިންގި ކަމަށް އިންކާރު ކުރި އެވެ.
އޭނާގެ ދަބަހުން ފެނުނު ވަޅިއަކީ އޭނާ ގެންގުޅޭ އެއްޗެއް ކަމަށް އެއްބަސްވެ އެއީ އޭނާ ޑައިވިނަށް ދާއިރު ބޭނުންކުރަން ގެންގުޅޭ އެއްޗެއް ކަމަށް ކޯޓުގައި ބުނި ކަމަށް ކޯޓު އަމުރުން އެނގެ އެވެ.
