ގުރުއާނާ ބެހޭ ދާއިމީ މައުރަޒެއް ރާއްޖޭގައި ގާއިމުކުރައްވާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.
ގުރުއާން ކިޔެވުމުގެ 36 ވަނަ ގައުމީ މުބާރާތް ނިންމުމުގެ ޖަލްސާގައި ވާހަކަ ދައްކަވަމުން ރައީސް ވިދާޅުވީ، މެނިފެސްޓޯގެ ވައުދުތަކާ އެއްގޮތަށް އެ ފުޅާ މިނުގައި ގުރުއާނާ ބެހޭ ކަންކަން ކުރިޔަށް ގެންދިޔުމަށް ޓަކައި ކީރިތި ގުރުއާނާ ބެހޭ މަރުކަޒެއް އަލުން އިމާރާތްކުރުމަށް ބިމެއް ހަމަޖެހިގެންދާނެ ކަމަށެވެ.
އަދި، ޒަމާނީ ވަސީލަތްތަކުގެ އެހީގައި ގުރުއާނާ ބެހޭ ދާއިމީ މައުރަޒެއް ވެސް ގާއިމުކުރައްވާނެ ކަމަށް މިރޭ ރައީސް ވަނީ ވައުދުވެވަޑައިގެންފަ އެވެ.
"ޒަމާނީ ޓެކްނޯލޮޖީގެ އެހީގައި ތައްޔާރުކޮށް އާންމުކުރެވޭ ކީރިތި ޤުރްއާނާ ބެހޭ ހާއްސަ ދާއިމީ މައުރަޒެއް ފުރަތަމަ ފަހަރަށް ރާއްޖޭގައި ގާއިމުކުރަން ވެސް އަޅުގަނޑު ގަސްތުކުރަން، މާތް ﷲގެ ވާގިފުޅާއެކު އެ ކަން ވެސް ހަގީގަތަކަށް ހަދާނަން،" ރައީސް ވިދާޅުވި އެވެ.
އޭގެއިތުރުން ރައީސް ވަނީ ގައުމީ ގުރުއާން މުބާރާތަކީ ރާއްޖޭގައި ކޮންމެ އަހަރަކު ބޭއްވޭ، އިނާމުތައް އެންމެ އަގުބޮޑު، އަދި އިނާމުތައް އެންމެ ގިނަ މުބާރާތް ކަމުގައި މި އަންނަ އަހަރުން ފެށިގެން ވެގެންދާނެ ކަމަށް ވެސް ރައީސް މިރޭގެ ވިދާޅުވި އެވެ.
އަދި، ހާފިޒުން އިތުރުކުރުމަށް ސަރުކާރުން ކުރާ މަސައްކަތްތައް މިހާރަށްވުރެވެސް އިތުރުކޮށް، ރާއްޖޭގައި ހިލޭ ގުރުއާން ކިޔަވަން ދަސްކޮށްދޭ ކްލާސްތައް އިތުރުކޮށް އެ ހިދުމަތް މުޅި ރާއްޖެއަށް ފުޅާކުރައްވާނެ ކަމަށްވެސް އެމަނިކުފާނު ވަނީ ވިދާޅުވެފަ އެވެ.
